މާލެ ސަރަޙައްދުގައި ކެންސަރު ބަލި ޖެހިފައިވާ މީހުންގެ ތަފާސްހިސާބު އެކުލަވާލުމުގެ މަސައްކަތް މިއަހަރުގެ ނިޔަލަށް ނިންމުމަށް މަސައްކަތް ކުރަމުން އަންނަކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ވިދާޅުވެއްޖެއެވެ.
ދައުލަތުގެ މީޑިޔާ، ޕީއެސްއެމް ނިއުސްއަށް މަޢުލޫމާތު ދެއްވަމުން އެޗްޕީއޭގެ ޕަބްލިކް ހެލްތް ކޯޑިނޭޓަރ ޢަބްދުﷲ މުޢާޒް އާދަމް ވިދާޅުވީ ރާޢްޖޭގައި ކެންސަރުގެ ހާލަތު ދެނެގަތުމަށްޓަކައި ބަލި ޖެހިފައިވާ މީހުންގެ ތަފާސްހިސާބުތައް އެއްކޮށް އެ މަޢުލޫމާތުތައް ޑިޖިޓަލައިޒްކުރުމުގެ މަސައްކަތްތައް ކުރަމުން އަންނަކަމަށެވެ.
މިހާތަނަށް ކުރަމުން އަންނަ މަސައްކަތްތަކުގެ ތެރެއިން ފުރަތަމަ ފިޔަވަހީގައި އައިޖީއެމްއެޗްއާއި ހުޅުމާލެ ހޮސްޕިޓަލުން ފަރުވާ ހޯދަމުން އަންނަ 1400އަށްވުރެ ގިނަ މީހުން ރަޖިސްޓްރީކޮށް ދަފްތަރެއްގެ ގޮތުގައި ބަލަހައްޓަމުންގެންދާކަމަށް އޭނާ ވިދާޅުވިއެވެ. އަދި މިއަހަރު ނިމުމުގެ ކުރިން މާލެ ސަރަޙައްދުގައި އެ ބަލި އޮތް މިންވަރު ދެނެގަނެ ތަފާސްހިސާބުތައް އެކުލަވާލުމަށް މަސައްކަތް ކުރަމުން އަންނަކަމަށްވެސް މުއާޒް ވިދާޅުވިއެވެ.
ކެންސަރުގެ ތަފާހިސާބުތައް އެކުލަވާލާއިރު ރާއްޖޭގައި އެންމެ ގިނައިން ކެންސަރ ޖެހޭ ބާވަތްތައް އެކުލަވާލާ، ބަލި ޖެހުމަށް މަގުފަހިވާކަންތައްތައްވެސް ދެނެގަތުމަށް ހަމަޖެހިފައިވެއެވެ.
ކެންސަރުގެ ތަފާސްހިސާބުތައް އެކުލަވާލުމުގެ މަސައްކަތްތައް ކުރަމުން އަންނައިރު ކެންސަރއަށް ސްކްރީން ކުރުމުގެ މަސައްކަތްތައްވެސް އަންނަނީ ކުރަމުންނެވެ.
އެގޮތުން ރަށު ފެންވަރުގައާއި އަތޮޅު ފެންވަރުގައިވެސް މި ބައްޔަށް ސްކްރީންކޮށް ހޭލުންތެރިކުރުމުގެ މަސައްކަތްތައް އަންނަނީ ކުރަމުންނެވެ.
ރާއްޖޭގައި ކެންސަރު ބައްޔާ ގުޅޭ ޚިދުމަތް ދޭ ސަރުކާރުގެ މައި ހޮސްޕިޓަލަކީ ހުޅުމާލެ ހޮސްޕިޓަލެވެ. ކެންސަރު ބަލީގައި ހުޅުމާލެ ހޮސްޕިޓަލްގައި ރަޖިސްޓަރކޮށްފައިވާ މީހުންގެ ތަފާސްހިސާބުތަކަށް ބަލާއިރު ކެންސަރު ބަލީގެ މީހުން އެންމެ ގިނައީ، މާލެ، އައްޑޫ، ހއ، ހދ، ށ އަދި ރ.އަތޮޅުގައެވެ.
ރާއްޖޭގެ ކެންސަރު ބަލީގެ ޙާލަތު ދެނެގަތުމަށް "ކެންސަރ ޕޭޝަންޓް ރަޖިސްޓްރީ"އެއް އެކުލަވާލުމުގެ މަސައްކަތް ކުރަމުން އަންނައިރު މިހާތަނަށް ބެލި ބެލުމުން ރާއްޖޭގައި އެންމެ ގިނަކަމަށް ދައްކަނީ އުރަމަތީގެ ކެންސަރާއި، ފުއްޕާމޭ، ލޭ، ތައިރޮއިޑް އަދި އަނގަޔަށް ޖޭހޭ ކެންސަރުފަދަ ބާވަތްތައްކެވެ.
ރާއްޖޭގައިވެސް ކެންސަރު ބަލި ޖެހޭ މީހުންގެ އަދަދު އަންނަނީ އިތުރުވަމުންނެވެ. ރާއްޖޭގައި މަރުވާ މީހުންގެ %84އަކީ ގައިންގަޔަށް ނާރާ ބަލިތަކުގައި މަރުވާ މީހުންނަށްވާއިރު، މީގެތެރެއިން %17އަކީ ކެންސަރު ބަލީގައި މަރުވާ މީހުންނެވެ.
