ސައިންޓިފިކް އައު ދިރާސާއަކުން ދައްކާގޮތުގައި، މިއަދު މީހުން ތަހައްމަލުކުރަމުންދާ ނަފްސާނީ ގިނަ ގޮންޖެހުންތަކަކީ ހަމައެކަނި އަމިއްލަ މައްސަލަތަކެއް ނޫނެވެ. އޭގެ ބަދަލުގައި، މިއީ އިންސާނީ ސިކުނޑި އުފެދި ބައްޓަންވެފައިވާ ގޮތާއި، ޒަމާނީ މުޖުތަމައުގެ ބޭނުންތަކާ ދެމެދު އުފެދިފައިވާ ބޮޑު ފަރަގެއްގެ ނަތީޖާއެވެ. ސިންގަޕޫރުގެ ދިރާސާވެރިން ބުނާގޮތުގައި، އިންސާނާގެ ސިކުނޑި އެތައް ހާސް އަހަރެއްވަންދެން ބައްޓަންވެފައިވަނީ ކުދި، ގާތް ގުޅުންތަކެއް އޮންނަ މުޖުތަމައުތަކެއްގައި ދިރިއުޅުމަށެވެ. ނަމަވެސް، މިއަދު މީހުން ދިރިއުޅެމުންދަނީ ތޮއްޖެހިފައިވާ ސިޓީތަކާއި، މެދުނުކެނޑި ޑިޖިޓަލް ވަސީލަތްތަކާ ގުޅިފައިވާ، އަދި ޓެކްނޮލޮޖީއަށް އަންނަ ހަލުވި ބަދަލުތަކުން ފުރިފައިވާ މާހައުލެއްގައެވެ.
'ބިހޭވިއަރަލް ސައިންސަސް' ޖާނަލްގައި ޝާއިއުކޮށްފައިވާ މި ދިރާސާގައި ކިޔައިދީފައިވާ ގޮތުގައި، ކުރީގެ އިންސާނުންގެ ސިކުނޑި ތަރައްގީވެފައިވަނީ ވަގުތުން ކުރިމަތިވާ އަދި ދަންނަ ނުރައްކާތަކާ ކުރިމަތިލުމަށެވެ. އޭގެ ތެރޭގައި ކާނާ ހޯދުމާއި، ޝިކާރަކުރާ ޖަނަވާރުންގެ ކިބައިން ސަލާމަތްވުމާއި، ކުދި ޖަމާއަތްތަކުގެ ތެރޭގައި އިޖުތިމާއީ ގުޅުންތައް ދެމެހެއްޓުން ހިމެނެއެވެ. އިންސާނާގެ ތަރައްގީގެ މަރުހަލާގައި މި ހާލަތްތައް ބޮޑު ބަދަލެއް ނައިސް ދެމިއޮތުމުގެ ސަބަބުން، ލަފާކުރެވޭ އިޖުތިމާއީ އަދި ތިމާވެށީގެ ގޮންޖެހުންތަކަށް ހޭނުމުގެ ފުރުސަތު ސިކުނޑިއަށް ލިބުނެވެ.
މިއާ ހިލާފަށް، މިއަދުގެ ދުނިޔެ ފެންނަނީ މުޅިން ތަފާތު ގޮތަކަށެވެ. ސްމާޓްފޯނާއި ސޯޝަލް މީޑިއާ މެދުވެރިކޮށް މީހުންނަށް މެދުނުކެނޑި މައުލޫމާތު ލިބެމުންދާއިރު، އޮންލައިންކޮށް އެހެން މީހުންނާ އަޅާކިޔުމާއި، އިޖުތިމާއީ އަދި ވަޒީފާގެ ދާއިރާގެ އުނދަގޫ ފިއްތުންތަކާ ކުރިމަތިލާން ޖެހެއެވެ. ދިރާސާވެރިން ބުނާގޮތުގައި، މި ޒަމާނީ ހާލަތްތަކުގެ ސަބަބުން "އިވޮލިއުޝަނަރީ މިސްމެޗް" ނުވަތަ އުފެދުމުގައި ހުރި ސިފަތަކާ ނުބައްދަލު ހާލަތެއް އުފެދެއެވެ. މިއީ ސިކުނޑި ތަހައްމަލުކުރުމަށް ފަރުމާކުރެވިފައި ނުވާ މާހައުލުތަކަކަށް ހޭނުމަށް ސިކުނޑި ކުރާ މަސައްކަތެކެވެ.
