އެމެރިކާ އާއި އިޒްރޭލުގެ އުޅަނދުފަހަރަށް ހުރްމޫޒް ކަނޑުއޮޅި ބަންދުކުރުމަކީ އީރާނަށް އެޅިދާނެ "ގާނޫނީ ފިޔަވަޅެއް" ކަމަށް އެ ގައުމުގެ ފޮރިން މިނިސްޓަރު އައްބާސް އަރަގްޗީ ވިދާޅުވެއްޖެއެވެ. އޭނާ މިހެން ވިދާޅުވީ ރަޝިޔާގެ ފޮރިން މިނިސްޓަރު ސަރްގޭ ލަވްރޯފްއާ ފޯނުން ގުޅުއްވައި ދެއްކެވި ވާހަކަފުޅުގައެވެ.
އޭއެފްޕީން ރިޕޯޓްކޮށްފައިވާ ގޮތުގައި، އީރާނުގެ ފޮރިން މިނިސްޓްރީން ބުނީ ހޯރްމޫޒް ކަނޑުއޮޅިން ދަތުރުކުރާ އުޅަނދުފަހަރުގެ ކަންކަން ކުރިއަށްދަނީ އީރާނުގެ ކަމާބެހޭ އިދާރާތަކުގެ ފުރިހަމަ ކޯޑިނޭޝަނާއެކު ކަމަށް އަރަގްޗީ ވިދާޅުވި ކަމަށެވެ. މިއީ ބައިނަލްއަގުވާމީ ކަނޑުގެ ދަތުރުފަތުރުގެ މުހިންމު ސަރަހައްދެއްގެ ގޮތުގައި ބެލެވޭ ތަނެކެވެ.
މި ފޯނު ކޯލުގައި އަރަގްޗީ ވަނީ އެމެރިކާ އާއި އިޒްރޭލުން އާންމުން ދިރިއުޅޭ ތަންތަނަށާއި، ސްކޫލްތަކާއި، ހޮސްޕިޓަލްތަކުގެ އިތުރުން ތާރީޚީ ބިނާތަކަށް ހަމަލާދެމުންދާ ކަމަށް ތުހުމަތު ކުރައްވާފައެވެ. އޭނާ ވިދާޅުވީ މިފަދަ އަމަލުތަކާ ދެކޮޅަށް އީރާނުން ސާބިތުކަމާއެކު ދިފާއީ ފިޔަވަޅުތައް އަޅަމުންދާނެ ކަމަށެވެ.
މި ސަރަހައްދުގެ މަސްރަހު ނުތަނަވަސްވެފައިވާ ދަނޑިވަޅެއްގައި އީރާނުން މިފަދަ އިންޒާރެއް ދީފައިވާއިރު، މިއީ މުޅި ދުނިޔޭގެ ތެލުގެ ވިޔަފާރިއަށް ބޮޑު އަސަރެއް ކުރާނެ ކަމެއް ކަމަށް މުހައްލިލުން ދެކެއެވެ. އީރާނުން ބުނަމުންދަނީ އެ ގައުމުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އަޅަންޖެހޭ ކޮންމެ ފިޔަވަޅެއް އެޅުމުގެ ހައްގު އެ ގައުމަށް ލިބިގެންވާ ކަމަށެވެ.
