ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސައްވުރު ކުރައްވަނީ ކެބިނެޓުން ފާސްކޮށްފައިވާ އިކޮނޮމިކް ރީފޯމް އެޖެންޑާ ތަންފީޒު ކުރުމުގެ ތެރެއިން ދިވެހި ރާއްޖޭގެ ޖީޑީޕީ 2028 ވަނަ އަހަރު 10 ބިލިއަން ޑޮލަރާ ހަމައަށް ގެންދިއުން ކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓު މަޖިލީހަށް ހުށަހަޅުއްވަމުން ޒަމީރު ވިދާޅުވީ، މިދިޔަ އަހަރުތަކުގައި އެއްވެސް ޒިންމާދާރުކަމެއް ނެތި މާލިއްޔަތު ގެންގުޅެފައިވާތީ މި ސަރުކާރުން ހުރިހާކަމެއް އަލުން ފަށަން ޖެހިފައިވާކަމަށެވެ.
ޒަމީރު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސައްވުރު ކުރައްވަނީ ކެބިނެޓުން ފާސްކޮށްފައިވާ އިކޮނޮމިކް ރީފޯމް އެޖެންޑާ ތަންފީޒު ކުރުމުގެ ތެރެއިން ދިވެހި ރާއްޖޭގެ ޖީޑީޕީ 2028 ވަނަ އަހަރު 10 ބިލިއަން ޑޮލަރާ ހަމައަށް ގެންދިއުން ކަމަށެވެ.
ސަރުކާރު ހިއްސާވާ ކުންފުނިތަކުގެ ހިންގުމަށް ބޮޑެތި ބަދަލުތައް އަންނަން ޖެހޭކަމަށާއި، އެސްއޯއީތައް ރީފޯމް ކުރުމުގެ މަސައްކަތް ވަރަށް ބޮޑަށް ލަސްވެފައިވާކަން ފާހަގަކުރައްވަމުން، ޒަމީރު ވިދާޅުވީ މީގެ އަހަރުތަކެއް ކުރިން ސަރުކާރު ހިއްސާވާ ކުންފުނިތައް އުފައްދާފައި ވަނީ ދައުލަތުގެ މާލިއްޔަތު ގަވައިދު ފަހަނަޅައި ގޮސް ހަރަދު ކުރުމަށްކަމަށެވެ.
ޒަމީރު ވިދާޅުވީ ސަރުކާރުން މަސައްކަތް ކުރަމުން ދަނީ ކުންފުނިތަކަކީ ޖަވާބުދާރީވާ ކުންފުނިތަކަކަށް ހަދައި، އެ ކުންފުންޏެއްގެ ޝެއާހޯލްޑަރުން އެންހޭންސް ކުރެވޭ ނިޒާމެއް ގެނައުމަށް ކަމަށެވެ. އެއް މަސައްކަތެއް ކުރާ ގިނަ ކުންފުނިތައް ވެސް ހުރުމާއިއެކު، ސަރުކާރުން އަންނަ އަހަރުގެ ބަޖެޓުގައި އެ ކުންފުނިތައް މާޖްކުރުން ހިމަނާފައިވާނެކަމަށް ޒަމީރު ވިދާޅުވިއެވެ.
އަންނަ އަހަރުގެ ބަޖެޓުގައި އާންމު ރައްޔިތުންނަށް ލިބެމުންދާ ގިނަ ހިދުމަތްތަކަށް ބަދަލު ގެނައުމަށް ސަރުކާރުން ނިންމާފައިވާކަމަށް ދެކެވޭ ވާހަކައަށް ޒަމީރު ވިދާޅުވީ ޕެންޝަން ނުވަތަ އުމުރުން ދުވަސްވީ ފަރާތްތަކުގެ އެލަވަންސް ކުޑަކޮށް ކަނޑާލުމަށް އެއްވެސް ވިސްނުމެއް ނެތްކަމަށެވެ. އެހެން ނަމަވެސް މަޝްވަރާ ކުރެވެމުން ދަނީ ނުވަތަ ހިޔާލަކީ ޑަބަލް ޕެންޝަނާއި އެކު މާބޮޑު އުސޫލެއް ނެތި އޮތް ނިޒާމު ރީފޯމް ކުރުންކަމުގައި ޒަމީރު ވިދާޅުވިއެވެ.
ބަޖެޓުގައި މުސާރައަށް ހިމަނާފައިވާ އަދަދު ބޮޑުކަމަށް ދައްކާކަމަށް ބުނެ، އެކަމަށް ބައެއް ފަރާތްތަކުން ވާހަަކަދައްކާތީ، އެކަމަށް ޒަމީރު ވިދާޅުވީ އެއީ ސިވިލްސާވިސްގެ މިހާރު ޕޭހާމަނައިޒް ނުކުރެވި ހުރި ހުރިހާ މުވައްޒަފުންނާއި ޖުޑިޑަރީގެ މުސާރަ އެއް ހަމަކުރުމުގެ ބައިކަމަށެވެ.
ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައި ވަނީ 56.6 ބިލިއަން ރުފިޔާގެ ބަޖެޓެކެވެ. އަންނަ އަހަރުގެ ބަޖެޓުގައި ހިމަނާފައި ހުރި ނިޒާމީ ބޮޑެތި ބަދަލުތަކުގައި އާސަންދަ ރީފޯމް ކުރުމާއި، ސަބްސިޑީގެ ނިޒާމަށް ގެންނަ ބަދަލުތައް ހިމެނެއެވެ.
