އިންޑިއާގެ ކޮޗިންގައި ހުންނަ އަމްރިތާ ހޮސްޕިޓަލުން ޕެކޭޖުތަކުގެ އަގުތައް ހިއްސާކޮށްފައިވާތީ، އެ ހޮސްޕިޓަލާއެކު ވެވިފައިވާ އެއްބަސްވުން އައުކުރުމަށް ތައްޔާރުވަމުންދާ ކަމަށް އާސަންދަ ކުންފުނިން ހާމަކޮށްފިއެވެ.
ޕީއެސްއެމް ނިއުސްގެ "ރާއްޖެމިއަދު" ޕްރޮގްރާމުގައި ވާހަކަދައްކަވަމުން އާސަންދަ ކުންފުނީގެ މެނޭޖިން ޑިރެކްޓަރ އާމިނަތު ޒީނިޔާ ވިދާޅުވީ، އަމްރިތާ ހޮސްޕިޓަލަށް އާ ބަލިމީހުން ފޮނުވުން ވަގުތީގޮތުން މެދުކަނޑާލީ އެއްބަސްވުމުގެ މުއްދަތު ހަމަވުމުގެ ކުރިން އަގުތައް ހިއްސާކޮށްފައި ނުވާތީ ކަމަށެވެ. ނަމަވެސް މިހާރު އެ އަގުތައް ލިބިފައިވާތީ މުރާޖަޢާ ކުރުމަށްފަހު، ދެފަރާތް އެއްބަސްވާ އަގުތަކެއްގައި އާ އެއްބަސްވުމުގައި ސޮއިކުރާނެ ކަމަށް އޭނާ ވިދާޅުވިއެވެ.
ޒީނިޔާ އިތުރަށް ފާހަގަކުރެއްވި ގޮތުގައި، އަލަށް ބަލިމީހުން ފޮނުވުން މެދުކަނޑާލި ނަމަވެސް، މިހާރުވެސް އެ ހޮސްޕިޓަލުން ފަރުވާ ހޯދަމުންދާ ދިވެހިންނަށް މެދުކެނޑުމެއްނެތި އާސަންދައިގެ ދަށުން ޚިދުމަތް ލިބެމުންދާނެއެވެ. އަދި ކޮޗިންގައި ދިވެހިން އާންމުކޮށް ޚިދުމަތް ހޯދާ އިތުރު 4 ހޮސްޕިޓަލެއް ހުންނަކަންވެސް އޭނާ ފާހަގަކުރެއްވިއެވެ.
ޤައުމީ ހެލްތު އިންޝުއަރެންސް ނިޒާމު، އާސަންދައިގެ ދަށުން އަހަރަކު 3 ބިލިއަނެއްހާ ރުފިޔާ ބޭސްފަރުވާއަށް ޚަރަދުކުރާއިރު، އިންޑިއާ، ސްރީލަންކާ، ދުބާއީ އަދި ތައިލެންޑުގެ ބައެއް ހޮސްޕިޓަލްތަކުން އަންނަނީ ދިވެހިންނަށް ބޭސްފަރުވާގެ ފުރުޞަތު ފަހިކޮށްދެމުންނެވެ.