ސައިންސްވެރިން ގަބޫލުކުރާ ގޮތުގައި، ދިގު މުއްދަތުގެ ސްޓްރެސް، އެކަނިވެރިކަން، ހާސްކަން އަދި ނަފްސާނީ ގޮތުން ވަރުބަލިވުން އިތުރުވަމުންދާ ސަބަބަކީ މިއީ ކަމަށް ވެދާނެއެވެ. މި މައްސަލަތަކަކީ ހަމައެކަނި ފަރުދީ ނަފްސާނީ މައްސަލަތަކެއްގެ ގޮތުގައި ދެކުމުގެ ބަދަލުގައި، އިންސާނާގެ އަސްލު ތަބީއަތާ ނުބައްދަލު މާހައުލުތަކަކަށް ހަށިގަނޑުން ދޭ ގުދުރަތީ އިޖާބައެއްގެ ގޮތުގައި ބެލުމަށް އެ ބޭފުޅުން ލަފާދެއްވައެވެ.
މީގެ އިތުރުން، ޒަމާނީ މުޖުތަމައުތަކަށް ކުރިމަތިވެފައިވާ ފުޅާ "ޕޮލީކްރައިސިސް" ނުވަތަ އެކި ދާއިރާތަކުން ކުރިމަތިވާ މައްސަލަތަކަށްވެސް މި ދިރާސާގައި އަލިއަޅުވާލާފައިވެއެވެ. މޫސުމަށް އަންނަ ބަދަލުތަކާއި، އިގްތިސާދީ ނުތަނަވަސްކަމާއި، ބަލިމަޑުކަމާއި، އަދި އާޓިފިޝަލް އިންޓެލިޖެންސް ފަދަ ޓެކްނޮލޮޖީތައް ހަލުވިކަމާއެކު ކުރިއަރަމުން ދިއުމަކީ، ރައްކާތެރިކަން ކުޑަވުމާއި ވާދަވެރިކަމުގެ އިހުސާސްތައް އިތުރުކޮށްދޭ ކަންކަމެވެ. މި ހުރިހާ ގޮންޖެހުންތަކެއް އެކުވުމުން، ކަންކަން ކޮންޓްރޯލްކުރުމުގެ ބާރު ކުޑަވެ، ނަފްސާނީ ދުޅަހެޔޮކަމަށް އިތުރު ބުރައެއް އުފުލަން ޖެހެއެވެ.
މި މައްސަލަތަކަށް ހައްލެއް ހޯދުމަށްޓަކައި، އިންސާނާގެ ނަފްސާނީ ބޭނުންތަކާ ގުޅޭގޮތަށް މާހައުލުތައް ފަރުމާކުރުމަށް ދިރާސާވެރިން ހުށަހަޅައެވެ. މީގެ ތެރޭގައި ސިޓީތަކުގައި ފެހި ސަރަހައްދުތައް އިތުރުކުރުމާއި، ސިޓީގެ މާހައުލަކީ ނަފްސާނީ ގޮތުން ބުރަ ނުވާނެ ތަންތަނަށް ހެދުމާއި، އަދި ސިއްހަތަށް ނުރަނގަޅު ވާދަވެރިކަމާއި އަޅާކިޔުންތައް މަދުކުރާނެ ފަދަ ޑިޖިޓަލް ޕްލެޓްފޯމްތައް އުފެއްދުން ހިމެނެއެވެ. މިފަދަ ބަދަލުތަކުގެ ސަބަބުން ނަފްސާނީ ދުޅަހެޔޮކަމަށް އެހީތެރިވެދީ، އާންމު ދިރިއުޅުމުގެ ފެންވަރު ރަނގަޅުވާނެ ކަމަށް އެ ބޭފުޅުން ބުނެއެވެ.
މި ތިއަރީ އިތުރަށް ކަށަވަރުކުރުމަށް އަމަލީ ދިރާސާތަކެއް ބޭނުންވާކަން ދިރާސާވެރިން ގަބޫލުކުރި ނަމަވެސް، އިންސާނާގެ ތަބީއަތާއި ޒަމާނީ ދިރިއުޅުމާ ދެމެދު އޮތް މި ފަރަގު ދެނެގަތުމަކީ، މުސްތަގުބަލުގައި އާންމު ސިއްހަތުގެ ސިޔާސަތުތައް ބައްޓަންކުރުމަށް ލިބޭނެ ބޮޑު އެހީއެއް ކަމަށް އެ ބޭފުޅުން ގަބޫލުކުރެއެވެ.އިންސާނާގެ ސިކުނޑި ފަރުމާވެފައިވަނީ މިއަދާ މުޅިން ތަފާތު ދުނިޔެއަކަށްކަން ގަބޫލުކޮށް، ސިޔާސަތުތައް ކަނޑައަޅާ ފަރާތްތަކާއި ޕްލޭނަރުންނަށް، ދުވަހުން ދުވަހަށް އޮޅުންބޮޅުން ބޮޑުވަމުންދާ މި މުޖުތަމައުގައި ނަފްސާނީ ދުޅަހެޔޮކަމަށް ބާރުއަޅާ ފަދަ މުޖުތަމައުތަކާއި، މަސައްކަތުގެ މާހައުލުތަކާއި، އަދި ޑިޖިޓަލް މައިދާންތައް ބިނާކުރެވިދާނެއެވެ.
