އޭޝިއާގެ އެތުލެޓިކްސްއަށް ކޮށްދެއްވި ޚިދުމަތުގެ އަގުވަޒަންކޮށް، އެތުލެޓިކްސް އެސޯސިއޭޝަނުގެ ޖެނެރަލް ސެކްރެޓަރީ އަޙްމަދު މުންތަޤިމް (މުންތޭ) އަށް އޭޝިއާ އެތުލެޓިކްސްގެ ރައީސް ޤަތަރުގެ ދަހްލާން އަލް ހަމަދު ދެއްވާ ލީޑަޝިޕް ޕިން ދެއްވައިފިއެވެ. މިއީ ރާއްޖޭގެ އެތުލެޓިކްސްއަށް ލިބުނު ނުހަނު ބޮޑު ޝަރަފަކާއި ފަޚްރެކެވެ.
މި ޕިން މުންތަގިމްއަށް ހަވާލުކޮށްފައިވަނީ އޭޝިއާ އެތުލެޓިކްސްގެ 25 ވަނަ އަހަރީ އާންމު ބައްދަލުވުމުގައެވެ. އަދި ރާއްޖޭގެ އެތުލެޓިކްސް އެސޯސިއޭޝަންގެ ނައިބު ރައީސް އަހުމަދު އަޒީލް އަށް ވަނީ ޑަބްލިއު އޭ ރެފްރީ ބްރޯންޒް ލެވަލް ހާސިލުކުރި ކަމުގެ ލިޔުން ހަވާލުކުރައްވާފައެވެ.
ހަތަރުވަނަ ދައުރަކަށް އެތުލެޓިކްސް އެސޯސިއޭޝަންގެ ޖެނެރަލް ސެކްރެޓަރ މުންތަގިމް ވަނީ 2021 ވަނަ އަހަރު ބޭއްވި އޮލިމްޕިކްސްގައި ރާއްޖޭގެ ޝެފް ޑި މިޝަނަރަކަށް ވެސް އަދާކުރައްވާފައެވެ.
މުންތަޤިމް ވަނީ 2019 ވަނަ އަހަރު ސައުތު އޭޝިއަން ގޭމްސްގެ އެތުލެޓިކްސް އިވެންޓްތަކުގެ އިންޓަނޭޝަނަލް ޓެކްނިކަލް އޮފިޝަލް (އައިޓީއޯ) އަކަށް މަސައްކަތްކުރައްވާފައެވެ. މީގެ އިތުރުން، އެންމެ ފަހުން މިދިޔަ މަހު މުންތަޤިމް ވަނީ ކޮރެއާގައި ބޭއްވި އޭޝިއާގެ 20 އަހަރުންދަށުގެ އެތުލެޓިކްސް މުބާރާތުގައި ވެސް ޓެކްނިކަލް އޮފިޝަލުކަން ކުރައްވާފައެވެ.
