ތަޢުލީމީ ނިޒާމު ހަރުދަނާކޮށް ކިޔަވައިދިނުމުގެ ފެންވަރު ރަނގަޅު ކުރުމަށް ޓީޗަރުންގެ ދުޅަހެޔޮ ކަމަށް އިސްކަން ދޭންޖެހޭ ކަމަށް، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އަނބިކަނބަލުން މިހެން ވިދާޅުވީ، ޓީޗަރުންގެ ބައިނަލްއަޤްވާމީ 7 ވަނަ މާހީސިންތާ ފެށުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.
މި މަހާސިންތާ ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ވަނީ ރާއްޖޭގެ ތަޢުލީމީ ނިޒާމު ހަރުދަނާ ކުރުމަށް ގިނަ މަސައްކަތްތަކެއް ކުރަން ހުރިކަން ފާހަގަކުރައްވާފައެވެ.
އެގޮތުން، ތަޢުލީމީ ނިޒާމު ހަރުދަނާކޮށް ކިޔަވައިދިނުމުގެ ފެންވަރު ރަނގަޅު ކުރުމަށް ޓީޗަރުންގެ ދުޅަހެޔޮ ކަމަށް އިސްކަން ދޭންޖެހޭ ކަމަށް، ރައީސުލްޖުމްހޫރިއްޔާ އަނބިކަނބަލުން ވިދާޅުވިއެވެ.
ސަރުކާރުގެ ސިޔާސަތުގެ ތެރެއިން މަސައްކަތުގެ ވަގުތުކުޑަކޮށް އިދާރީ ގޮތުން ޓީޗަރުން ކުރަންޖެހޭ މަސައްކަތް ކުޑަކުރުމުން ކިޔަވައިދިނުމުގެ ފެންވަރު ރަނގަޅުވެގެންދާނެ ކަމަށް މެޑަމް ސާޖިދާ ވިދާޅުވިއެވެ.
ޓީޗަރުންގެ މާހާސިންތާގައި ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އަނބިކަނބަލުން ވަނީ ގޮންޖެހުންތައް ހައްލު ކުރުމަށް ދިރާސާތައް ކުރެވި އެ ދިރާސާތަކުގެ އަލީގައި ޚާއްސަ ފިޔަވަޅުތަކެއް އަޅަންޖެހޭކަން ފާހަގަކުރައްވާފައެވެ. އެގޮތުން ރާއްޖޭގެ ތަޢުލީމީ ނިޒާމަށް ޚާއްސަކޮށް ދިމާވާ ގޮންޖެހުންތަކަށް އިސްކަންދީ މިކަންކަން ހައްލުކުރެވިގެން ވަށާޖެހޭ ތަޢުލީމީ ނިޒާމެއް ޤައިމްކޮށް ހުރިހާ ދަރިވަރުންނަށް ހަމަހަމަކޮށް ތަޢުލީމު ފޯރުކޮށްދިނުމަށް މަގުފަހިވެގެންދާނެކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވިއެވެ.
ޓީޗަރުންގެ މަހާސިންތާއަކީ ކޮންމެ ދެ އަހަރަކުން އެއް އަހަރު ބާއްވަމުން އަންނަ މަހާސިންތާއެކެވެ. މިއަހަރު މަހާސިންތާ ދެދުވަހުގެ މުއްދަތައް ކުރިއަށްދާއިރު އޭލެވެލްއަށް ކިޔަވާ ދަރިވަރުން ހިމެނޭހެން މިއަހަރުގެ މަހާސިންތާގައި 248 ބައިވެރިން ބައިވެރިވެއެވެ.
