ޔުއެފާ ޗެމްޕިއަންސް ލީގުގައި އަންގާރަދުވަހުގެ ރޭ ޕީއެސްޖީ އަދި ބަޔާން މިއުނިކް ކުޅުނުމެޗުގައި ޕީއެސްޖީގެ މޮރޮކޯ ޑިފެންޑަރު އަޝްރަފް ހަކީމީގެ ފަޔަށް ލިބުނު އަނިޔާގެ ސަބަބުން އޭނާއަށް އަންނަ މަހު ފަށާ އެފްރިކަން ކަޕް އޮފް ނޭޝަންސް ގައި ނުކުޅެވިދާނެ ކަމުގެ ބިރު ބޮޑުވެއްޖެއެވެ.
މެޑިކަލް ޓެސްޓުތައް ދައްކާ ގޮތުގައި އޭނާގެ ވާތު ފައިގެ ކުޑަހުޅަށް ވަނީ ބޮޑަށް ސްޕްރެއިން ވެފައެވެ. މީގެ ތެރޭގައި ފެމޯރަލް ސިންޑެސްމޯސިސް އާއި ޑެލްޓޮއިޑް ލިގަމެންޓްތަކަށް ބައެއް ގެއްލުން ވެސް ހިމެނެއެވެ. ސާޖަރީއެއް ނުކުރާނެކަމަށް ޕީއެސްޖީން ކަށަވަރުކޮށްދީފައި ނަމަވެސް، ރިކަވަރީ ވާނެކަމަށް ލަފާކުރެވޭ މުއްދަތުގެ ސަބަބުން، މި އަހަރުގެ ޑިސެމްބަރު 21 ގައި މޮރޮކޯގައި ފެށުމަށް ހަމަޖެހިފައިވާ އެފްރިކާ ކަޕް އޮފް ނޭޝަންސްގައި އޭނާ ބައިވެރިވުމާ މެދު ވަނީ ސުވާލު އުފެދިފައެވެ.
ބިރުވެރިކަން އިތުރުވަމުން ދިޔަ ނަމަވެސް، މޮރޮކޯގެ ކޯޗު ރެގްރަގީ ވަނީ އެ ހާލަތު ބަދަލުކުރުމަށް އަވަހަށް މަސައްކަތް ފަށާފައެވެ. އަނިޔާވީތާ ދެ ދުވަސް ފަހުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އޭނާ ވަނީ ސަޕޯޓަރުންނަށް ޔަގީންކަން ދެއްވާފައެވެ: "އަޝްރަފް ހަކީމީއަކީ އަބަދުވެސް އަހަރެންގެ ލިސްޓުން ފުރަތަމަ ހޮވާ ކުޅުންތެރިޔާ. އަހަރެން ވަރަށް ބޮޑަށް ގަބޫލުކުރަން އޭނާއަކީ އެހެން ކުޅުންތެރިންނަށް ވުރެ އަވަހަށް ރިކަވަރީ ވާނެ ކުޅުންތެރިއެއްކަން. އަޝްރަފް އޭއެފްކޮންއަށް ހާޒިރުވުމަށް ކުރެވެން ހުރި ހުރިހާ ކަމެއް ކުރާނެ. އަހަރެމެން އޭނާއަށް އެހީތެރިވާނަން. އަޝްރަފް އޭއެފްކޮންއަށް 100% ފިޓްކޮށް އަނބުރާ އައުމަށް އެންމެ ރަނގަޅު މެޑިކަލް ޕްރޮޓޮކޯލް ތަންފީޒު ކުރާނަން."
2016 ވަނަ އަހަރު ސީނިއަރ ޑެބިއު ކުރި ފަހުން، ހަކީމީ ވަނީ ފަހުގެ ތާރީޙުގައި މޮރޮކޯގެ ފުޓްބޯޅައިގެ ކުރިއެރުމުގެ މައިގަނޑު ރޯލަށް ވެފައެވެ. ރެއަލް މެޑްރިޑްގެ އެކަޑަމީން ފެށިގެން ބޮރޫސިއާ ޑޯޓްމުންޑް، އިންޓަރ އަދި މިހާރު ޕީއެސްޖީއާ ހަމައަށް އޭނާ ވަނީ އޭނާގެ ހުނަރުގެ ސަބަބުން ދުނިޔޭގެ އެންމެ ބިރުވެރި ފުލް-ބެކުންގެ ތެރެއިން އެކަކަށް ބަދަލުވެފައެވެ. 2022 ވަނަ އަހަރުގެ ވޯލްޑް ކަޕްގައި، މޮރޮކޯގެ ތާރީޚީ ސެމީ-ފައިނަލް ދަތުރުގައި ހަކީމީ ވަނީ ކޮންމެ މިނިޓެއްގައި ކުޅެފައެވެ. ސްޕެއިންއާ ދެކޮޅަށް އޭނާ ޖެހި ހިތްވަރުގަދަ ޕަނެންކާ ޕެނަލްޓީ ވެގެން ދިޔައީ މޮރޮކޯގެ ރަމްޒަކަށެވެ. އެފަހުން، އޭނާ ވަނީ ގައުމީ ޓީމުގެ ކެޕްޓަންކަން 15 މެޗުގައި ކޮށް، 2026 ވަނަ އަހަރުގެ ވޯލްޑް ކަޕް ކޮލިފައިންގ މެޗުތަކުގެ ފުރިހަމަ ފެށުމަކަށް ޓީމު ގެންގޮސްދީ، އަދި 2025 ވަނަ އަހަރުގެ ބެލޮން ޑޯގައި ހަވަނަ މަޤާމު ހޯދާފައެވެ. މިއީ މޮރޮކޯގެ ކުޅުންތެރިއަކު މިހާތަނަށް ހޯދި އެންމެ މަތީ މަޤާމެވެ.
