ރާއްޖޭގައި ޗުއްޓީ ހޭދަކުރި ޔޫކްރޭނުގެ ޤާނޫނު ހަދާ މަޖިލީހުގެ މެމްބަރެއްގެ މައްޗަށް އެ ގައުމުގެ ކަމާގުޅޭ އިދާރާތަކުން ޖިނާއީ ތަހުގީގެއް ފަށައިފިކަމަށް މަޢުލޫމާތި ލިބިއްޖެއެވެ.
ޔޫކްރޭނުގެ ތަޙްޤީޤީ އިދާރާތަކުން ޔޫރީ އަރިސްޓޯވަށް ކުރަނީ ދޮގު މައުލޫމާތު ދިނުމުގެ ތުހުމަތުކަމަށާއި، އެއީ ގައުމުން ބޭރަށް ދިޔުމުގެ ހުއްދަ ހޯދަން އޭނާ ދޮގު މައުލޫމާތު ދިން ކަމަށް ބެލެވޭތީ ކުރާ ދައުވާއެއްކަމަށާއި، އެ ދައުވާ ސާބިތުވެއްޖެ ނަމަ ތިން އަހަރުގެ ޖަލު ހުކުމެއް އަންނާނެ ކަމަށް ޚަބަރު ލިބިއެވެ.
އަރިސްޓޯވް އޭނާގެ އާއިލާއާ އެކު އިތާފުށި ރިސޯޓުގައި ޗުއްޓީ ހޭދަކުރީ ބޭސްފަރުވާ ކުރުމަށް ބުނެ ހޯދި ހުއްދައެއްގެ ދަށުން ކަމަށް ތަހުޤީޤުގައި ފާހަގަވެފައިވާއިރު، ރަޝިއާގެ ސިފައިން ޔޫކްރޭނަށް އަރައިގަތުމުން އެކަމާ ދެކޮޅަށް ހަނގުރާމަ ކުރަމުންދާ ދަނޑިވަޅެއްގައި، ގައުމުގެ އެންމެ މަތީ މަސްލަހަތު ހިމާޔަތްނުކުރެވޭ ދައުލަތުގެ އޮފިޝަލުންނަށް ޔޫކްރޭނުގެ ރައީސް ވޮލޮޑިމިއާ ޒެލެންސްކީ އިއްޔެ ވަނީ ވަރުގަދަ އިންޒާރެއް ދެއްވައިފައިވާ ކަންވެސް ފާހަގަކުރެވެއެވެ.
ތަޙްޤީޤު ފެށުމުން، އަރިސްޓޯވް ވަނީ މެމްބަރުން ކަމުން އިސްތިއުފާ ދެއްވިކަން ޔޫކްރޭނުގެ ޕާލިމަންޓަށް ރަސްމީކޮށް އަންގަވައިފައިވާކަން ޚަބަރުތައް ބުނެއެވެ.
ޔޫކްރޭނުގައި ދައުލަތުގެ އޮފިޝަލުން ޤައުމުން ބޭރުގައި ޗުއްޓީ ހޭދަކުރުން އޮންނަނީ މަނާކޮށްފައިކަމުން، އަސްކަރިއްޔާއަށް ޚިދުމަތް ކުރެވޭ އުމުރުގެ މީހުން ގައުމުން ބޭރުވާން ހާއްސަ ހުއްދަ އެއް ހޯދަންޖެހެއެވެ.
