އާޖެންޓީނާގެ ތަރިއަށް އަމްބާނީ އާއިލާއިން ވަނީ އެއް މިލިއަން ޑޮލަރަށްވުރެ އަގުބޮޑު، ފެންވަރުމަތީ ފަރުމާއެއްގެ ގަޑިއެއް ހަދިޔާކޮށްފައެވެ.
ލިއޮނަލް މެސީ ދާދިފަހުން އިންޑިއާއަށް ކުރި 'ގޯޓް ޓުއަރ 2025′ ދަތުރުގައި، އޭނާ އިންޑިއާގެ އެތްތަކާއެކު ވަގުތު ހޭދަކުރާ މަންޒަރުތަކާއި، ކަލްކަތާ އަދި މުމްބާއީގެ އެތައް ހާސް ސަޕޯޓަރުންގެ ލޯބި ލިބިގެންދިޔަ މަންޒަރުތަކަށްވުރެ މާ ފުން އަސަރުތަކެއް ވަނީ ދޫކޮށްލާފައެވެ.
މި ދަތުރުގައި އަމްބާނީ އާއިލާގެ މިލްކިއްޔާތުގައިވާ ޖަނަވާރުން ހިމާޔަތްކުރާ މަރުކަޒު 'ވަންތާރާ' އަށް ކުރި ޒިޔާރަތުގައި، މެސީއަށް ލިބުނު ހަދިޔާއަކާއެކު މުޅި ދުނިޔެ ވަނީ ހައިރާންކޮށްލާފައެވެ.
މެސީގެ މި ޒިޔާރަތަކީ ހަމައެކަނި ހަދިޔާ ބަދަލުކުރުމުގެ ދަތުރެއް ނޫނެވެ. އޭނާ ވަނީ ޖަނަވާރުން ހިމާޔަތްކުރުމުގެ ހަރަކާތްތަކުގައި ބައިވެރިވެ، އޭނާއަށް ދިން ހާއްސަ ޝަރަފެއްގެ ގޮތުން ސިންގާ ޅައަކަށް 'ލިއޮނަލް' ގެ ނަމުން ނަންދިން ރަސްމިއްޔާތުގައިވެސް ބައިވެރިވެފައެވެ. ނަމަވެސް، މި މުއްސަނދި މަރުހަބާގެ ރަމްޒަކަށް ވެގެންދިޔައީ، އޭގެ ފަންނީ ފަރުމާއާއި ލުއިކަމަށް މަޝްހޫރު 'ރިޗަޑް މިލް' ބްރޭންޑުގެ ގަޑިއެވެ.
މިލިއަން ޑޮލަރުގެ މި ހަދިޔާއިން ކަށަވަރުކޮށްދެނީ، މެސީއަކީ ކުޅިވަރުގެ ދާއިރާއަށްވުރެ މާ ފުޅާ ދާއިރާއެއްގައި ދުނިޔެ ބަލައިގަންނަ ޝަހުސިއްޔަތެއް ކަމެވެ. ބޮޑުވަޒީރު ނަރެންދުރަ މޯދީއާ ބައްދަލުކުރުމަށްފަހު އިންޑިއާގެ ދަތުރު ނިންމާލައި، މެސީ އެނބުރި ދިޔައީ ގައުމުގެ ލޯތްބާއެކު އެކަންޏެއް ނޫނެވެ. އޭނާގެ އަތުގައި މިހާރު އެވަނީ ދުނިޔޭގައިވާ އެންމެ އަގުބޮޑު އަދި ހޯދަން އުނދަގޫ އެއް އާސާރީ ގަޑިއެވެ.
އޭނާގެ އަތުގައި ހުރި އެހެން ގަޑިތަކާ ހިލާފަށް، އަމްބާނީން ދިން މި ހަދިޔާއަކީ 'ހައިޕަރ-ހޮރޮލޮޖީ' ނުވަތަ އިންތިހާއަށް ފެންވަރުމަތީ ގަޑިތަކުގެ ގިންތިއަށް ފެތޭ އެއްޗެކެވެ. މިއީ ދަތުރުވެރިންނަށް ހާއްސަކޮށް ފަރުމާކޮށްފައިވާ، ދެވަނަ ވަގުތެއް (ޖީއެމްޓީ) ބެލޭނެ ގޮތާއި، ރޭސިން ކާރެއްގެ ގިއަރު ބަދަލުކުރާ ނިޒާމާ އެއްގޮތަށް ފަންކްޝަންތައް ހޮވޭނެ ގޮތް ހިމެނޭ ގަޑިއެކެވެ. މުޅި ދުނިޔޭގައިވެސް މިފަދަ އެންމެ 12 ގަޑި އުފައްދާފައިވުމުން، މިއީ މެސީ މީގެ ކުރިން އަމިއްލައަށް ގަނެފައިވާ ކޮންމެ ގަޑިއަކަށްވުރެ އަގުބޮޑު އެއްޗެކެވެ.
