ބޮލީވުޑްގެ މަޝްހޫރު ފިލްމު "ކުޗް ކުޗް ހޯތާ ހޭ" ގައި އަންޖަލީގެ ރޯލުން ފެނިގެންދިޔަ ބަތަލާ ސަނާ ސައީދު ވަނީ، އޭނާ ތަހައްމަލުކުރި ކެއުމުގެ ނިޒާމަށް އަންނަ ބައްޔެއް ކަމަށްވާ "ބުލީމިއާ" އާ ބެހޭގޮތުން ފުރަތަމަ ފަހަރަށް ފާޅުގައި ވާހަކަދައްކާފައެވެ. ހިިންދުސްތާން ޓައިމްސްއަށް ދިން އިންޓަވިއުއެއްގައި ސަނާ ވަނީ، ހިކިކޮށް ހުރުމަށް މުޖުތަމައު ބާރުއަޅާ މިންގަނޑުތަކުގެ ސަބަބުން އޭނާގެ ނަފްސާނީ ދުޅަހެޔޮކަމަށާއި ކެއުމާ މެދު އޮތް ގުޅުމަށް ކުރި ނޭދެވޭ އަސަރުތަކުގެ ތަފްސީލު ހިއްސާކޮށްފައެވެ.
ސަނާ ކިޔައިދިން ގޮތުގައި، އޭނާ ބޮޑުވަމުން އައިއިރު "ބުލީމިއާ" ނުވަތަ "އީޓިން ޑިސްއޯޑާ" ފަދަ ލަފުޒުތަކަކީ އޭނާއަށް އެނގޭ އެއްޗެއް ނޫނެވެ. އޭގެ ބަދަލުގައި، އޭނާއަށް ކުރިމަތިވަމުންދިޔަ އުނދަގޫތަކަކީ އަމިއްލަ ނުކުޅެދުންތެރިކަމެއް ނުވަތަ އަމިއްލައަށް އިސްލާހުކުރަންޖެހޭ ގޯސް އާދައެއްގެ ގޮތުގައި އޭނާ ދެކުނެވެ. އަދި މިފަދަ ކަމެއް ތަހައްމަލުކުރާ ހަމައެކަނި މީހަކީ އޭނާ ކަމަށް ގަބޫލުކުރެވުމުން، އެކަމާ އިންތިހާއަށް ލަދުގަތް ކަމަށްވެސް އޭނާ ބުންޏެވެ.
މި ބަލީގައި ގާތްގަނޑަކަށް ހަ އަހަރު ހޭދަކުރިއިރު، އޭނާއަށް ވަމުންދަނީ ކީއްކަން އޭރު ނޭނގޭ ކަމަށް ސަނާ ބުންޏެވެ. ކެއުމުގެ އާދަތައް ރަނގަޅުކުރުމަށް އޭނާ ކުރި މަސައްކަތުގެ ތެރެއިން، ބަލިން ފަސޭހަވުމަށް އެހީތެރިވެދޭ ފޮތެއް ފެނި، އޭނާގެ ހާލަތަކީ ބައްޔެއްކަން ދެނެގަނެވުނެވެ. ސަނާ ބުނި ގޮތުގައި، ބަލި ދެނެގަނެވުމަކީ ފަރުވާގެ ފެށުމެވެ. އަދި މި ބަލިން މުޅިން ފަސޭހަވުމަށް ހަތަރު އަހަރު ނެގި ކަމަށް އޭނާ ހާމަކުރިއެވެ.
މިފަދަ ބަލިތަކާ ބެހޭ މައުލޫމާތު ކުރިން އެނގުނު ނަމަ، މާ އަވަހަށް އެހީތެރިކަން ހޯދުނީސް ކަމަށް ސަނާ ބުންޏެވެ. އޭނާގެ ތަޖުރިބާ އާންމުންނާ ހިއްސާކުރަން ނިންމީ، އޭނާގެ ވާހަކައިގެ ސަބަބުން އެހެން މީހުންނަށް އެއީ އެކަނި ތަހައްމަލުކުރާ ކަމެއް ނޫންކަން އިހުސާސްވެ، އެހީތެރިކަން ހޯދުމަށް ހިތްވަރު ލިބޭނެތީ ކަމަށްވެސް އޭނާ ބުންޏެވެ.
