ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) 20 އަހަރުން ދަށުގެ ވޮލީބޯލް ޗެމްޕިއަންޝިޕް 2024 ގައި ވާދަކުރާ ރާއްޖޭގެ ޒުވާން ގައުމީ ފިރިހެން ވޮލީބޯޅަ ޓީމަށް ޖާޒީ ހަވާލުކޮށްފިއެވެ.
ސްރީ ލަންކާގައި އޮންނަ މި މުބާރާތުގައި ހަ ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން މުބާރާތް ބާއްވާ ލަންކާ އާއި، އުޒްބެކިސްތާނާއި، ކިރްގިސްތާނާއި، ނޭޕާލް އަދި ތުރުކުމެނިސްތާނެވެ. މުބާރާތް ކުރިއަށްދާނީ އަންނަ އޮކްޓޯބަރު މަހުގެ 6-12 އަށް ކޮލޮމްބޯގެ ސުގަތަދާސަ އިންޑޯ ސްޓޭޑިއަމުގައެވެ.
ރާއްޖޭގެ ޒުވާން ގައުމީ ފިރިހެން ވޮލީބޯޅަ ޓީމަށް ޖާޒީ ހަވާލުކުރުމަށް ޒުވާނުންގެ މަރުކަޒުގެ ހަރުގޭގައި ރޭ ބޭއްވި ހާއްސަ ހަފުލާގައި ޖާޒީ ހަވާލުކޮށްދެއްވީ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އަދި ކާވާގެ ރައީސް މުޙައްމަދު ލަތީފް އާއި، ޖެނެރަލް ސެކްރެޓަރީ މުޙައްމަދު ސަޢީދެވެ.
މި މުބާރާތް ކުރިއަށް ގެންދިޔުމަށް ހަމަޖެހިފައިވަނީ ލީގު އުސޫލުންނެވެ.
ލީގު ބުރުގައި ކޮންމެ ޓީމެއް ކޮންމެ ޓީމަކާ ބައްދަލުކުރާއިރު، އެއްވަނަ އާއި ދެވަނަ ހޯދާ ޓީމުތައް ފައިނަލަށް ދަތުރުކުރާނެއެވެ. އަދި ތިންވަނަ އާއި ހަތަރުވަނައިގެ މެދުގައި ލޯ މެޑެލް މެޗެއް ކުޅުމަށް ވަނީ ހަމަޖެހިފައެވެ.
