ރާއްޖޭގައި ކާށި ލިބުން ދަތިވެ، ބޭރު ޤައުމުތަކުން ކާށި އެތެރެކުރަންޖެހޭ މައްސަލައަށް ހައްލެއް ހޯދުމުގެ ގޮތުން އދ. އަރިޔަދޫގައި "ކޮކޮނަޓް ޑިވެލޮޕްމަންޓް ސެންޓަރ" އެއް ޤާއިމުކުރުމަށް ބޭނުންވާ ދިރާސާތައް ނިންމާލައިފިއެވެ. ކަސްޓަމްސްގެ ތަފާސްހިސާބުތަކުން ދައްކާގޮތުގައި 2018 އިން 2022 އަށް ރާއްޖެއަށް 15.8 ޓަނުގެ ކާށި އެތެރެކުރިއިރު، 2023 ވަނަ އަހަރު އެކަނިވެސް 240 ޓަނަށްވުރެ ގިނައިން ކާށި އެތެރެކުރަންޖެހުނެވެ. ރާއްޖޭގައި މިހާރު ހުރި ރުއްތަކަކީ އުމުރުން ދުވަސްވީ ރުއްތަކަކަށް ވުމާއި، ބިންތައް ހުސްކުރުމަށް ރުއްތައް ކެނޑުމުގެ ސަބަބުން ރުކުގެ އައު ޖީލެއް އުފެއްދުން މިހާރު ވަނީ ކޮންމެހެން ބޭނުންތެރި ކަމަކަށް ވެފައެވެ.
މަސްވެރިކަމާއި ދަނޑުވެރިކަމާ ބެހޭ ވުޒާރާގެ ސްޓޭޓް މިނިސްޓަރ އަޙްމަދު ޙަސަން ދީދީ ވިދާޅުވީ، އަރިޔަދޫގެ ޙާލަތު ބަލައި ޕްރޮޕޯސަލް ތައްޔާރުކޮށްފައިވާ ކަމަށާއި، މިހާރު ކުރިއަށްދަނީ އެ މަސައްކަތަށް އިޢުލާން ކުރުމުގެ ތައްޔާރީތައް ކަމަށެވެ. މި ސެންޓަރު ތަރައްޤީކުރުމުގެ އިތުރުން ރުއް ދަނޑުތައް ހެއްދުމާއި ރުކާ ބެހޭ ޚާއްޞަ ދިރާސާތަކެއް ކުރުމުގެ މަސައްކަތް ވެސް ދަނީ ކުރަމުންނެވެ.
މި މަރުކަޒުން ކުރިއަށްގެންދާނެ މުހިންމު މަސައްކަތްތައް:
-
ފެންވަރު ރަނގަޅު ރުކުގެ ނާސަރީތަކެއް ހަދައި، ސެޓިފައިޑް މުޑުވައްތައް ރަށްތަކަށް ފޯރުކޮށްދިނުން.
-
ކާށި، ރުކުރާ އަދި ދިޔާހަކުރު ތައްޔާރުކުރާނެ ނިޒާމެއް ޤާއިމުކުރުން.
-
ހޭޅިފަށުގައި ހެދޭ ގަސްގަހާގެހި އާލާކޮށް، ކާނާގެ ޔަގީންކަން ޤާއިމުކުރުމަށް ބޭނުންވާ މުޑުވައް އުފެއްދުން.
-
ރުއްތަކަށް ޖެހޭ ބަލިތައް ދެނެގަނެ، އެކަންކަން ކޮންޓްރޯލް ކުރުމަށް ބޭނުންކުރާނެ ބައޮލޮޖިކަލް ކޮންޓްރޯލް އާލާކުރުމުގެ ދިރާސާތައް ފެށުން.
މި މަޝްރޫޢުގެ ސަބަބުން ރާއްޖޭގައި ރުކުގެ ބާވަތްތަކާއި ކާށި ލިބުމުގައި ހުރި ދަތިތަކަށް ދާއިމީ ހައްލެއް ލިބި، ރާއްޖޭގެ ކާނާގެ ޔަގީންކަން އިތުރަށް ވަރުގަދަވެގެންދާނެ ކަމަށް ވުޒާރާއިން ލަފާކުރެއެވެ.
