އެމެރިކާގެ އުމުރުން 63 އަހަރުގެ އަންހެނަކަށް ދިމާވި ވޭންދެނިވި ބަނޑުގެ ބައްޔަކަށް، ޑޮކްޓަރުން ހީނުކުރާ ފަދަ ފަރުވާއެއް ކަމަށްވާ ޑައިޓް ކޯކް ބޭނުންކޮށްގެން ކާމިޔާބުކަމާއެކު ފަރުވާ ދިނުމުން، އޭނާ ވަނީ އެ ބަލިން ފަސޭހަވެފައެވެ.
ނިއު އިންގްލެންޑް ޖާނަލް އޮފް މެޑިސިންގައި ދާދި ފަހުން ތަފްސީލުކޮށްފައިވާ މި އާދަޔާ ހިލާފު ހާދިސާގައި ހިމެނެނީ، މެސެޗުސެޓްސްގެ ބޮސްޓަންގައި ހުންނަ ބްރިގަމް އެންޑް ވިމެންސް ހޮސްޕިޓަލުގައި އެޑްމިޓްކުރި އަންހެނެކެވެ. އޭނާ އެޑްމިޓްކުރީ ބަނޑުގައި ވަރަށް ބޮޑަށް ރިއްސުމާއި، މޭނުބައިކުރުމާއި، ތަކުރާރުކޮށް ހޮޑުލެވޭތީއެވެ.
އިމަޖެންސީ ފަރުވާއަށް ދިއުމުގެ ކުރިން، އޭނާ ވަނީ މޭ އެންދުމަށް އާންމުކޮށް ބޭނުންކުރާ ދެ ބޭހެއް ބޭނުންކޮށްފައެވެ. ނަމަވެސް އޭނާގެ ބަލި ހާލަތަށް އެއްވެސް ބަދަލެއް ނައެވެ. އެއަށްފަހު ޑޮކްޓަރުން އޭނާގެ މެޑިކަލް ހިސްޓްރީ ބެލިއިރު، އޭނާގެ ކިބައިގައި ސިއްހީ އެތައް މައްސަލަތަކެއް ހުރިކަން އެނގުނެވެ. އޭގެ ތެރޭގައި ޓައިޕް 2 ހަކުރުބަލި، ސްޓޭޖް 2 ގެ ކިޑްނީ ބަލި، ގޭސްޓްރޯއީސޮފޭޖިއަލް ރިފްލަކްސް ޑިޒީޒް އަދި އޮޕިއޮއިޑް ބޭނުންކުރުމުގެ އާދަ ހިމެނެއެވެ.
މީގެ އިތުރުން، އެ ބަލިމީހާ އައީ ހަކުރުބައްޔަށާއި ބަރުދަން ލުއިކުރުމަށް އާންމުކޮށް ދޭ GLP-1 ބޭހެއް ކަމަށްވާ ސެމަގްލޫޓައިޑް ގާތްގަނޑަކަށް އަހަރެއްހާ ދުވަހު ބޭނުންކުރަމުންނެވެ. އެ މުއްދަތުގެ ތެރޭގައި އޭނާގެ ބަރުދަނުން ގާތްގަނޑަކަށް 18 ކިލޯގްރާމް (އެއީ އޭނާގެ ހަށިގަނޑުގެ ބަރުދަނުގެ ގާތްގަނޑަކަށް 19 އިންސައްތަ) ލުއިވެފައިވެއެވެ.
ބަލީގެ އަސްލު ދެނެގަތުމަށްޓަކައި، ޑޮކްޓަރުން ވަނީ މެގްނެޓިކް ރެޒޮނަންސް ކޮލަންޖިއޯޕެންކްރިއޭޓޯގްރަފީއެއް ހަދާފައެވެ. މިއީ ފިތާއި، ޗިލްމާއި، ބައިލް ޑަކްޓްތައް ބެލުމަށް ހަދާ ހާއްސަ ސްކޭނެކެވެ. މި ސްކޭނުން ދެއްކި ގޮތުގައި އޭނާގެ ބައިލް ޑަކްޓްތައް ދުޅަވެފައިވާއިރު، ބަނޑުގެ ތެރޭގައި ވައި ބަންދުވެފައިވާ ކަމަށް ބެލެވޭ އެއްޗެއް އޮތެވެ.
އެއަށްފަހު ހެދި އެންޑޯސްކޯޕީން ކަށަވަރުވީ އެ އަންހެންމީހާގެ ބަނޑުގައި "ގޭސްޓްރިކް ބެޒޯއާ" (އެބަހީ ބަނޑުގެ ތެރޭގައި ރަނގަޅަށް ހަޖަމުނުވެ ނުވަތަ ބައިކުޅަބައި ހަޖަމުވެފައި ހުރި ތަކެތި) އެއްވެ ބޮޑު ގަނޑަކަށް ވެފައިވާ އެއްޗެއް އުފެދިފައިވާ ކަމެވެ. ޑޮކްޓަރުން ލަފާކުރި ގޮތުގައި، ސެމަގްލޫޓައިޑް ފަދަ GLP-1 ބޭސްތަކުގެ ސައިޑް އިފެކްޓެއްގެ ގޮތުން ބަނޑު ހުސްވުން ލަސްވުމަކީ މި ބެޒޯއާ އުފެދުމަށް މެދުވެރިވި ސަބަބަކަށް ވެދާނެއެވެ.
