ނަތަންޔާހޫ އެޑްމިޓްކޮށް، ޕޭސްމޭކަރެއް ލައްވަނީ

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ހިތުގެ މައްސަލަ ހައްލުކުރުމަށް،  ޕޭސްމޭނަރެއް ލެއްވުމަށްޓަކައި ކުއްލިއަކަށް ހޮސްޕިޓަލުގައި މިއަދު އެޑްމިޓްކޮށްފިއެވެ.

ނަތަންޔާހޫގެ ހިތަށް ޕޭސްމޭކަރެއް ލެއްވުމަށް އެޑްމިޓް ކޮށްފައި މި ވަނީ، ޝަރުއީ ދާއިރާ އަށް ގެންނަން ހުށަހަޅާފައިވާ ބޮޑެތި އިސްލާހުތަކާ މެދު ހިތްހަމަނުޖެހިގެން އެ ގައުމުގެ އެތައް ހާސް ބަޔަކު މުޒާހަރާ ކުރަމުންދާ ދަނޑިވަޅެއްގައި، އެ އިސްލާހުތަކަށް މަޖިލީހުގައި ވޯޓްލުން ކުރިއަށް އޮއްވައެވެ. އަދި ނަތަންޔާހޫ ކުއްލިއަކަށް ހޮސްޕިޓަލަށް ގެންގޮސް އެނދުމަތިކުރީ، ޝަރުއީ ދާއިރާއަށް އޭނާ ގެންނަން ހުށަހަޅާފައިވާ ބަދަލުތަކާ ދެކޮޅަށް މިހާތަނަށް އެންމެ ގިނަބަޔަކު މުޒާހަރާ ކުރި ހަލަބޮލި ދުވަހަކަށް ފަހު އެވެ.

ނަތަންޔާހޫގެ އޮފީހުން އާދީއްތަ ދުވަހު ބުނީ، އުމުރުން 73 އަހަރުގެ ނަތަންޔާހޫ ހޭނައްތާނީ، އޭނާގެ މަގާމުގެ ޒިންމާތައް ވަގުތީ ގޮތުން ޖަސްޓިސް މިނިސްޓަރު ޔާރިވް ލެވިން ހަވާލުކުރުމަށްފަހު ކަމަށެވެ. އަދި ނަތަންޔާހޫގެ  ހިތަށް ޕޭސްމޭކަރު ލެއްވުމުގެ އިމަޖެންސީ ޕްރޮސީޖަރ ކުރިއަށް ގެންދަވާނީ ޓެލް ހާޝޯމަރުގެ ޝަބާ މެޑިކަލް ސެންޓަރުގައި ކަމަށެވެ.

ނަތަންޔާހޫ ވަނީ މީގެ ހަފްތާއެއް ކުރިން ހަށިގަނޑުގައި ފެން މަދުވެގެން ހޮސްޕިޓަލުގައި އެޑްމިޓްކޮށްފައެވެ.

ނަތަންޔާހޫ އިސްވެ ހުށަހަޅާފައިވާ ސަރުކާރުގެ ނިންމުންތައް ފަނޑިޔާރުންނަށް ހުއްޓުވުމުގެ ބާރު ލިބޭ އިސްލާހަށް  ފައިނަލް ވޯޓު ލުމުގެ ކުރިން، އެކަމާ ދެކޮޅަށް ، ހޮނިހިރު ދުވަހުގެ ރޭ އިސްރާއީލުގެ އެކި ހިސާބުތަކުގައި އެތައް ހާސް ބަޔަކު މަގުތަކަށް ނުކުމެ،  އެތައް ހާސް ބަޔަކު ގުދުސްއަށް ހިނގާފައި ގޮސް ޕާލަމެންޓް ކައިރީގައި ވަނީ ކޭމްޕްކޮށްފައެވެ.

ނަތަންޔާހޫ ވިދާޅުވީ އާދީއްތަ ދުވަހު މަޖިލީހުގައި ފެށުމަށް ހަމަޖެހިފައިވާ އަދި މުޅި ހޯމަ ދުވަހު ކުރިއަށް ގެންދިއުމަށް ހަމަޖެހިފައިވާ ޝަރުއީ ދާއިރާގެ އިސްލާހަށް ނަގާ  ވޯޓަށް ، ހޮސްޕިޓަލުން ދޫކޮށްލާނެ ކަމުގެ ޔަގީންކަން އޭނާގެ ޑޮކްޓަރުން ދީފައިވާ ކަމަށެވެ.

މި އިސްލާހަށް އިދިކޮޅު ފަރާތްތަކާއެކު ނަތަންޔާހޫ ހުށަހަޅާފައިވާ ހުށަހެޅުންތަކަށް އެންމެ ފަހު ވަގުތު އެއްބަސްވުމަކަށް ވާސިލްވެވޭނެ ކަމަށް އޭނާ ދެކެއެވެ.

އިދިކޮޅު ފަރާތްތަކުން ދެކޭގޮތުގައި ޝަރުއީ ބަދަލުތަކުގެ މަގުސަދަކީ ކޮރަޕްޝަންގެ މައްސަލައިގައި ޝަރީއަތް ކުރިއަށްދާ ނަތަންޔާހޫ ކޯޓުގެ މިނިވަންކަމަށް ނުފޫޒުފޯރުވުންކަމަށެވެ. އެކަމަކު، ހަ ދައުރުގައި ބޮޑުވަޒީރުކަމުގެ ރެކޯޑް އޮތް، އިސްރާއީލުގެ ބޮޑުވަޒީރު ނަތަންޔާހޫ ވިދާޅުވަނީ މި އިސްލާހުތަކުގެ ސަބަބުން ސަރުކާރުގެ ގޮފިތައް ބެލެންސް ކުރެވޭނެ ކަމަށެވެ.