އެފޯޑަބަލް ހޯމް އޯނާޝިޕް ސްކީމަށް ޚާއްޞަކޮށްގެން، ޕަބްލިކް-ޕްރައިވެޓް ޕާޓްނާޝިޕް (ޕީޕީޕީ) އުސޫލުން ހުޅުމާލޭގައި 1,000 ހައުސިންގ ޔުނިޓް އެޅުމުގެ އެއްބަސްވުންތަކުގައި ދިވެހި ފަސް ކުންފުންޏަކާއެކު ހައުސިންގ މިނިސްޓްރީން ސޮއިކޮށްފިއެވެ. މިނިސްޓްރީގައި ބޭއްވި ރަސްމިއްޔާތެއްގައި ސަރުކާރުގެ ފަރާތުން ސޮއިކުރެއްވީ ވަޒީރު ޑރ. ޢަބްދުﷲ މުއްތަލިބެވެ. މި މަޝްރޫޢުތައް ޙަވާލުކުރީ ޕްރޮޕޯސަލް ހުށަހެޅި ފަރާތްތަކުގެ ތެރެއިން އެންމެ މަތިން މާކްސް ލިބުނު ކުންފުނިތަކާއެވެ.
މަޝްރޫޢު ޙަވާލުކުރި ކުންފުނިތައް:
-
އެސްޖޭ ކޮންސްޓްރަކްޝަން
-
ޖޭވީ ޕާޓްނާޝިޕް (ވަން ރިއަލިޓީ އަދި މެޑްޓެކް މޯލްޑިވްސް)
-
އަމިން ކޮންސްޓްރަކްޝަން
-
ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ)
-
ޖޭވީ ޕާޓްނާޝިޕް (ފްލެކްސިންކް، އޮކްސްރޯ، ސޮލެކްސް އަދި ބީވާ ބިލްޑާސް)
ހައުސިންގ މިނިސްޓްރީން ހާމަކުރި ގޮތުގައި، މި ފްލެޓްތައް އެޅުމަށް ނިންމާފައިވަނީ ހުޅުމާލެ 3 ވަނަ ފިޔަވަހީގައެވެ. މަޝްރޫޢު ނިންމުމަށް ކަނޑައަޅާފައިވާ މުއްދަތަކީ 2 އަހަރާއި 5 މަސް ދުވަހެވެ. މި މަޝްރޫޢުގެ ދަށުން އިމާރާތްކުރާ ފްލެޓްތައް ވިއްކަން ޖެހޭނީ ސަރުކާރުގެ "އާއިލީ ބޯހިޔާވަހިކަން" ޕްރޮގްރާމަށް ފޯމު ހުށަހަޅައި ޝަރުތު ހަމަވާ ފަރާތްތަކަށް އެކަންޏެވެ.
އެފޯޑަބަލް ހޯމް އޯނަރޝިޕް ސްކީމަށް ޚާއްސަކޮށްގެން، ޕަބްލިކް-ޕްރައިވެޓް ޕާޓްނާޝިޕް އުސޫލުން ހުޅުމާލޭގައި 1000 ހައުސިންގ ޔުނިޓު ތަރައްޤީކުރުމުގެ މަޝްރޫޢުގެ އެއްބަސްވުންތަކުގައި ސަތޭކަ އިންސައްތަ ދިވެހިން ހިއްސާވާ 5 ކުންފުންޏަކާއެކު ސޮއިކޮށްފިއެވެ.
މި މަޝްރޫޢުގައި ސޮއިކުރެވުނު… pic.twitter.com/DjlXxzCmLL
— Ministry of Infrastructure, Housing and Urban Dev. (@MIHUDmv) July 16, 2026
މި ސްކީމުގެ ދަށުން 2 ކޮޓަރީގެ ފްލެޓްތައް ވިއްކޭނެ އެންމެ މަތީ އަގަކީ 1.8 މިލިއަން ރުފިޔާއެވެ. އަދި 3 ކޮޓަރީގެ ފްލެޓްތައް ވިއްކޭނެ އެންމެ މަތީ އަގަކީ 2.3 މިލިއަން ރުފިޔާއެވެ. މި މަޝްރޫޢުގެ މައިގަނޑު ބޭނުމަކީ ރައީސް ޑރ. މުޙައްމަދު މުޢިއްޒުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، މެދުފަންތީގެ އާމްދަނީ ލިބޭ މީހުންނަށް ބޭންކް މޯގޭޖް ފައިނޭންސް މެދުވެރިކޮށް އަތްފޯރާފަށެއްގައި ގެދޮރު ގަތުމުގެ ފުރުޞަތު ތަނަވަސްކޮށްދިނުމެވެ.