މީގެ އިތުރުން، ބަރުދަން ލުއިކުރުމުގެ ފިއްތުންތަކަކީ ހަމައެކަނި މުނިފޫހިފިލުވުމުގެ ދާއިރާގައި އޮތް ކަމެއް ނޫން ކަމަށާއި، މުޅި މުޖުތަމައުގައިވެސް އެކަން އޮތްކަން އޭނާ ފާހަގަކުރިއެވެ. ކޮލެޖު ދުވަސްވަރުގެ ހަނދާންތައް އާކުރަމުން ސަނާ ބުނީ، އޭނާގެ ވަށައިގެން އުޅުނު ގިނަ އަންހެން ކުދިންނަކީ އަބަދުވެސް ޑައިޓްކުރުމާއި، ބަރުދަން ލުއިކުރުމާއި، ހަށިގަނޑަށް ބަދަލު ގެނައުމުގެ ވާހަކަ ދައްކާ ކުދިން ކަމަށެވެ.
އެ ދުވަސްވަރަކީ "ސައިޒް ޒީރޯ" ނުވަތަ އިންތިހާއަށް ހިކިކޮށް ހުރުމަކީ ވަރަށް ބޮޑަށް ބަލައިގަތް ދުވަސްވަރެއްގެ ގޮތުގައި އޭނާ ސިފަކުރިއެވެ. ކާނާގެ މާއްދާތަކާއި، ހަށިގަނޑުގެ ވަރުގަދަކަމާއި، ދިގު މުއްދަތުގެ ދުޅަހެޔޮކަމަށް ވިސްނުމުގެ ބަދަލުގައި، ގިނަ ބަޔަކު ސަމާލުކަން ދިނީ ކަސްރަތުކޮށްގެން ބަރުދަން ލުއިކުރުމަށް ކަމަށް އޭނާ ބުންޏެވެ.
މީހެއްގެ ހާލަތު ހުރި ގޮތަކަށް ނުވަތަ ނުރަނގަޅު އާދަތަކުގެ ސަބަބުން އަމިއްލަ ނަފްސަށް ގެއްލުން ދެމުންދާކަމަށް ބެލުމެއް ނެތި، ގިނަ ފަހަރަށް ތައުރީފު ލިބެނީ ހަމައެކަނި ހިކުމުން ކަމަށް ސަނާ ފާހަގަކުރިއެވެ. އަދި ފިލްމީ ދާއިރާގައި އެކްޓަރުންގެ ސިފައަށާއި ހަށިގަނޑަށް ބަލައި ފާޑުކިޔާތީ، މި ފިއްތުންތައް އެ ދާއިރާގައި އިތުރަށް ބޮޑުވާ ކަމަށް އޭނާ ބުންޏެވެ.
އެހެންނަމަވެސް، އޭނާއަށް ދިމާވި ކަންތައްތަކުގައި ވަކި މީހަކު ނުވަތަ ވަކި ހާދިސާއެއް ކުށްވެރިނުކުރާ ކަމަށް ސަނާ ބުންޏެވެ. އޭގެ ބަދަލުގައި، އޭނާގެ ޒުވާން ދުވަސްވަރަކީ އަމިއްލަ ސިފައާއި އަމިއްލަ ވަކިވަކި ސިފަތަކާ ދެމެދު ހުރި ތަފާތު ދެނެގަންނާނެ މައުލޫމާތާއި ވަސީލަތްތައް ނެތް ދުވަސްވަރެއްގެ ގޮތުގައި އޭނާ ދެކެއެވެ.
ދިރިއުޅުމުގެ އުފާ ހޯދުމުގެ ބަދަލުގައި، ހަށިގަނޑުގެ ސިފަ ރީތިކުރުމަށް މާ ބޮޑަށް ހަކަތަ ހޭދަކުރެވުނުކަން އޭނާއަށް އިހުސާސްވީ މަޑުމަޑުން ކަމަށް ސަނާ ބުންޏެވެ. "ސްޓޫޑަންޓް އޮފް ދަ އިޔާ" ފަދަ ފިލްމުތަކުން ފެނިގެންދިޔަ ސަނާ މިހާރު ދިރިއުޅެނީ ލޮސް އެންޖެލިސްގައެވެ. އޭނާ މިހާރު މަސައްކަތް ކުރަމުންދަނީ ޕްރޮޑިއުސަރެއް އަދި ކޮންޓެންޓް ކްރިއޭޓަރެއްގެ ގޮތުގައި ކުރިއަށް ދިއުމަށެވެ.ކެއުމުގެ ނިޒާމަށް އަންނަ ބަލިތަކާއި، ރީތިކަމާ މެދު ގެންގުޅޭ ހަގީގަތާ ނުބައްދަލު އުންމީދުތަކުގެ ސަބަބުން ކުރާ އަސަރުތަކަށް ހޭލުންތެރިކަން އިތުރުކުރުމަކީ، އޭނާ ތަހައްމަލުކުރި ދަތިތަކުގެ ވާހަކަ ހިއްސާކުރުމުގެ މަގުސަދެވެ.
