މާފަރު އިންޓަރނޭޝަނަލް އެއަރޕޯޓުގެ ރަންވޭ ބޮޑުކުރުމުގެ މަސައްކަތް ނިންމާލުމަށްފަހު، އެއަރޕޯޓު ބައިނަލްއަޤްވާމީ ދަތުރުތަކަށް އަލުން ހުޅުވާލައިފިއެވެ. މިދިޔަ މެއި މަހުގެ ތެރޭގައި ރަންވޭ ބޮޑުކުރުމުގެ މަސައްކަތަށްޓަކައި ބައިނަލްއަޤްވާމީ ދަތުރުތައް މެދުކަނޑާލުމަށްފަހު، މިހާރު އަލުން އެ ދަތުރުތައް ފަށައިފިއެވެ.
މާފަރު އިންޓަރނޭޝަނަލް އެއަރޕޯޓް މެނޭޖްކުރާ އައިލެންޑު އޭވިއޭޝަނުން މަޢުލޫމާތު ދެއްވާފައިވާ ގޮތުގައި، ޖަނަވަރީ 10 ވަނަ ދުވަހާ ހަމައަށް 100 ޕްރައިވެޓު ޖެޓު އެއަރޕޯޓަށް ޖައްސާނެކަމަށް ލަފާކުރެވެއެވެ. މިއީ އެއަރޕޯޓު އަލުން ހުޅުވާލުމާއެކު ލިބޭ ބޮޑު ކުރިއެރުމެކެވެ.
2019 ވަނަ އަހަރުގެ ފަހުކޮޅު ހުޅުވުނު މާފަރު އެއަރޕޯޓު، ބައިނަލްއަޤްވާމީ އެއަރޕޯޓެއްގެ ގޮތުގައި ބޭނުންކުރަން ފެށީ 2020 ވަނަ އަހަރުގެ ޖުލައި މަހުގެ 1 ވަނަ ދުވަހުއެވެ. އޭގެފަހުން މިއަދާ ހަމައަށް، މާފަރު އެއަރޕޯޓަކީ ޕްރައިވެޓު ޖެޓުތަކުގެ ޖެއްސުމަށް މަޤްބޫލު އެއަރޕޯޓެކެވެ.
ރަންވޭ ބޮޑުކުރުމުގެ މަސައްކަތުގެ ދަށުން، ރަންވޭއަށް 650 މީޓަރު އިތުރުކޮށް، ރަންވޭގެ ޖުމްލަ ދިގުމިން 2800 މީޓަރަށް ވަނީ އިތުރުކޮށްފައެވެ. މި ބަދަލާއެކު، ބައިނަލްއަޤްވާމީ އުދުހުންތަކުގައި ބޭނުންކުރާ ބޮއިންގ 777 މާކާގެ މަތިންދާބޯޓުތަކަށްވެސް މިހާރު މާފަރު އެއަރޕޯޓުގެ ރަންވޭއަށް ޖެއްސޭނެއެވެ.
މީގެ އިތުރުން، އެއަރޕޯޓު އިތުރަށް ތަރައްޤީކުރުމުގެ މަޝްރޫޢުގެ ދަށުން އޭޕްރަން ބޮޑުކުރުމުގެ މަސައްކަތްވެސް ދަނީ ކުރިއަށެވެ. މި މަސައްކަތް ނިމުމުން އެއްފަހަރާ 26 ޖެޓު ޕާކުކުރެވޭނެއެވެ. މިހާރު ޕާކުކުރެވެނީ 13 ޖެޓެވެ. އަދި 2 ޓެކްސީވޭ ތަރައްޤީކުރުމުގެ މަސައްކަތްވެސް ދަނީ ކުރިއަށެވެ.
މާފަރު އެއަރޕޯޓުގެ މި ތަރައްޤީއާއެކު، ނ. އަތޮޅު، ރ. އަތޮޅު އަދި ބ. އަތޮޅުގައި ހުރި މަތީ ފަންތީގެ ރިސޯޓުތަކަށް އަންނަ ފަތުރުވެރިންނަށް އިތުރު ފަސޭހަތަކެއް ލިބިގެންދާނެއެވެ. މިދިޔަ އަހަރު މާފަރު އެއަރޕޯޓަށް 353 ޕްރައިވެޓު ޖެޓު ޖައްސާފައިވާއިރު، މިއީ 2022 ވަނަ އަހަރަށްވުރެ 125 ޖެޓުގެ އިތުރުވުމެކެވެ.
