މަނަދޫ އަޒީގެ ޅެންހާރު: ސުވަރުގެއަކީ

އަރާމާ މީރުކަން އެތަނުން ލިބޭތަނެކޭ ސުވަރުގެއަކީ

ކަރާމާތްތެރި އެތައްބާރެއް ހިނގާތަނެކޭ ސުވަރުގެއަކީ

ހިތަށް ސިފަވެސްނުކުރެވޭހައި އެތައްކަންތައްތަކެއް އެތަނުން

ހިތަށްއެރުމާއެކީ ވަގުތުން ވެވޭތަނެކޭ ސުވަރުގެއަކީ

މަލާ މޭވާގެ މީރުވަހުން ހިތާރޫޙަށް އަރާމުލިބޭ

ފަލާޙާ ކާމިޔާބުގެ މަންޒިލޭ މަތިވެރި ސުވަރުގެއަކީ

މިތާދުނިޔޭގެ މަސްރަޙްގައި ކުރާ ޢަމަލުގެ ނަތީޖާއިން

"އެތާ" ހިތްމަޖެހުންލިބިދޭ ގޮވައްޖޭ މާތް ސުވަރުގެއަކީ

ހިތާމަތަކާ މުސީބާތާ ތުރާލާ ވޭންތަކާ މޮޅިޔާ

މިތާ މިލިބޭ ބިރާ ސިހުމާ ނުވާތަނެކޭ ސުވަރުގެއަކީ

ނިދުން އާފުރި ކިނބިހިއެޅުމާ ޠަބީޢީ ކަންކަމެއް މިހިނގައި

ލިބުން އެޙަޔާތުގައިދުވަހަކު ނުވާތަނެކޭ ސުވަރުގެއަކީ

ތިމާޔަށް ނުރުހެވޭ ސިފައެއް ތިމާބޭނުންނުވާ ކުލައެއް

ދިމާއަށް ހާމަޔަށް ފެނިވުން ނުވާތަނެކޭ ސުވަރުގެއަކީ

ނުހަނު ރަހަމީރު އާރުތަކާ އެހައި ފުރިހަމަ ބަގީޗާތައް

ނުހަނު ފިނިފޮނިވިހައި ބުއިންތައް ލިބޭތަނެކޭ ސުވަގެއަކީ

އެތައް ޙޫރެއްގެ ޚިދުމަތުގައި އެހައި ލޯބީގެ ލައްޒަތުގައި

ދެތަންނުމެވާގޮތުން ދެމިތިބެވިދާތަނެކޭ ސުވަރުގެއަކީ

މިތާ ދުނިޔޭގެ މިންގަނޑަކުން އެތާ އެއްވެސްކަމެއް ބެލުމަށް

ހިތާ' ދޫ ނުކުޅެދޭކަން ހާމަވާތަނެކޭ ސުރުގެއަކީ

އިލާހަށް ބޯލަބައި ކިޔަމަންވެ އެންގެވިހައި ކަމެއްގެމަތީ

ޚިލާފެއްނެތި މިތާއުޅުމުން ދެވޭތަނެކޭ ސުވަރުގެެއަކީ

12 ސެޕްޓެމްބަރު 2024
*عبدالعزيز قاسم
ލިލީ ނ.މަނަދޫ