އިރާނުގެ ރިވޮލިއުޝަނަރީ ގާޑުން އެމެރިކާ އާއި އިސްރާއީލުގެ ޔުނިވަރސިޓީތަކަށް އަމާޒުކޮށް ވަރުގަދަ އިންޒާރެއް ނެރެފިއެވެ. އެ ޖަމާއަތުން ނެރުނު ބަޔާނެއްގައި ބުނެފައިވަނީ، އިރާނުގެ ޔުނިވަރސިޓީތަކަށް ދީފައިވާ ހަމަލާތަކާ ގުޅިގެން، އެމެރިކާ އާއި އިސްރާއީލުގެ ޔުނިވަރސިޓީތަކަކީ މިހާރު ހަމަލާދިނުމަށް ކަނޑައެޅިފައިވާ ޝަރުއީ އަމާޒުތަކެއް ކަމަށެވެ.
މި ބަޔާނުގައި އިރާނުގެ ރިވޮލިއުޝަނަރީ ގާޑުން ވަނީ، އިރާނުގެ ތައުލީމީ މުއައްސަސާތަކަށް ދެމުންދާ ހަމަލާތަކަކީ ބަލައިގަނެވޭނެ ކަމެއް ނޫން ކަމަށް ބުނެފައެވެ. އަދި އޭގެ ބަދަލުހިފުމުގެ ގޮތުން، އެމެރިކާ އާއި އިސްރާއީލުގެ މަތީ ތައުލީމުދޭ މަރުކަޒުތަކަށް އަމާޒުކޮށް ހަމަލާދިނުމުގެ ފުރުސަތު އޮތް ކަމަށް ވެސް އެ ބަޔާނުގައި އިޝާރާތްކޮށްފައިވެއެވެ.
އިރާނުން މިފަދަ އިންޒާރެއް ދީފައި މިވަނީ، އެ ގައުމުގެ އެކި މުއައްސަސާތަކަށް ދެވޭ ހަމަލާތަކުގެ ފަހަތުގައި ވަނީ އެމެރިކާ އާއި އިސްރާއީލު ކަމަށް ތުހުމަތު ކުރަމުންދާ ދަނޑިވަޅެއްގައެވެ.
