ވިލިމާލޭގައި ތަރައްޤީކުރި ސިފައިންގެ މެރިޓައިމް ރެސްކިޔު ކޯޑިނޭޝަން ސެންޓަރު (އެމްއާރުސީސީ) ގެ އައު އިމާރާތް ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު ހުޅުއްވައިދެއްވައިފިއެވެ.
ޖަޕާނު ސަރުކާރުގެ ފަންޑާއެކު، ޔޫއެންއޯޑީސީގެ ވިލަރެސްކުރުމުގެ ދަށުން ތަރައްޤީކުރި މި އިމާރާތުގެ ބިންގާ 2022 ގައި އެޅި ނަމަވެސް، މަސައްކަތް ލަސްވުމާ ގުޅިގެން ރައީސް މުޢިއްޒު ވަނީ ކޯސްޓްގާޑުގެ ޤާބިލުކަން އިތުރުކުރުމުގެ ސިޔާސަތުގެ ދަށުން އެ މަސައްކަތް އަވަސްކޮށްދެއްވާފައެވެ. އަދި މި އިމާރާތަށް ބޭނުންވާ ވަސީލަތްތައް ހޯދުމުގައި އޮސްޓްރޭލިޔާ ސަރުކާރުގެ އެހީތެރިކަންވެސް ލިބިފައިވެއެވެ.
ޒަމާނީ އޮޕަރޭޝަންސް ރޫމަކާއި، ކްލާސްރޫމްތަކާއި އޮޑިޓޯރިއަމް ހިމެނޭ މި އިމާރާތުގެ ސަބަބުން ކަނޑާއި ވައިގެ މަގުން ހިނގާ ނުރައްކާތެރި ހާދިސާތަކުން ފުރާނައާއި މުދާ ސަލާމަތްކުރުމަށް ކުރެވޭ މަސައްކަތްތައް އިތުރަށް ހަރުދަނާވެގެންދާނެއެވެ.
2006 ގައި "ޖީއެމްޑީއެސްއެސް" ނަމުގައި ފެށި މި ޚިދުމަތް 2012 ގައި "އެމްއާރުސީސީ" އަށް ބަދަލުކުރެވުނުއިރު، ފާއިތުވި 10 އަހަރު ތެރޭގައި 3,713 ހާދިސާއަކާ ގުޅިގެން 8,359 އަށްވުރެ ގިނަ މީހުންගේ ފުރާނައާއި މުދާ ސަލާމަތްކުރުމުގެ ކާމިޔާބު އޮޕަރޭޝަންތައް ވަނީ ހިންގާފައެވެ.
