އަހަރުމެން އެކި މީހުން އެކި ގޮތްގޮތަށް ތަރުކާރީ މަޑުކުރަމުއެވެ. ބައެއް މީހުން ކުކަރުގައި އާވިން މަޑު ކުރާއިގައި ފެން އެއްޗެއްގެ ތެރެއަށް ލައިގެންވެސް ތަރުކާރީ ކައްކައެވެ. އަދި އުނދުން މަތިން ތެއްޔެއްގެ ތެރެއަށް އެއްޗެއް ލައިގެން އާވިންވެސް ކައްކައެވެ. އަދި މިނޫން ގޮތްގޮތަށް ވެސް ތަރުކާރީ ފެނުކައްކާނެއެވެ.
ރާއްޖެއިން ފަސޭހަކަމާއިއެކުގައި ލިބޭ ތަރުކާރީގެ ތެރޭގައި ކޯލީ ފްލާ، ބްރޮކަލީ، ކެޓެކް، ކެބެޖް، ބީޓްރޫޓް، ބަރަބޯގެ ބާވަތްތަކާއި އަލުވި ފާހަގަ ކޮށްލެވެއެވެ. އަދި ހަމަ އެއާއެކު ކައްޓަލައިގެ ބާވަތްތައް ވެސް ފަސޭހަކަމާއެކު ރާއްޖެއިން ލިބެއެވެ. ތަރުކާރީގެ އިތުރުން ފަލަމަޑިއަށް ނިސްބަތްވާ ކައްޓަލައިގެ ބާވަތްތަކަކީ ވެސް މަޑުކޮށްގެން ބޭނުން ކުރެވޭ އެއްޗެކެވެ.
ތަރުކާރީ މަޑުކުރާއިރުގައި އެ މަޑުކުރުމަށް ހިޔާރު ކުރާ ގޮތަކުން ތަރުކާރީން ހަށިގަނޑަށް ލިބޭ ފައިދާއަށް ބަދަލުއަންނަކަން އެންގޭހެއްޔެވެ؟ އާނއެކެވެ. ތަރުކާރީ ކެއްކޭ ގޮތުން ފައިދާއަށް ވަރަށް ބޮޑު ބަދަލު އާދެއެވެ. އެހެންވަނީ ކެއްކުމުގައި ބޭނުން ކުރާ ތަފާތު ގޮތްތަކުން ތަރުކާރީއަށް ލިބޭ ހޫނުމިން ތަފާތުވުމުގެ ސަބަބުންނެވެ.
ޔުނިވަރސިޓީ އޮފް ޕާރމާއިން ވަނީ ތަރުކާރީ ކެއްކުމަށް ބޭނުންކުރެވޭ ތަފާތު ގޮތްތަކުގެ ސަބަބުން ހަށިގަނޑަށް ލިބެންޖެހޭ މާއްދާތައް އަދި އޭގެ ސަބަބުން ތަރުކާރީއަށް އަންނަ ބަދަލުތައް ދެނެގަތުމަށްޓަކައި ދިރާސާއެއް ހަދާފައެވެ. މިދިރާސާގައި ކެއްކުމަށް ބޭނުންކޮށްފައިވަނީ ތިން ގޮތެކެވެ. އެއީ ފެނުކެއްކުމާއި، ތެލުލުމާއި، އަދި އާވިން ކެއްކުމެވެ.
މި ދިރާސާގައި ބޭނުންކުރީ ކެރެޓް އާއި ބްރޮކޮލީއެވެ. މިދިރާސާއިން ދައްކާގޮތުގައި ކެއްކުމުގައި ބޭނުންކޮށްފައިވާ ތަފާތު ގޮތްތަކުގެ ތެރެއިން ކެރެޓް ފެނުކެއްކުމުން މާ ބޮޑަށް މަޑުވެއެވެ. އެއާއެކު ކެރެޓް ފެނު ކެއްކުމުން އިންސާނާގެ ހަށިގަނޑަށް ލިބެން ޖެހޭ ގިނަ މާއްދާތައް ލިބުމަށް ހުރަސް އެޅެއެވެ. އެހެން ވަނީ ކެރެޓްގައި ހިމެނޭ ހަށިގަނޑަށް ފައިދާ ކުރަނިވި ގިނަ މާއްދާތަކެއް ފެނުގެ ތެރެއަށް ގިރިގެންދާތީ ކަމަށް ދިރާސާކުރާ ފަރާތްތަކުން ވަނީ ބުނެފައެވެ. ބްރޮކޮލީ ފެނުގެ ތެރޭގައި ކެއްކުމުން އޭގެ ތެރެއަށް ފެންގަނޑު ވަދެ ސޮގީވާގޮތް ވެސްވެއެވެ.
އާވިން ތަރުކާރީ ކެއްކުމުން އޭގައި ހިމެނޭ ޤުދުރަތީ މާއްދާއެއް ކަމަށްވާ "ގްލުކޮސިނޮލޭޓްސް" ހުންނަ މިންވަރު ބަދަލު ވިޔަނުދީ ހިފަހައްޓައި ދެއެވެ. ތަރުކާރީގައި ހިމެނޭ ގްލުކޮސިނޮލޭޓްސް އަކީ އެންޓިބަޔޮޓިކްސް ފަދައިން ހަށިގަނޑުގައި ހުންނަ ބެކްޓީރިއާ، ވައިރަސް އަދި ފަންގައި ނެތިކޮށްލުމަށް އެހީތެރިވާ މާއްދާއެކެވެ.
