އެފްއޭއެމްއިން ބޮޑެތި ގުދަންތައް ކުއްޔަށްދީފައިވާއިރު، އެފްއޭމްއެމްގެ ބައެއް މުވައްޒަފުންނަށް މުސާރަ ނުދޭތާ 10 މަހަށްވުރެ ގިނަވެފައިވުމުން، އޭފްއޭއެމްގެ ގިނަ މުވައްޒަފުންނަށް މަސައްކަތު ނުކުތުމަށް ވަނީ އުޒުރުވެރިވެފައެވެ.
މުސާރައިގެ އިތުރުން ރޯދަ އިނާޔަތާއި ޕެންޝަން ފައިސާ، ދިނުމުގައި ވެސް އެފްއޭއެމުން ފަރުވާކުޑަ ކުރާ މައްސަލަ ވަނީ ފެންމަތިވެފައެވެ. މިދިޔަ ދެ އަހަރުގެ ރޯދަ މަހު ވެސް މުވައްޒަފުންނަށް ރޯދައިގެ އިނާޔަތް ދިނީ ގާނޫނުގައި ދޭން ކަނޑައަޅައިފައިވާ މުއްދަތު ފަހަނައަޅައި ދިޔަ ފަހުން ކަމަށް މަޢުލޫމާތު ލިބެއެވެ.
މި އަހަަރަށް އެފްއޭއެމުން 85 މިލިއަން ރުފިޔާގެ ބަޖެޓެއް ފާސްކޮށްފައިވީނަމަވެސް، ބަޖެޓް ފާސްކުރަން ބޭއްވި އަހަރީ އާންމު ޖަލްސާގައި ވާހަކަ ދައްކަމުން އެ އިދާރާގެ ރައީސް ބައްސާމް އަދީލް ޖަލީލް ވިދާޅުވީ އެފްއޭއެމްގެ ގުދަންތައް ކުއްޔަށް ދީގެން، ބަޖެޓްގެ ބޮޑު ބައެއް ކަވަރު ކުރެވޭނެ ކަމަށެވެ. އެހެންނަމަވެސް، އެހާ ބޮޑު އާމްދަނީއެއް ގުދަންތަކުން ލިބެމުންދާއިރު، މުވައްޒަފުންނަށް މުސާރަ ދިނުމުގައި އެފްއޭއެމްއިން އިހްމާލުވެފައިވާތީ އެކަމުގެ ޝަކުވާ ވަނީ ބޮޑުވެފައެވެ.
ފައިސާގެ މައްސަލަތަކާ ހުރެ އެފްއޭއެމް އޮތީ އަނދަވަޅަކަށް ވެއްޓި، ކްލަބްތަކަށް އެފްއޭއެމުން ދޭން ޖެހޭ ފައިސާވެސް ނުދެއްކޭ ޙާލަތުގައެވެ.
މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) މެދުވެރިވެގެން، އޮކްޓޯބަރު 2021 ގައި ގައުމީ ޓީމު ކުޅުންތެރިންނަށް ހޯދައިދިން މިލިއަނަކަށް ވުރެ ގިނަ ރުފިޔާ އެފްއޭއެމްއާ ހަވާލު ކުރުމުން، އެ ފައިސާ އަދި ވެސް ކުޅުންތެރިންނަށް ދީ ހަލާސްކޮށްފައެއް ނުވެއެވެ. އަދި ސަރުކާރުގެ ކުންފުނިތައް ކަމަށްވާ މޯލްޑިވިއަންއާއި ސްޓެލްކޯ ފަދަ ކުންފުނިތަކަށާއި، ބައެއް އެހެން އާންމު ވިޔަފާރިތަކަށް ވެސް، އެފްއޭއެމް ދަރާފައިވާ ކަމަށް ޚަބަރު ލިބެމުންދެއެވެ.
ކިޔުންތެރިންގެ ޚިޔާލުތައް:
ބޮޑެތި ގުދަންތައް ހުރީ ކުއްޔަށް ދީފަކާއެއް ނޫނެވެ. އެޑްވާންސްއަށް ފަންސާސް އަހަރުގެ ކުލި އެއްފަހަރާ އަތުލާފައި ވިއްކާލާފައެވެ. އެބިންތައް ދެން ދުވަހަކުވެސް އެފްއޭއެމަށްވެސް ސަރުކާރަށްވެސް ނުލިބޭނެ ގޮތަށް އޮތީ ކޮންޓްރެކްޓް ހެދިފައެވެ. މީ ހަމަ ސީދާ ރޯމާ ދުވާލު ކޮއްފައި އޮތް ބޮޑެތި ވައްކަންތަކެވެ.