ފީފާގެ ރައީސް ޖިއާނީ އިންފަންޓީނޯގެ ވަގުތު ހަމަވެއްޖެ ކަމަށާއި، ފީފާ ހަލާކުނުކޮށް އޭނާ މަގާމުން ދުރުވާންޖެހޭ ކަމަށް ލަލީގާގެ ރައީސް ހަވިއޭ ޓެބާސް ގޮވާލައްވައިފިއެވެ.
އިޓަލީގެ ނޫހަކަށް ދެއްވި އިންޓަރވިއުއެއްގައި ޓެބާސް ވަނީ ފީފާއިން ދާދިފަހުން ނިންމާފައިވާ ބައެއް ނިންމުންތަކަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ވޯލްޑް ކަޕް މެޗުތަކުގެ ތެރެއިން ހައިޑްރޭޝަން ބްރޭކް ދިނުމާއި، ފައިނަލް މެޗުގެ ހާފްޓައިމް ވަގުތު ދިގުކުރުމުގެ އިތުރުން، އެމެރިކާގެ ބަލޮގަންއަށް ދެއްކި ރަތްކާޑު ސަސްޕެންޑްކޮށް ޖެހިގެން އައި މެޗުގައި ކުޅެން ފުރުޞަތު ދިނުން ފަދަ ކަންކަން އޭނާ ފާހަގަކުރެއްވިއެވެ.
ލަލީގާގެ ރައީސް ފާހަގަކުރެއްވި މުހިންމު ނުކާތައް:
-
ޓީމުތައް އިތުރުކުރުން: 2034 ވަނަ އަހަރުގެ ވޯލްޑް ކަޕްގައި 64 ޓީމަށް ފުރުޞަތު ދޭން ނިންމި ނިންމުމަކީ ހަމަޖެހޭ ކަމެއް ނޫން ކަމަށް ވިދާޅުވި.
-
އިސްތިއުފާ ދިނުން: އިންފަންޓީނޯ އިސްތިއުފާ ދޭންޖެހޭތޯ ސީދާ ކުރި ސުވާލަށް ޖަވާބު ދެއްވަމުން ޓެބާސް ވިދާޅުވީ "އާ، އޭނާގެ ވަގުތު ހަމަވެއްޖެ" ކަމަށް.
-
އާންމުންގެ ނުރުހުން: ނިމިގެންދިޔަ ވޯލްޑް ކަޕްގެ ތެރޭގައި އެމެރިކާއިން އިވުނީ އިންފަންޓީނޯގެ ނިންމުންތަކާ ދެކޮޅު އަޑުތައް ކަމަށް ފާހަގަކުރެއްވި.
އިންފަންޓީނޯއާ ދެކޮޅަށް ނުކުންނާނެ އިދިކޮޅު ކެންޑިޑޭޓެއް މިވަގުތު ފެންނަން ނެތުމުން، އޭނާ އަމިއްލައަށް އިސްތިއުފާ ދެއްވާނެ ކަމަށް ގަބޫލުނުކުރެވޭ ކަމަށް ވެސް ލަލީގާގެ ރައީސް ވިދާޅުވިއެވެ.
