ސަޢުދި އަރަބީއްޔާގެ ވިޔަފާރިތަކަށް އާމާޒުކޮށްގެން، ރާއްޖޭގައި އިންވެސްޓަރ ފޯރަމެއް ބޭއްވުމަށް ނިންމާފައިވާ ކަަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
އިޤްތިޞާދީ ވަޒީރު ސަޢުދިީ ޢަރަބީއްޔާއަށް ކުރައްވަމުން ގެންދަވާ ދަތުރުފުޅަކީ، ދެ ޤައުމުގެ ދެމެދު ވިޔަފާރި ގުޅުން ބަދަހިކުރުމަށް ކުރަމުންދާ މަސައްކަތުގެ ތެރެއިން ކުރައްވާ ދަތުރުފުޅެކެވެ.
މި ދަތުރުފުޅުގެ ތެރެއިން އެ ޤައުމުގެ ކޮމާސް މިނިސްޓަރ އަދި ޖެނެރަލް އޮތޯރިޓީ އޮފް ފޮރިން ޓްރޭޑުގެ ބޯޑުގެ ޗެއަރމަން ޑރ. މާޖިދު ބިން ޢަބްދުﷲ އަލްޤަސަބީއާއި އިޤްތިޞާދީ ވަޒީރު ބައްދަލުކުރެއްވިއެވެ.
ދައުލަތުގެ މީޑިޔާ ޕީއެސްއެމް ނިއުސްއަށް މައުލޫމާތު ދެއްވަމުން އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު ވިދާޅުވީ މި ބައްދަލުވުމުގައި، ރާއްޖޭގެ ތަރައްޤީއަށް މިހާރު ހިންގަމުންދާ ތަރައްޤީގެ މަޝްރޫޢުތަށް ގާތުން ބައްލަވަމުން ގެންދަވާކަން އެޤައުމުގެ ވިޔަފާރިއާއި ބެހޭ ވަޒީރު ހާމަކުރައްވާފައިވާ ކަމަށެވެ. އެގޮތުން ގެދޮރުވެރިކަމާއި އިޤްތިޞާދު ސިންދަފާތު ކުރުމުގެ މަޝްރޫޢުތަކަށް އެޤައުމުން އިސްކަމެއްދޭކަމަށް އިޤްތިޞާދީ ވަޒީރު ވިދާޅުވިއެވެ.
ސައުދީން މި މަޝްރޫޢުތަކުގައި ވެވެން އޮތް އެހީތެރިކަމެއް ވެދެއްވާނެ ކަމުގެ ޔަޤީންކަން އެ ޤައުމުގެ ވިޔަފާރިއާއި ބެހޭ ވަޒީރު ދެއްވި ކަމަށް އިޤްތިޞާދީ ވަޒީރު ވިދާޅުވިއެވެ.
މި ބައްދަލުވުމަށް ފަހު ދެ ޤައުމުގެ ދެމެދު ވަނީ ވިޔަފާރިއާއި އިޤްތިޞާދީ ދާއިރާއިން ގުޅުން ހަރުދަނާ ކުރުމަށް ޚާއްޞަ ފަހުމުނާމާއެއްގައި ސޮއިކުރައްވާފައެވެ. މި ފަހުމުނާމާގެ ތެރެއިން ވަރަށް އަވަހަށް ރާއްޖޭގައި ވިޔަފާރިއަށް ޚާއްސަ ފޯރަމެއް ބާއްވާނެކަމަށް ވަޒީރު ވިދާޅުވިއެވެ.
