އެމެރިކާއިން އީރާނުގެ ކަރަންޓު ވިއުގަޔަށް ހަމަލާދީފިނަމަ، ރަތްކަނޑާއި އޭޑަން ގަލްފު ގުޅުވައިދޭ މުހިންމު ކަނޑުއޮޅި، ބާބުލް މަންދަބު ބަންދުކުރުމަށް އީރާނުން ޔަމަނުގެ ހޫތީންނަށް އެދިއްޖެއެވެ. ރޮއިޓަރސްއިން ރިޕޯޓުކޮށްފައިވާ ގޮތުގައި، މި ކަނޑުއޮޅި ބަންދުވެއްޖެނަމަ، ދުނިޔޭގެ ބާރުގަދަ ވިޔަފާރި މަގުތަކުގެ ތެރެއިން އެއް މަގަށް ބުރޫއަރައި، ދުނިޔޭގެ ތެލާއި ގޭހުގެ ސަޕްލައިއަށް ބޮޑެތި ގޮންޖެހުންތަކެއް ކުރިމަތިވުމުގެ ފުރުޞަތު ބޮޑެވެ.
ރޮއިޓަރސްއިން ބުނާ ގޮތުގައި، ސަޢޫދީ ޢަރަބިއްޔާއިން މި އިންޒާރު ސީރިއަސްކޮށް ނަގާފައިވެއެވެ. އީރާނުގެ ބައިވެރިޔާ ހޫތީން، ބާބުލް މަންދަބުގައި ބޯޓުފަހަރު ދަތުރުކުރުމަށް ހުރަސްއެޅުމަށް ތައްޔާރަށް ތިބިކަމަށްވެސް ބުނެފައިވެއެވެ.
ހޮރްމުޒް ކަނޑުއޮޅި ބަންދުކުރުމަށްފަހު، އީރާނުން ދެވަނަ ފިއްތުމެއްގެ ގޮތުގައި ބާބުލް މަންދަބު ބޭނުންކުރުމަށް ތައްޔާރުވަމުންދާކަމަށް ތަޖުރިބާކާރުން ބުނެއެވެ. އެމެރިކާ އާއި އިސްރާއީލުން ފެބްރުއަރީ މަހު ފެށި ހަނގުރާމަ ފުޅާވަމުންދާއިރު، ގަލްފުގެ ސަރަޙައްދުން ބޭރަށްވެސް ވިޔަފާރިއާއި ހަކަތައިގެ ސަޕްލައިއަށް ނުރައްކާ ފުޅާކުރުމަށް އީރާނުން ދަނީ މަސައްކަތްކުރަމުންނެވެ.
ޔަމަނުގެ އިސް އޮފިޝަލަކު ބުނެފައިވަނީ، ސަޢޫދީ ޢަރަބިއްޔާއިން ޔަމަނަށް ހަމަލާދިނުން ކުރިއަށްދާނަމަ، ބާބުލް މަންދަބު ބަންދުކުރުމުގެ ގާބިލުކަން ޔަމަނުގެ ސިފައިންގެ ކިބައިގައި ހުރިކަމަށެވެ. މިކަމުގެ ސަބަބުން ތެލުގެ އަގު ފީފާއަކަށް 200 ޑޮލަރަށް އުފުލިގެންދާނެ ކަމަށްވެސް ބުނެފައިވެއެވެ.
ބާބުލް މަންދަބާއި ރަތްކަނޑަކީ ސުއޭޒް ކެނަލް މެދުވެރިކޮށް އިންޑިއާ ކަނޑާއި މެޑިޓަރޭނިއަން ގުޅުވައިދޭ މުހިންމު މަގެކެވެ. މި މަގުން ދުނިޔޭގެ ކޮންޓެއިނަރ ވިޔަފާރީގެ ގާތްގަނޑަކަށް 30 އިންސައްތަ ދަތުރުކުރެއެވެ. ހޮރްމުޒް އަދި ބާބުލް މަންދަބު، މި ދެ ކަނޑުއޮޅި އެއްފަހަރާ ބަންދުވެއްޖެނަމަ، ދުނިޔޭގެ ހަކަތަ ސަޕްލައިގެ ހަތަރުބައިކުޅަ އެއްބައި ހުއްޓުމަކަށް އައުމަކީ އެކަށީގެންވާ ކަމެއްކަމަށް ތަޖުރިބާކާރުން ބުނެއެވެ.
