މަނަދޫ އަޒީގެ ޅެންހާރު: ހަމަަޙަޤީޤަތުގައިވެސް

*ރާގު! ހިޔަލަށް އެގުލްޝަނުގެ.،…

ދަތިޙާލުގައި އުޅުން މިއޮތީ ނިކަމެތީންނަށޭ
ދަތިތައް ތުރާތަކާ މިހުރީ ނިކަމެތީންނަށޭ

ދިރިއުމުގައި އަވަދިނެތި ކުރެވޭ މަސައްކަތުން
ދިރިއުޅުމުގައި ލުޔެއް މިނެތީ ނިކަމެތީންނަށޭ
ތަކެތީގެ އަގު އުފުލިދިއުމުން އަތުނުވާފަށަށް
ތަކެތީގެ ބާރު ބޮޑުވެދަނީ ނިކަމެތީންނަށޭ
މަޖުބޫރުތައް ވަށައިގެން ކުރިމަތިވެދާހިނދުން
މަޖުބޫރުގައި ފެތުން މިއޮތީ ނިކަމެތީންނަށޭ
ހިންދެމިނުލާ އަބަދުތިބެ ބުރަތައް އުފުއްލުމުން
މިންޖެއްވެދާނެގޮތް މިނެތީ ނިކަމެތީންނަށޭ
ބާރެއްއަރާލިނަމަ ކުޑަވެސް ނަވުގެ މައިކެނބަށް
ތާއްޓެއްތެރޭ އުޅެންޖެހެނީ ނިކަމެތީންނަށޭ
މައިސޯބު ބާރުބޮޑުވެ ހިނގުން ދަތިވެލާއިރަށް
ބައިލާހި ނުރުހި ކާންޖެހެނީ ނިކަމެތީންނަށޭ
ބޭނުންވިޔަސް އަރާމު ޙަޔާތެއްގެ ދިރިއުޅުން
ވޭނެއްމެނޫން ނެތީ އުފުލަން ނިކަމެތީންނަށޭ
ދުވަހެއް ރަނގަޅުލިބޭނެކަމަށް "ކުޅުދިޔާވެފައި"
ހުވަފެންދެކެން ތިބުން މިއޮތީ ނިކަމެތީންނަށޭ
ޖަޒުބާތުތައް އުތުރިކެކި ބަންޑުންވެ އޮހިގަތަސް
ޢަޒްމެއް ދިރޭނެ ރޫޙުނެތީ ނިކަމެތީންނަށޭ

30 ޖޫން 2026
*عبدالعزيز قاسم
ލިލީ ނ.މަނަދޫ