ބަންކަރިންގެ ޚިދުމަތާއެކު ރާއްޖޭގައި ޔޫއެސް ޑޮލަރު ލިބުމަށް ހުރި ދަތިކަމަށް ވަަރަށް ބޮޑު ލުޔެއް ލިބިގެންދާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުޙައްމަދު ވަޖީހު އިބްރާހީމް ވިދާޅުވެއްޖެއެވެ.
ބަންކަރިން ޚިދުމަތް ފެށުމާ ގުޅޭގޮތުން ދައުލަތުގެ މީޑިއާގައި ރޭ ވާހަކަދައްކަވަމުން ވަޖީހު ވިދާޅުވީ އުތުރުގައި ފެށުމަށް ހަމަޖެހިފައިވާ ބަންކަރިންގެ ހިދުމަތް މި މަހުގެ 19 ގައި ފެށުމަށް ތައްޔާރުވެފައިވާކަމަށާއި، މިހާރު ކުރިޔަށް ދަނީ އެކަމުގެ ފަހު ތައްޔާރީތައްކަން ފާހަގަކުރައްވައި ވަޖީހު ވިދާޅުވީ މި ހިދުމަތް ފެށުމުން އެމްޕީއެލްއިން މެރިޓައިމްގެ 14 ހިދުމަތެއް ބޯޓުތަކަށް ފޯރުކޮށްދޭނެކަމަށެވެ.
މީގެތެރޭގައި ޕައިލެޓޭޖާއި، ކްރޫއިން ބަދަލު ކުރުން އަދި ކާބޯތަކެތި ފޯރުކޮށްދިނުން އަދި ޓަގް ޚިދުމަތް ހިމެނޭ ކަން ފާހަގަކުރައްވަމުން ވަޖީހް ވިދާޅުވީ މި މަހު އޮފް ޝޯކޮށް ޚިދުމަތް ފެށުނު ނަމަވެސް ދެވަނަ ފިޔަވަހީގެ ދަށުން ބޯޓުތައް ހއ. ހޯރަފުށިއަށް ބަނދަރުކޮށްގެން ހިދުމަތް ދިނުމަށް އިހަވަންދިއްޕޮޅަށް ބޮޑު ބަދަަލެއް ގެންނާނެ ކަމަށެވެ. އޭގެ ތެރޭގައި ހޯރަފުށި ފަޅު ހިއްކައިގެން ތެޔޮ ޓާމިނަލްއާއި އިންޓަނޭޝަނަލް ފެންވަރުގެ ޓާމިމަލެއް ތަރައްޤީ ކުރުން ހިމެނޭ ކަމަށް ވަޖީހް ވިދާޅުވިއެވެ.
އިހަވަންދިއްޕޮޅުގައި މި ފަށާ ޚިދުމަތަކީ އެއީ އިންޓަރނޭޝަނަލް ބަންކަރިންގެ ޚިދުމަތް ކަމަށާއި އެކަމުގެ ހުރިހާ މުއާމާލާތެއް ހިންގިގެންދާނީ ބޭރު ފައިސާއިން ކަމަށާއި އެމްޕީއެލްއިން ހިންގާ ކަންކަމުގެ ތެރޭގައި ހިމެނޭ ޑޮކިންގްގެ ކަންތައްތަކާ ސަލްވޭޖުގެ ޚިދުމަތްތަކުގައި ވެސް މުއާމަލާތް ކުރެވޭނީ ޔޫއެސް ޑޮލަރުން ކަން ފާހަގަކުރައްވަމުން ވަޖީހު ވިދާޅުވީ ޤައުމެއްގެ އިޤްތިސާދީ ހާލަތު ރަނގަޅުވެގެން ދާނީ އެޤައުމެއްގައި ތިބި ޕްރައިވެޓް ޕާޓީތައް ރަނގަޅު ވެގެން ކަމަށާއި އަމިއްލަ ވިޔަފާރިކުރާ ފަރާތްތަކުގެ އާމްދަނީ އިތުރުވެ، އެމީހުން ތަރައްޤީވެ ގޮސްގެން ކަމަށެވެ.
އެމްޕީއެލް މެދުވެރިކޮށް ވެސް ގިނަ އަދަދެއްގެ ބޭރު ފައިސާ ވަންނާނެ ކަން ފާހަގަކުރައްވާ ވަޖީހު ވިދާޅުވީ ޤަބޫލުކުރެވޭ ގޮތުގައި މި ޚިދުމަތާއެކު ރާއްޖޭގައި ޔޫއެސް ޑޮލަރަށް ހުރި ދަތިތަކަށް ވަަރަށްބޮޑު ލުޔެއް ލިބިގެންދާނެ ކަމަށެެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން 10 މަސް ދުވަހުގެ ތެރޭގައި އިންޓަނޭޝަނަލް ބަންކަރިންގެ ޚިދުމަތް ފެށުމަށް ތައްޔާރުވުމަކީ ސަރުކާރާ މެދު ސުވާލު އުފައްދާ ބަޔަކަށް ދެވޭނެ އެންމެ ވަރުގަދަ އެއް ޖަވާބުކަމަށްވެސް ވަޖީހް ފާހަގަކުރެއްވިއެވެ.
