2026 ވަނަ އަހަރުގެ ފީފާ ވޯލްޑް ކަޕް ބަލަމުންދާ ފުޓުބޯޅަ ސަޕޯޓަރުންނަށް ދަނޑުމަތިން އާދަޔާ ހިލާފު އާ ކަމެއް ވަނީ ފާހަގަވެފައެވެ. މުބާރާތުގެ ބައެއް ބޮޑެތި ތަރިން ފެންނަނީ އެމީހުންގެ އަގުބޮޑު ފުޓުބޯޅަ ބޫޓުގެ ފަސްފަހަތުން ފާހަގަކުރެވޭ ވަރުގެ ބާގަނޑެއް ހަދައިގެން ތިއްބައެވެ. މިއާއެކު، އެތައް ސަތޭކަ ޑޮލަރެއްގެ އަގުހުރި ބޫޓަށް ކުޅުންތެރިން ގެއްލުން ދެނީ ކީއްވެގެންތޯ ސުވާލު އުފެދި، ސަޕޯޓަރުން ވަނީ ހައިރާންވެފައެވެ.
މި އާދަޔާ ހިލާފު ބަދަލު އެންމެ ބޮޑަށް ސަމާލުކަމަށް އައީ ޕޯޗުގަލް އާއި ސްޕެއިން ބައްދަލުކުރި ވޯލްޑް ކަޕް މެޗުގައެވެ. އެ މެޗުގައި ވިންގަރ ޕެޑްރޯ ނެޓޯގެ ފިޔާތޮށި ކުލައިގެ ނައިކީ މާކިއުރިއަލް ބޫޓަށް ކުރިމަތިވި ކުރިމަތިލުމެއްގެ ތެރެއިން ގެއްލުންވި ކަމަށް ފެނުނެވެ. ވީދިފައިވާ ބޫޓު ރެފްރީއަށް ދެއްކުމަށްފަހު ނެޓޯ ބޫޓު ބަދަލުކުރިއެވެ. ނަމަވެސް، އޭނާ އަލަށް އެރި ބޫޓުގެ ހަމަ އެ ދިމާލުން ވަރަށް ފަރުވާތެރިކަމާއެކު ބާގަނޑެއް ހަދާފައިވާކަން ސަޕޯޓަރުންނަށް ވަގުތުން ފާހަގަވިއެވެ.
މިކަމާ ގުޅިގެން އިންޓަނެޓުގައި ބޮޑު ބަހުސެއް އުފެދުނެވެ. ބައެއް ސަޕޯޓަރުން މިއީ ލިބުނު ގެއްލުމެއްތޯ، ނުވަތަ ކުޅުންތެރިން ގެންގުޅޭ ރޫހާނީ ގަބޫލުކުރުމެއްތޯ، ނުވަތަ ފުޓުބޯޅައިގެ އާ ފެޝަނެއްތޯ ސުވާލު އުފެއްދިއެވެ. ބައެއް ސަޕޯޓަރުން މިއީ "ވަފާތެރިކަމާއި ހިތްވަރުގަދަކަން" ރަމްޒުކޮށްދޭ ކަމެއް ކަމަށް ބުނެ ސަމާސާ ކުރިއިރު، އަނެއް ބަޔަކު ވަނީ ކުޑަކުދިން އެމީހުންގެ ފޭވަރިޓް ތަރިން ކޮޕީކުރަން ބޭނުންވާތީ އެކަމާ ކަންބޮޑުވުން ފާޅުކޮށްފައެވެ.
ނަމަވެސް، ބޫޓުގެ މި އާދަޔާ ހިލާފު ފަރުމާގެ ފަހަތުގައިވާ އަސްލު ސަބަބަކީ އަރާމުކޮށްލުމާއި އަނިޔާއިން ރައްކާތެރިވުމެވެ.
ރިޕޯޓްތައް ބުނާގޮތުގައި ގިނަ ޕްރޮފެޝަނަލް ފުޓުބޯޅަ ކުޅުންތެރިންނަށް "ހެގްލަންޑްސް ޑިފޯމިޓީ" ކިޔާ ބައްޔެއް ކުރިމަތިވެއެވެ. މިއީ ފުންނާބުގެ ފަހަތަށް ތަކުރާރުކޮށް ބާރުބޮޑުވެ، ފިތުމުގެ ސަބަބުން ކަށިގަނޑު ބޮޑުވެ، ތަދުވާ ބައްޔެކެވެ.
