މީހަކު ހެޔޮކަމަކަށް ނިއްޔަތުގަނެފައި، އަދި އޭނާއަށް ވީވަރަކުން އެކަމެއް ކޮށްފައި، އޭނާއަށް އެކަން ފުރިހަމަނުވީނަމަވެސް، އެކަން ކުރި މީހާއަށް ލިބޭ އަޖްރު އޭނާއަށް ލިބެއެވެ.
ޝައިޚު އަލް-އިސްލާމް އިބްނު ތައިމިއްޔަތު (728ހ.) ވިދާޅުވިއެވެ:
«ހަމަކަށަވަރުން މީހަކު ހެޔޮކަމަކަށް ނިއްޔަތުގަނެފައި، އަދި އޭނާއަށް އެކަމަށް ކުޅަދާނަކަން ލިބުނު މިންވަރަކަށް އެކަމަށް ޢަމަލުކޮށްފައި، އަދި އޭނާއަށް އެކަން ފުރިހަމަކުރުމަށް ކުޅަދާނަ ނުވެއްޖެނަމަ، އެޢަމަލު (ފުރިހަމަކޮށް) ކުރިމީހަާއަށް ލިބޭ އަޖްރު އޭނާއަށް ހުއްޓެވެ.
އެއީ ދެ ޞަޙީޙު [ޞަޙީޙު އަލް-ބުޚާރީ އަދި ޞަޙީހު މުސްލިމް] ގައި ވާ ފަދައިންނެވެ. ނަބިއްޔު ﷺ ގެ އަރިހުން ވެއެވެ: (ތަބޫކު ހަނގުރާމައަށް ފަހުގައި، މަދީނަތުއަށް އެނބުރި ވަޑައިންނަވަމުން، މަދީނަތުއާ އަރައި ހަމަވެއްޖައުމުން، ނަބިއްޔު ﷺ ޙަދީޘް ކުރެއްވިއެވެ:) "ހަމަކަށަވަރުން މަދީނަތުގައި ބަޔަކުވެއެވެ. އެބައިމީހުން ރާސްތާއެއް ހުރަސް ނުކުރެތެވެ. އަދި އެބައިމީހުން ވާދީއެއް ކަޑައްތު ނުކުރެތެވެ. އެހެނެއްކަމަކު އެބައިމީހުން ތިޔަބައިމީހުންނާ އެކުގައި ނޫނީ ނުވެއެވެ."
އެބޭކަލުން ވިދާޅުވިއެވެ: އޭ ﷲ ގެ ރަސޫލުއެވެ. އަދި އެބައިމީހުން މަދީނަތުގައި ވަނިކޮށް ހެއްޔެވެ؟
އެކަލޭގެފާނު ޙަދީޘްކުރެއްވިއެވެ: "އަދި އެބައިމީހުން މަދީނަތުގައި ވަނިކޮށެވެ. ޢުޛްރުވެރިވުމުގެ ސަބަބުން، ނުވަތަ ޢުޛްރުން އެބައިމީހުން ހިފެހެއްޓި ހައްޔަރުވީއެވެ."
[صحيح البخاري: ٢٨٣٩، ٤٤٢٣، صحيح مسلم: ١٩١١]»
[مجموع الفتاوى لابن تيمية: ٢٢/٢٤٣]
