ހދ. ނައިވާދޫ ބަނދަރު ތަރައްޤީކުރުމުގެ މަޝްރޫޢުގެ 50 އިންސައްތަ މަސައްކަތް މިހާރު ނިމިފައިވާ ކަމަށް ބިނާރާއި ގެދޮރުވެރިކަމާއި ޢުމްރާނީ ތަރައްޤީއާބެހޭ ވުޒާރާއިން ހާމަކޮށްފިއެވެ. 2023 ވަނަ އަހަރުގެ ޖަނަވަރީ މަހު އެމްޓީސީސީއާ ޙަވާލުކޮށްގެން ކުރިއަށްގެންދާ މި މަޝްރޫޢުގެ ތެރެއިން މިހާރު ކުރިއަށްދަނީ ޖެޓީގެ ތަނބުތައް ކޮންކްރީޓްކުރުމުގެ މަސައްކަތްތަކެވެ.
މި މަޝްރޫޢުގެ ދަށުން މިހާތަނަށް އެއްގަމު ތޮށީގެ މަސައްކަތާއި، އައު ބަނދަރު ފުންކުރުމުގެ އިތުރުން، ރޭންޕާއި ބަލިމީހުން އަރާފޭބުމަށް ޚާއްސަ ޕްލެޓްފޯމުގެ މަސައްކަތްތައް ވަނީ ނިމިފައެވެ. މުޅި މަޝްރޫޢުގެ ދަށުން 231 މީޓަރުގެ އެއްގަމު ތޮށި ލުމާއި، 73 މީޓަރުގެ ރިވެޓްމަންޓް ޖެހުމާއި، 290 މީޓަރުގެ ބޭރު ތޮށި ލުމުގެ އިތުރުން ބަނދަރު ބައްތިއާއި ބަނދަރު ޕޭވްމަންޓް ހެދުމުގެ މަސައްކަތް ހިމެނެއެވެ.
ހދ. ނައިވާދޫ ބަނދަރު އަޕްގްރޭޑް ކުރުމުގެ މަޝްރޫޢު pic.twitter.com/2UoHPtRCBH
— Ministry of Infrastructure, Housing and Urban Dev. (@MIHUDmv) July 14, 2026
ނާއިވާދޫ ބަނދަރުގެ މި މަޝްރޫޢަކީ 51.3 މިލިޔަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ. ސަރުކާރުން ރަށްރަށުގެ ލަފާފުރުމުގެ ދަތިކަން ޙައްލުކުރުމަށް ހިންގާ މިފަދަ މަޝްރޫޢުތައް ނިމުމުން، ރަށްރަށަށް އަރާފޭބުމުގައްޔާއި ވިޔަފާރީގެ ދާއިރާއިން ރައްޔިތުންނަށް ބޮޑެތި ފަސޭހަތަކެއް ލިބިގެންދާނެއެވެ.