މަތީ ފަންތީގެ ކުޅުންތެރިންނަށް މި މައްސަލައިގެ ސަބަބުން ވަރަށް ބޮޑަށް އުނދަގޫވެއެވެ. ފުޓުބޯޅަ ބޫޓު ފަރުމާކޮށްފައި ހުންނަނީ ފަޔަށް ވަރަށް ބާރުކޮށް ހުންނަ ގޮތަށެވެ. އަދި ކުޅުންތެރިން 90 މިނެޓު ވަންދެން ބާރަށް ދުވުމާއި، ކުއްލި ކުއްލިއަށް އެނބުރުމާއި، ބާރު ހަރަކާތްތައް ކުރަންޖެހެއެވެ. މީގެ ސަބަބުން ފުންނާބުގައި ބޫޓު ތަކުރާރުކޮށް އުނގުޅި، އެކިލީސް ޓެންޑަން އާއި ވަށައިގެންވާ މަސްތަކަށް ތަދުވެ، ދުޅަވާގޮތްވެއެވެ.
ބޫޓުގެ ހަރުކޮށް ހުންނަ ފަސްފަހަތުން ކުޑަ ބާގަނޑެއް ހެދުމުން، ތަދުވާ ދިމާލަށް އިތުރު ޖާގަ ލިބެއެވެ. މީގެ ސަބަބުން ފިތުން ކުޑަވެ، ފުންނާބު މިނިވަންކަމާއެކު ހަރަކާތްކުރުމަށް ފުރުސަތު ލިބި، އުނދަގުލަކާ ނުލައި ކުޅުން ކުރިއަށް ގެންދިއުމަށް ފަސޭހަވެއެވެ.
ސިއްހީ މާހިރުން ބުނާގޮތުގައި މިއީ މެޗުތަކުގެ ތެރޭގައި ތަދު ކުޑަކުރުމަށް ކުރެވިދާނެ އަމަލީ ކަމެއް ނަމަވެސް، މިއީ މި ބަލީގެ އަސްލު ފަރުވާއެއް ނޫނެވެ.
ޑރ. ޑޮނަލްޑް ގްރާންޓް ކިޔައިދެއްވި ގޮތުގައި، ބާރު ބޫޓަށް އެރުމާއި، ތަކުރާރުކޮށް ބާރަށް ދުވުމާއި، ކުއްލިއަކަށް މިސްރާބު ބަދަލުކުރުމުގެ ސަބަބުން އެތުލީޓުންގެ މެދުގައި "ހެގްލަންޑްސް ސިންޑްރޯމް" އާންމެވެ. މި ބަލީގައި ކަށިގަނޑު ބޮޑުވުމާއި، ފުންނާބު ކައިރީގައިވާ ދުޅަވުމާއި، އެކިލީސް ޓެންޑަންއަށް އުނދަގޫވުން ހިމެނެއެވެ.
ބޫޓަށް މިފަދަ ބަދަލެއް ގެނައުމުން ވަގުތީ ގޮތުން ލުޔެއް ލިބުނު ކަމުގައި ވިޔަސް، މީގެ ސަބަބުން އަސްލު މައްސަލަ ހައްލުނުވާނެ ކަމަށް މާހިރުން އިންޒާރު ދެއެވެ. ބޫޓުން ބައެއް ކަނޑާލުމަކުން ކަށިގަނޑު ބޮޑުވުން ހުއްޓުވައެއް ނުދެވޭނެއެވެ.
ބޫޓުގައި ބާނގަނޑެއް ހަދައިގެން މި އުޅޭ އާދަ، ސަޕޯޓަރުންނަށް އާދަޔާ ހިލާފު ކަމަކަށް ވިޔަސް، ވޯލްޑް ކަޕްގެ ބައެއް ކުޅުންތެރިންނަށް މިއީ ފުޓުބޯޅައިގެ އެންމެ މަތީ ފަންތީގައި ވާދަކުރާއިރު އަރާމު ހޯދުމަށް އޮތް އަވަސް މަގެކެވެ.ތަފާތު ފެޝަން އިޚްތިޔާރެއްގެ ގޮތުގައި ފެނުނު ކަމުގައި ވިޔަސް، މިއީ އަނިޔާގެ ތަދުގައި ތިބެގެންވެސް އެތުލީޓުންނަށް އެންމެ ފުރިހަމައަށް ކުޅުމަށް އެހީތެރިވުމަށްޓަކައި ގެނެސްފައިވާ ކުޑަ ބަދަލެކެވެ.
