2025 ވަނަ އަހަރަށް ލަފާކޮށް ހުށަހަޅާފައިވާ ދައުލަތުގެ ބަޖެޓަކީ ގެދޮރުވެރިކަމުގެ ރަން ޒަމާނެއްގެ ފެށުންކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެ އެވެ. 56.6 ބިލިއަން ރުފިޔާގެ މި ބަޖެޓު ރައްޔިތުންގެ މަޖިލީހަށް ހުށަހަޅުއްވަމުން ޒަމީރު ވިދާޅުވީ، މިއީ ދިވެހިރާއްޖޭގެ ތާރީޚުގައި އެއް އަހަރުދުވަހުގެ ތެރޭގައި ގެދޮރުވެރިކަމަށް ޚާއްޞަކޮށްގެން ސަރުކާރަކުން އެންމެ ބޮޑު ހޭދައެއް ކުރުމަށް ހުށަހަޅާފައިވާ ބަޖެޓެއް ކަމަށެވެ.
ޒަމީރު ވިދާޅުވި ގޮތުގައި، ރާއްޖޭގެ މާލީ ހާލަތު ދަށް ހިސާބަކަށް ވެއްޓިގެން ދިޔައީ ކުރީ ސަރުކާރުން ގެންގުޅެފައިވާ ދޯހަޅި ސިޔާސަތުތަކެއްގެ ސަބަބުންނެވެ. ނަމަވެސް، އެ ހާލަތުން އަރައިގަތުމަށް ސަރުކާރުގެ އިޤްތިޞާދީ އެޖެންޑާގެ ތެރެއިން ކުރެވޭ މަސައްކަތާއެކު، މި ބަޖެޓަކީ އުންމީދީ ވާހަކަތަކެއް ހުރި ބަޖެޓެއްކަމަށް އެމަނިކުފާނު ފާހަގަކުރެއްވިއެވެ.
މިނިސްޓަރ ޒަމީރު ވިދާޅުވީ، ދިވެހި ރައްޔިތުންނަށް ދިމާވެފައިވާ އިޖްތިމާޢީ މައްސަލަތަކުގެ ތެރެއިން އެންމެ އަވަސް ހައްލެއް ގެންނަން ޖެހިފައި ވަނީ ގެދޮރުވެރިކަމާއި ބޯހިޔާވަހިކަމުގެ ކަންބޮޑުވުންތަކަށް ކަމަށެވެ. އަދި ދިވެހިންގެ އާބާދީގެ ބޮޑު ބަޔަކީ ގެދޮރުވެރި ބަޔަކަށް ހެދުމަކީ ރައީސުލްޖުމްހޫރިއްޔާގެ އެއް ތަޞައްވުރުކަމަށާއި، 2025 ވަނަ އަހަރުގެ ބަޖެޓު އެކުލަވާލުމުގައި އެންމެ ބޮޑު އިސްކަމެއް ދީފައި ވަނީ ވެސް ރައީސުލްޖުމްހޫރިއްޔާގެ އެ ސިޔާސަތު ތަންފީޒު ކުރެވޭނެ ގޮތެއްގެ މަތީންކަމަށް އެމަނިކުފާނު ވިދާޅުވިއެވެ.
ބަޖެޓުގެ މުހިންމު ނުކުތާތަކުގެ ތެރޭގައި:
- 5% އިންޓްރެސްޓުގައި ގެދޮރުވެރިކަމުގެ ލޯނުތައް ދޫކުރުމަށް 1 ބިލިއަން ރުފިޔާ ހިމެނުން
- ރާއްޖޭގެ ބޭންކުތައް މެދުވެރިކޮށް މަދުވެގެން 2 ބިލިއަން ރުފިޔާ ހައުސިންގ ލޯނުގެ ގޮތުގައި ދޫކުރުން
- ގެދޮރުވެރިކަމުގެ އައު ޕީއެސްއައިޕީ މަޝްރޫޢުތައް ހިންގުމަށް 1.8 ބިލިއަން ރުފިޔާ ކަނޑައެޅުން
"މާތްﷲ ގެ ވާގިފުޅާއެކު 2025 ވަނަ އަހަރު ވެގެންދާނީ ގެދޮރުވެރިކަމުގެ ރަން ޒަމާނެއްގެ ފެށުމަށް. ވީމާ، 2025 ވަނަ އަހަރުގެ ބަޖެޓަކީ ހަޤީޤީ މާނައިގައިވެސް ގެދޮރުވެރިކަމުގެ ބަޖެޓެއް،" މިނިސްޓަރ ޒަމީރު ވިދާޅުވިއެވެ.
