އިސްލާމީ ކަންތައްތަކާބެހޭ ވުޒާރާއިން އިންތިޒާމުކޮށްގެން ބާއްވާ ދީނީ ކަންކަމަށް ޚިދުމަތްކުރާ ޖަމްޢިއްޔާތަކުގެ ފުރަތަމަ މަހާސިންތާ މާދަމާ ފަށަން ތައްޔާރުވަމުންދާ ކަަމަށް އެ ވުޒާރާއިން ވިދާޅުވެއްޖެއެވެ.
އިސްލާމީ ކަންތައްތަކާބެހޭ ވަޒީރު ޑރ. މުޙައްްމަދު ޝަހީމް ޢަލީ ސަޢީދު އެކްސް ގައި ކުރެއްވި ޕޯސްޓެއްގައި ވިދާޅުވީ މި މަހާސިންތާގައި 70 އަށްވުރެ ގިނަ ޖަމްޢިއްޔާއިން ބައިވެރިވާނެ ކަމަށެވެ.
ވަޒީރު ޑރ. ޝަހީމް ވިދާޅުވީ މި މަހާސިންތާގެ މައިގަނޑު މަގްސަދަކީ ރާއްޖޭގެ ދީނީ ވަޙުދަތު ދެމެހެއްޓުމުގައި ގުޅިގެން މަސައްކަތް ކުރުން ކަަމަށެވެ. މިއީ ރައީސް ޑރ. މުޙައްމަދު މުޢިއްޒުގެ ސަރުކާރުގެ މުހިންމު އަމާޒެއް ކަމަށްވެސް ވަޒީރު ވަނީ ވިދާޅުވިއެވެ.
މިއީ އިސްލާމީ ވުޒާރާއިން ބާއްވާ މިފަދަ ފުރަތަމަ ތާރީޚީ މަހާސިންތާއެވެ. މި މަހާސިންތާގައި ދީނީ ތަފާތު މައުޟޫއުތަކާ ގުޅޭ ގޮތުން މަޝްވަރާ ކުރާނެއެވެ. އަދި ޖަމިއްޔާތަކުގެ މެދުގައި ތަޖުރިބާ ޙިއްޞާކުރުމުގެ ފުރުސަތު ލިބިގެންދާނެއެވެ.
އިލްމުވެރިންގެ މަހާސިންތާ، ޖަމްއިއްޔާ މަހާސިންތާ، އިމާމުންގެ މަހާސިންތާ، ޒަކާތު މަހާސިންތާ، ހައްޖާއި އުމްރާ މަހާސިންތާގެ އިތުރުން ފަތުވާ މަޖްލިސް މަހާސިންތާ ބާއްވަން ނިންމަވާފައިވާ ކަމަށް އެ ވުޒާރާއިން ވިދާޅުވެފައިވެއެވެ.
މީގެ ކުރިން އެ ވުޒާރާއިން ވަނީ ދީނީ ޢިލްމުވެރިންގެ މަހާސިންތާ ބާއްވާފައެވެ.
