ބޭންކް އޮފް މޯލްޑިވްސް (ބީއެމްއެލް) ގެ މޮބައިލް އެޕާއި އިންޓަރނެޓް ބޭންކިންގ މެދުވެރިކޮށް ޚިދުމަތްތަކަށް އެދި ހުށަހެޅުމުގައި ކަސްޓަމަރުންނަށް އިތުރު ލުއިފަސޭހަކަމެއް ހޯދައިދިނުމަށްޓަކައި، އެ ބޭންކުގެ އޭއައި ޑިޖިޓަލް އެސިސްޓެންޓް "އާޔާ" (Aaya) އަށް މުހިންމު ބަދަލުތަކެއް ގެންނަން ފަށައިފިއެވެ.
ބީއެމްއެލްއިން ހާމަކުރި ގޮތުގައި، މި ބަދަލާއެކު "އާޔާ" މެދުވެރިކޮށް ކަސްޓަމަރުންގެ ސުވާލުތަކާއި ބޭނުންތަކަށް ވަގުތުން ހައްލު ލިބި، ޚިދުމަތްތަކަށް އެދި ހުށަހެޅުން ކުރިއަށްވުރެ ހަލުވިވެގެންދާނެއެވެ. އަދި ބޭނުންވެއްޖެ ހާލަތެއްގައި "އާޔާ" މެދުވެރިކޮށް ބޭންކުގެ މުވައްޒަފެއްގެ އެހީތެރިކަން ސީދާ ހޯދުމުގެ ފުރުޞަތު ވެސް ކަސްޓަމަރުންނަށް ލިބޭނެއެވެ.
ގެނެވުނު މުހިންމު ބަދަލުތައް:
-
މެސެޖިންގ ފީޗަރ ހުއްޓާލުން: ކުރިން މޮބައިލް އެޕާއި އިންޓަރނެޓް ބޭންކިންގގައި ބޭނުންކުރި މެސެޖިންގ ފީޗަރ މެދުވެރިކޮށް ޚިދުމަތްތަކަށް އެދި ހުށަހެޅުން މިހާރު ވަނީ މެދުކަނޑާލާފައެވެ.
-
ޚިދުމަތުގެ އަވަސްކަން: އޭއައި އެސިސްޓެންޓް މެދުވެރިކޮށް 24 ގަޑިއިރު ވަގުތުން ޚިދުމަތް ލިބޭނެ ގޮތް ވަނީ އިތުރަށް ހަރުދަނާކޮށްފައެވެ.
31 މެއި 2023 ގައި ފުރަތަމަ ތަޢާރަފުކުރި "އާޔާ" އަށް މިއައި ބަދަލަކީ، ޑިޖިޓަލް ބޭންކިންގ ޚިދުމަތްތައް އިތުރަށް ފުރިހަމަކޮށް، ކަސްޓަމަރުންނަށް އިތުބާރުހުރި ޚިދުމަތެއް ފޯރުކޮށްދިނުމަށް ބީއެމްއެލްއިން ކުރަމުންދާ މަސައްކަތުގެ ތެރެއިން އެޅި މުހިންމު ފިޔަވަޅެކެވެ.
