ބޮލީވުޑްގެ އެކްޓްރެސް ޖާންވީ ކަޕޫރްގެ ސިޔާސީ ފިލްމު "އުލަޖް" ނެޓްފްލިކްސް އިން ސްޓްރީމްކުރަން ފަށައިފިއެވެ.
އޮގަސްޓް 2 ގައި ސިނަމާތަކަށް ގެނައި މި ފިލްމުގައި ޖާންވީ ކުޅެފައި ވަނީ އިންޑިއާ އިން އިނގިރޭސިވިލާތުގެ އެމްބަސީ އަށް އައްޔަންކުރާ ޑެޕިއުޓީ އެމްބަސެޑަރެއްގެ ރޯލެވެ. މި ފިލްމް އަކީ ޖާންވީ އާއި އެކުގައި ހުސް ފިރިހެން ތަރިންތަކެއް ފެނިގެންދާ ފިލްމްއެކެވެ.
މީ ޖާންވީގެ ކެރިއަރުގައި މިފަދަ ރޯލަކުން ފެނިގެންދާ ފުރަތަމަ ފަހަރެވެ. މި ފިލްމް ބެލި މީހުން ވަނީ ފިލްމްގައި އެކްޓްކޮށްފައިވާ ތަރިންގެ އެކްޓިންގެ ހުނަރަށް ސާބަހާއި އައްސަރިބަސް ދީފައިއެވެ. އަދި ޖާންވީ ގެ އެކްޓިން ފުރުހަމަ ކަމަށް ބެލުންތެރިން ވަނީ ތައުރީފްކޮށްފައިއެވެ.
ޖާންވީ އާއި އެކުގައި މި ފިލްމްގެ ލީޑުން ފެނިގެން ދަނީ މާ މަޝްހޫރު ނޫން އެކްޓަރުން ކަމުގައިވާ ގުލްޝަން ދެވިއާ އާއި ރޯޝަން މެތިއު އެވެ. މިފިލްމް ގެ ކާސްޓުގައި މިޔަންގް ޗަންގް، ސަޗިން ކެޑޭކަރް، ރާޖަންދުރަ ގުޕްތާ އަދި ޖިތެންދުރަ ޖޯޝީ ވެސް ހިމެނެއެވެ.
ޖަންގްލީ ޕިކްޗާސް އިން ޕްރޮޑިއުސްކުރި މި ފިލްމަކީ މާ ކާމިޔާބު ފިލްމްއެއް ނޫނެވެ. ޖަންގްލީ ޕިކްޗާސް އިން މީގެ ކުރިން ވަނީ ކާމިޔާބު އެތަށް ފިލްމް އެއް ގެނެސްދީފައިއެވެ. އެގޮތުން ރާޒީ" ފަހަގަ ކޮށްލެވެއެވެ. މި ފިލްމްގެ ޑައިރެކްޓަރަކީ ނޭޝަނަލް އެވޯޑް ހާސިލްކޮށްފައިވާ ސުދާންޝޫ ސާރިއާ އެވެ.
