ޤާނޫނީ ދާއިރާގެ ޑިގްރީ ކޯސްތަކުގެ ފެންވަރު ހިފެހެއްޓުމަށްޓަކައި، ކޯސްތަކުގެ އިމްތިހާނުތަކަކީ ހާޒިރުވެގެން ހަދަންޖެހޭ އިމްތިހާނުތަކެއް ކަމަށް ބާ ކައުންސިލުން ކަނޑައަޅައިފިއެވެ. ކައުންސިލުގެ އެގްޒެކެޓިވް ކޮމިޓީގެ ފަސްވަނަ ބައްދަލުވުމުން ފާސްކުރި މި ނިންމުމަށް ޢަމަލުކުރަން ފަށާނީ 1 އޮގަސްޓް 2026 އިން ފެށިގެންނެވެ.
މި ބަދަލާއެކު، އެ ތާރީޚުގެ ކުރިންނާއި ފަހުން އެކްރެޑިޓް ކޮށްފައިވާ ހުރިހާ ލޯ ޑިގްރީ ޕްރޮގްރާމްތަކެއްގެ އިމްތިހާނުތައް ކުރިއަށް ގެންދަންޖެހޭނީ އޮންލައިންކޮށް ހެދުމުގެ ބަދަލުގައި، ދަރިވަރުންނާއި އިންވިޖިލޭޓަރުން އެއް މާހައުލެއްގައި ތިބެގެން ބެލެހެއްޓިގެންނެވެ.
އިމްތިހާނުތަކުގެ އިތުރުން، ޤާނޫނީ ދާއިރާގެ ކޯސްތަކަށް ވަނުމަށް ބޭނުންވާ އިނގިރޭސި ބަހުގެ ފެންވަރުގެ ޝަރުތުތަކަށް ވެސް ބާ ކައުންސިލުން ވަނީ ބަދަލުތަކެއް ގެނެސްފައެވެ. އެގޮތުން ކޯހަށް ވަނުމަށްޓަކައި:
-
އައިއެލްޓީއެސް: 6.0 އިން މަތީގެ ސްކޯއެއް ހޯދުން.
-
ޓޯފުލް: 4 އަށްވުރެ މަތީގެ ސްކޯއެއް ހޯދުން.
-
ފައުންޑޭޝަން ޕްރޮގްރާމް: އެމްކިއުއޭ ޤަބޫލުކުރާ ފައުންޑޭޝަން ކޯހެއްގެ އިނގިރޭސި މޮޑިއުލްތަކުން 'ސީ' ފާހަށްވުރެ މަތީ ނަތީޖާއެއް ހޯދާފައިވުން.
ބާ ކައުންސިލުން ބުނި ގޮތުގައި، މި ބަދަލުތަކަކީ ރާއްޖޭގައި ޤާނޫނީ ތައުލީމު ދޭ މަރުކަޒުތަކުން ޢަމަލުކުރަންޖެހޭ އެންމެ ދަށް މިންގަނޑުތައް ކަނޑައެޅުމަށް ކުރާ މަސައްކަތުގެ ބައެކެވެ. އަދި މީގެ ސަބަބުން ދާއިރާއަށް ވަންނަ ދަރިވަރުންގެ ފެންވަރު ރަނގަޅުވެ، ބައިނަލްއަޤުވާމީ މިންގަނޑުތަކަށް ވެސް ފެތިގެންދާނެއެވެ.
