ސްކޫލު ޗުއްޓީގެ ދުވަސްވަރު އާއިލާތަކުގެ ދުޅަހެޔޮކަން ކުރިއެރުވުމަށާއި ސިއްހަތަށް ފައިދާހުރި ރަނގަޅު އާދަތައް އަށަގަންނުވަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.
ފުރަތަމަ ޓާމްގެ ކިޔެވުން ނިމި ސްކޫލުތައް ދެ ހަފުތާއަށް ބަންދުކޮށްފައިވާއިރު، އެޗްޕީއޭއިން ވަނީ އާދަކުރަންވީ މުހިންމު ފަސް ކަމަކަށް އަލިއަޅުވާލާފައެވެ.
އެޗްޕީއޭގެ އިރުޝާދުތަކުގެ ތެރޭގައި ހިމެނޭ މުހިންމު ބައިތައް:
-
ކެއިންބުއިމުގެ އާދަތައް ރަނގަޅުކުރުން: ހަކުރާއި ޓްރާންސް ފެޓް ގިނަ ކާނާއާ ދުރުހެލިވުމަށާއި، ކަރުހިއްކުން ފިލުވުމަށް ފެން ބޭނުންކުރުމަށް އިރުޝާދުދީފައިވެއެވެ. އަދި ކޮންމެ ދުވަހެއްގެ ކެއުމުގައި ތަރުކާރީއާއި މޭވާ ހިމެނުމަށާއި، ބަރުދަން ހިފެހެއްޓުމަށްޓަކައި މެދު މިނެއްގައި ކެއުމަށް އިލްތިމާސްކޮށްފައިވެއެވެ.
-
ދުންފަތުގެ ދުމުން ރައްކާތެރިވުން: ކުޑަކުދިން އުޅޭ މާހައުލުތަކާއި ގޭތެރޭގައި ދުންފަތުގެ އިސްތިއުމާލު ނުކުރުމަށް ގޮވާލާފައިވަނީ، އޭގެ ސަބަބުން ކުދިންނަށް ނޭވާލާ ނިޒާމުގެ ބަލިތަކާއި އެސްމާ ފަދަ މައްސަލަތައް ކުރިމަތިވާތީއެވެ.
-
ހެލިފެލިވެ އުޅުމާއި ކަސްރަތު: ޖިސްމާނީ އަދި ނަފްސާނީ ދުޅަހެޔޮކަމަށްޓަކައި އާއިލާ އެކުގައި ކޮންމެ ދުވަހަކު ހިނގާލަން ދިއުން ފަދަ ހަރަކާތްތަކުގައި ބައިވެރިވުމަށް ބާރުއަޅާފައިވެއެވެ.
-
ސްކްރީން ޓައިމް މަދުކުރުން: ސްމާޓްފޯނާއި ޓެބްލެޓް ފަދަ ތަކެއްޗަށް ހޭދަކުރާ ވަގުތު މަދުކޮށް، ގޭތެރޭގައާއި ބޭރުގައި ކުޅޭ ކުޅިވަރުތަކުގައި ކުދިން ބައިވެރިކުރުވުމަކީ ވިސްނުން ތޫނުވެ އުފެއްދުންތެރިކަން އިތުރުވާނެ ކަމެކެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ތަފާސްހިސާބުތަކުން ދައްކާ ގޮތުގައި ރާއްޖޭގައި މަރުވާ މީހުންގެ 84 އިންސައްތަ މަރުވަނީ ހަކުރުބަލި، ހިތުގެ ބަލި، އަދި ކިޑްނީގެ ބަލިތައް ފަދަ ގައިންގަޔަށް ނާރާ ބަލިތަކުގައެވެ. މި ބަލިތައް އިތުރުވަނީ ހެލިފެލިވެ ނޫޅުމާއި، ދުންފަތުގެ އިސްތިއުމާލުކުރުމާއި، ސިއްހަތަށް ގެއްލުންހުރި ކާނާ ކެއުމުން ކަމަށްވުމާއެކު، ކުޑައިރުއްސުރެ މިފަދަ ރަނގަޅު އާދަތައް އަށަގަންނުވަން މައިންބަފައިން ނަމޫނާ ދެއްކުން މުހިންމު ކަމަށް ތަޖުރިބާކާރުން ފާހަގަކުރެއެވެ. އެޗްޕީއޭގެ އަމާޒަކީ ޗުއްޓީގައި ފަށާ މި ދުޅަހެޔޮ އާދަތައް، ސްކޫލް ހުޅުވުމަށްފަހުވެސް ދިރިއުޅުމުގެ ބައެއްގެ ގޮތުގައި ދެމެހެއްޓުމެވެ.