އާންމުކޮށް ގޭސްޓްރިކް ބެޒޯއާ ނަގަނީ އޮޕަރޭޝަން ކޮށްގެން ނުވަތަ އެންޑޯސްކޯޕީ ބޭނުންކޮށްގެން ކުދިކުދި ކޮށްލައިގެންނެވެ. ނަމަވެސް، ފަހަކަށް އައިސް ޑޮކްޓަރުން ދަނީ މާ ބޮޑު އޮޕަރޭޝަނަކާ ނުލައި ފަރުވާ ދެވޭ ގޮތެއް ކަމަށްވާ ކޯލާ ބޭނުންކުރުމަށް އިސްކަންދެމުންނެވެ.
މެޑިކަލް ޓީމުން ބުނާ ގޮތުގައި، ކުރީގެ ރިޕޯޓްތަކުން އެނގޭ ގޮތުގައި 12 ގަޑިއިރުގެ ތެރޭގައި ގާތްގަނޑަކަށް ތިން ލިޓަރުގެ ކޯލާ ބުއިމުން ނުވަތަ ނޭފަތުން ލައްވާ ހޮޅިއެއް މެދުވެރިކޮށް ބަނޑަށް ފޮނުވުމުން، ބައެއް ބާވަތުގެ ބެޒޯއާ ގިރުވާލުމަށް އެހީތެރިވެދެއެވެ. ދިރާސާވެރިން ބުނަނީ މި ގަނޑު ކުދިކުދިވަނީ އެ ބުއިމުގައި ހުންނަ އެސިޑްގެ ސަބަބުން ކަމެއް، ގޭހުގެ ސަބަބުން ކަމެއް ނުވަތަ އެހެން ސިފައެއްގެ ސަބަބުން ކަމެއް އަދި ސާފުނުވާ ކަމަށެވެ.
ބަލިމީހާގެ ހަކުރުބަލި ހުރުމުގެ ސަބަބުން، ޑޮކްޓަރުން ނިންމީ އާދައިގެ ކޯލާގެ ބަދަލުގައި ޑައިޓް ކޯކް ބޭނުންކުރުމަށެވެ. އަދި އޭނާއަކީ ގޭސް ހުންނަ ބުއިންތަކަށް މާ ގަޔާވާ މީހަކަށް ނުވާތީ، އާންމުކޮށް ދޭ ތިން ލިޓަރުގެ ބަދަލުގައި ފަރުވާގެ މިންވަރު 1.5 ލިޓަރަށް މަދުކުރިއެވެ.
މީގެ ނަތީޖާ ފެނުނީ ވަރަށް އަވަހަށެވެ. 24 ގަޑިއިރުގެ ތެރޭގައި، ބަނޑަށް ކުއްލި ލުއިކަމެއް ލިބި، މޭނުބައިކުރުމާއި ރިއްސުން ވަރަށް ބޮޑަށް ކުޑަވިއެވެ. ބަނޑުގައި އޮތް ބެޒޯއާ ކާމިޔާބުކަމާއެކު ގިރިގެން ދިއުމުން، އޮޕަރޭޝަނެއް ނުވަތަ އެހެން އުނދަގޫ ފަރުވާއެއް ކުރަން ނުޖެހުނެވެ.އޭނާ މުޅިން ބަލިފަސޭހަވެ، ހޮސްޕިޓަލުން ދޫކޮށްލުމުގެ ކުރިން އާންމުކޮށް ކައިބޮއި އުޅޭ ތަކެތި ކާން ފެށިއެވެ. އަދި މެޑިކަލް ސުޕަވައިޒަރުންގެ އިރުޝާދުގެ ދަށުން ސެމަގްލޫޓައިޑް ބޭނުންކުރުން ހުއްޓާލިއެވެ.
ޑޮކްޓަރުން ފާހަގަކުރެއްވި ގޮތުގައި މިއީ ވަރަށް ގާތުން ބަލައިގެން ހޮސްޕިޓަލުގައި ދިން ފަރުވާއެކެވެ. އަދި މިއީ ގޭގައި އަމިއްލައަށް ކުރަންޖެހޭ ކަމެއް ނޫނެވެ. ބައެއް ކަހަލަ 'ގެސްޓްރިކް ބެޒޯސް' (ބަނޑުގައި އުފެދޭ ގަނޑުތައް) ގިރުވާލުމަށް ކޯލާ ބޭނުންކޮށްގެން ކާމިޔާބު ނަތީޖާތަކެއް ފެނިފައިވީ ނަމަވެސް، ބަނޑުގައި ގަދައަށް ރިއްސުން، ހޮޑުލެވުން ނުވަތަ އެފަދަ އަލާމާތެއް ފެންނަ ނަމަ، އަމިއްލައަށް ފަރުވާކުރުމުގެ ބަދަލުގައި ވަގުތުން ޑޮކްޓަރެއްގެ އެހީތެރިކަން ހޯދުމަށް ޑޮކްޓަރުން ބާރުއަޅުއްވައެވެ.
