އެމެރިކާގެ އަސްކަރިއްޔާއިން އީރާނަށް ދެމުންދާ ހަމަލާތަކަށް ބެއްލެވުމެއްނެތި، ޢިރާޤުގެ ބޮޑުވަޒީރު ޢަލީ އަލް-ޒަޔިދީ ތެހްރާނަށް ވަޑައިގެން އީރާންގެ ރައީސް މަސްޢޫދު ޕީޒިޝްކިޔާންއާ ބައްދަލުކުރައްވައި ރަސްމީ މަޝްވަރާތައް ބާއްވަވައިފިއެވެ.
މަޤާމާ ޙަވާލުވެވަޑައިގެންނެވި ފަހުން ކުރެއްވި މި ފުރަތަމަ ދަތުރުފުޅުގައި ޚާރިޖީ، މާލީ، އިޤުތިޞާދީ އަދި ހަކަތައިގެ ދާއިރާއިން މުހިންމު އެއްބަސްވުންތަކެއްގައި ސޮއިކުރެވުނުއިރު، ދެ ޤައުމުގެ ސަލާމަތާއި ރައްކާތެރިކަން ގުޅިފައިވާކަމަށާއި ސަރަޙައްދީ މައްސަލަތައް ޞުލްޙަވެރިކޮށް ޙައްލުކުރުމަށް ދެ ބޭފުޅުން ވަނީ އެއްބަސްވެވަޑައިގެންފައެވެ.
ޒަޔިދީގެ ދަތުރުފުޅާ ދިމާކޮށްވެސް އެމެރިކާއިން ވަނީ ޖެހިޖެހިގެން 13 ވަނަ ދުވަހަށް އީރާނަށް ހަމަލާތައް ދީފައެވެ. އެމެރިކާގެ ރައީސް ޑޮނަލްޑް ޓްރަމްޕް އިތުރު ބޮޑެތި ހަމަލާތަކެއް ދޭނެކަމުގެ އިންޒާރު ދީފައިވާއިރު، އީރާންގެ އިސްލާމީ އިންޤިލާބީ ލަޝްކަރުން (އައިއާރްޖީސީ) ދަނީ ކުވައިތު، ބަޙްރައިން އަދި އުރުދުންގައި ހުރި އެމެރިކާގެ އަސްކަރީ އަމާޒުތަކަށް ރައްދު ހަމަލާތައް ދެމުންނެވެ. މީގެއިތުރުން، ޔަމަނުގެ ޙޫޘީން ރަތް ކަނޑުގެ ބާބް އަލް-މަންދަބް ކަނޑުއޮޅިން ދަތުރުކުރި ދެ ޓޭންކަރަކަށް ހަމަލާދީ ސަޢޫދީގެ ބަނދަރުތައް ޙިޞާރުކުރުމާ ގުޅިގެން ތެޔޮ ފީފާއެއްގެ އަގު 100 ޑޮލަރަށްވުރެ މައްޗަށް އުފުލިފައިވާއިރު، އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ މަސްރަޙު ކޮންޓްރޯލުން ނެއްޓިދާނެތީ ކަންބޮޑުވުން ފާޅުކުރައްވާފައެވެ.
