ނ. ކެނދިކުޅުދޫގައި ތަރައްޤީ ކުރި ކުޑަކުދިންގެ ޕާކުގެ ހުރިހާ މަސައްކަތްތަކެއް އެއްކޮށް ނިންމާލާފައިވާ ކަމަށް މި މަޝްރޫޢު ކުރިއަށްގެންދިޔަ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ހާމަކޮށްފިއެވެ. މި ޕާކަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިދިޔަ އަހަރުގެ ޖުލައި މަހު އެ ރަށަށް ކުރެއްވި ދަތުރުފުޅުގައި ރައްޔިތުންނަށް ވެވަޑައިގެންނެވި ވައުދުފުޅެކެވެ.
ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ކުރިއަށްގެންދިޔަ މި މަޝްރޫޢަށް ޖުމްލަ 420,000 ރުފިޔާ ޚަރަދުވެފައިވެއެވެ. އާރުޑީސީއާ އެކު މި މަޝްރޫޢުގެ އެއްބަސްވުމުގައި ސޮއިކުރީ 29 މާރިޗު 2024 ގައެވެ. މި މަޝްރޫޢުގެ ދަށުން ޕާކުގެ ލޭންޑްސްކޭޕިންގ އަދި ހާޑްސްކޭޕިންގ މަސައްކަތްތަކުގެ އިތުރުން، ކުޑަކުދިން ކުޅޭނެ ޕާކު ސެޓުތައް ވަނީ އިންސްޓޯލްކޮށްފައެވެ.
ނ. ކެނދިކުޅުދޫގައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން ޤާއިމުކުރި ކުޑަކުދިންގެ ޕާކުގެ މަސައްކަތްތައް ވަނީ ނިންމާލެވިފައެވެ. #TeamRDC pic.twitter.com/5EgMoS24VZ
— Road Development Corporation Ltd (@rdcmaldives) July 17, 2026
ކެނދިކުޅުދޫގެ ކުޅުދޫ އަވަށުގައި ތަރައްޤީ ކުރި މި ޕާކުގެ ސަބަބުން ރަށުގެ ކުޑަކުދިންނާއި އާއިލާތަކަށް ހިތްފަސޭހަ އަދި ރައްކާތެރި މާހައުލެއްގައި ވަގުތު ހޭދަކޮށްލުމުގެ ފުރުސަތު ލިބި، ރަށުގެ އިޖުތިމާއީ ދިރިއުޅުމަށް ބޮޑު ކުރިއެރުމެއް ލިބޭނެ ކަމަށް ރަށުގެ ރައްޔިތުން ދެކެއެވެ.
