ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދަށުން ދެން ކުރިއަށްދާނީ އެމްޕީއެލް ސަރަޙައްދުން ފެށިގެން ސުނާމީ ބިނާ މައިޒާނާ ހަމައަށް އޮންނަ ބައިގެ މަސައްކަތް ކަމަށާއި، މުޅި މަޝްރޫޢުގެ މަސައްކަތް އަންނަ ނޮވެންބަރު މަހަށް ނިންމާލެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، މަގު ތަރައްޤީކުރުމުގެ މަޝްރޫޢުގެ ތެރެއިން ދެން ތަރައްޤީކުރާނީ އެމްޕީއެލް ސަރަހައްދުން ފެށިގެން ސުނާމީ ބިނާ މައިޒާނާއި ހަމައަށް އޮންނަ ސަރަޙައްދުކަމަށެވެ.
Some of the works included in the next phase of development of Male north side Boduthakurufaanu Magu and harbour area development plan: these works and the remainder of the Ring Road (from MPL area upto Tsunami Binaa Maizaan) will be completed before end of November 2026 in sha… pic.twitter.com/Kh5Ly8ECm6
— Dr Mohamed Muizzu (@MMuizzu) July 25, 2026
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސް މިހެން ދެންނެވިއިރު، އިމާރާތްކުރުމާ ބެހޭ ވުޒާރާއިން ވަނީ އެ ސަރަޙައްދުގެ މަގު ހެދުމުގެ އަމަލީ މަސައްކަތް ވަރަށް އަވަހަށް ފެށޭނެ ކަމަށާއި، މަސައްކަތް ނިންމައި ނޮވެންބަރު މަހު އާންމުންނަށް ހުޅުވާލެވޭނެ ކަމަށް ބުނެފައެވެ.
މި މަޝްރޫޢުގެ ދަށުން މިހާރު ވަނީ ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް އޮންނަ ސަރަޙައްދު ތަރައްޤީކޮށްފައެވެ. އެގޮތުން، ފަޅުން ބައެއް ހިއްކައިގެން މަގު 4 ލޭނަށް ފުޅާކޮށް، 1.145 ކިލޯމީޓަރުގެ ސަރަޙައްދެއްގައި ތާރުއަޅައި، ދުވާރާއި ފެންހިންދާ ނިޒާމުގެ އިތުރުން 500 ސައިކަލުގެ ޖާގައިގެ ޕާކިންގ ޒޯނެއް ވަނީ ޤާއިމުކޮށްފައެވެ.
