ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު އިންޑިއާގެ އާގްރާގައި ހުންނަ ތާޖް މަހަލަށް ޒިޔާރަތް ކުރައްވައިފިއެވެ.
ރައީސުލްޖުމްހޫރިއްޔާއާއި އެމަނިކުފާނުގެ އަނބިކަނބަލުން ވަނީ ތާޖްމަހަލަށް ވަޑައިގެން އެތަން ބައްލަވާލައްވާފައެވެ. ރައީސްގެ ދެކަނބަލުން ތާޖްމަހަލަށް ޒިޔާރަތް ކުރައްވާފައިވަނީ އިންޑިއާގެ ރައީސް ދުރޫޕަތީ މުރުމޫގެ ދަޢުވަތަކަށް އިންޑިއާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގައި މިއަދު ހެނދުނެވެ.
މި ދަތުރުފުޅުގައި އިންޑިއާގެ އިތުރު ސިޓީތަކަށްވެސް ޒިޔާރަތް ކުރެއްވުމަށް ހަމަޖެހިފައިވެއެވެ.
Experiencing the beauty of 🇮🇳’s art and heritage.
President @MMuizzu of Maldives accompanied by First Lady visited the majestic @TajMahal. pic.twitter.com/LJqcWahAQs
— Randhir Jaiswal (@MEAIndia) October 8, 2024
ތާޖް މަހަލަކީ އިންޑިއާގެ އާގްރާގައި 17 ވަނަ ޤަރުނުގައި އިމާރާތް ކުރި ބިނާއެކެވެ. މި ބިނާއަކީ މަޝްހޫރު މޫގަލް އެމްޕެރަރ ޝާހް ޖަހާން އޭނާގެ އަނބިކަނބަލުން މުމްތާޒްގެ ހަނދާނުގައި ބިނާ ކުރެއްވި ގަނޑުވަރެކެވެ. އދ ގެ ޔުނެސްކޯއިން ވަނީ ތާޖް މަހަލްއަކީ ވޯލްޑް ހެރިޓޭޖް ސައިޓެއްގެ ގޮތުގައިވެސް ކަނޑައަޅާފައެވެ.
ދުނިޔޭގެ ހަތް އަޖައިބުގެ ތެރޭގައި ހިމެނޭ ތާޖް މަހަލަކީ ދިވެހިންގެ މެދުގައިވެސް ވަރަށް މަޤްބޫލު މަންޒިލެކެވެ. ޚާއްސަކޮށް، ޗުއްޓީ ބަންދުގައި ތާޖް މަހަލަށް ގިނަ އަދަދަކަށް ދިވެހިންވެސް ޒިޔާރަތް ކުރެއެވެ. މިތަނަކީ ފަތުރުވެރިންނާއި ދުނިޔޭގެ އެކި މީހުންގެ މެދުގައި މަޤުބޫލު ބިނާއެކެވެ. މި ބިނާއަށް ޒިޔާރަތް ކުރުމުގެ ފުރުޞަތު ނިއުދިއްލާއަށް ވަޑައިގަންނަވާ ހުރިހާ ލީޑަރުންނަށްވެސް އިންޑިއާ ސަރުކާރުން ދެއްވައެވެ.
