ޑިވެލޮޕްމަންޓް ބޭންކެއް ރާއްޖޭގައި ޤާއިމު ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މިހާރު އެ ބޭންކަށް ސީއީއޯއަކާއި ޗެއަރމަންއެއްވެސް ވަނީ ހަމަޖައްސަވާފައެވެ.
މޯލްޑިވްސް ޑިވެލޮޕްމަންޓް ބޭންކް ހުޅުވުމުން ރާއްޖޭގެ މާލީ ދާއިރާއަށާއި ތަރައްޤީގެ އެހެނިހެން ދާއިރާތަކަށްވެސް ވަރަށްބޮޑު ކުރިއެރުމެއް ލިބޭނެކަމަށް ރައީސުލްޖުމްހޫރިއްޔާވަނީ ވިދާޅުވެފައެވެ.
ރާއްޖެއަށް ކުރިމަތިވެފައިވާ އެންމެ ބޮޑު މައްސަަލައަކީ މަޝްރޫޢަށް ފައިސާ ހޯދުމުގެ ދަތިކަންކަމަށާއި، އެހެންކަމުން މޯލްޑިވްސް ޑިވެލޮޕްމަންޓް ބޭންކް އުފެއްދެވުމުގެ މަސައްކަތް ފެއްޓެވީ މި ބޭނުންފުޅުގައިކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މި ބެންކް ވެގެންދާނީ ޑިޖިޓަލް އިނޮވޭޝަން، ދެމެހެއްޓެނިވި ތަރައްޤީ، އިޤްތިޞާދީ އަދި އިޖްތިމާޢީ ތަރައްޤީގެ މަޝްރޫޢުތަކަށް ފައިނޭންސްކުރާ ބެންކެއްކަމުގައި އެމަނިކުފާނު ވަނީ ވިދާޅުވެފައެވެ.
ރާއްޖޭގައި ޤާއިމުކުރާ ޑިވެލޮޕްމަންޓް ބޭންކް ހުޅުވަން ތައްޔާރުކުރާ ޢިމާރާތުގެ މަސައްކަތް ކުރިއަށްދާގޮތް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސަޢީދު ވަނީ ބައްލަވާލައްވާފައެވެ.
މޯލްޑިވްސް ޑިވެލޮޕްމަންޓް ބޭންކް ޤާއިމުކުރަނީ ޗާންދަނީ މަގާއި އަމީރު އަޙްމަދު މަގު ގުޅޭ ހަތަރުއަނގޮޅީގައި ހުންނަ އެލައިޑް ބިލްޑިންގެ ތިރީ ބުރީގައެވެ.
އެލައިޑް ބިލްޑިންގުގައި މޯލްޑިވްސް ޑިވެލޮޕްމަންޓް ބޭންކް ޤާއިމު ކުރުމަށް ބޭނުންވާގޮތަށް ތަން ތައްޔާރުކުމުގެ މަސައްކަތް ކުރަނީ އެމް.ޓީ.ސީ.ސީއާ ޙަވާލުކޮށްގެންނެވެ. ސަރުކާރުގެ އަމާޒަކީ މިއަހަރުގެ ތެރޭގައި މި ބޭންކު ހުޅުވައި ޚިދުމަތްދޭން ފެށުމެވެ.
މޯލްޑިވްސް ޑިވެލޮޕްމަންޓް ބޭންކު، އުފެއްދުމަށް ލައިސަންސް ހޯދުމަށް އެދި މޯލްޑިވްސް މަނިޓަރީ އޮޓޯރިޓީ، އެމްއެމްއޭއަށް މިހާރު ވަނީ ހުށައަޅާފައެވެ.
