މަސައްކަތާއި އާއިލީ ޒިންމާތައް ބެލެންސް ކުރުމަކީ އާންމު ސިއްހަތާ ގުޅުންހުރި މުހިންމު ކަމަކަށް ވަމުންދާއިރު، މި ދެކަންތައް އެއްކޮށް ކުރިއަށް ގެންދިއުމުގައި ކުރިމަތިވާ ފިއްތުންތަކުގެ ސަބަބުން ނަފްސާނީ އަދި ޖިސްމާނީ ދުޅަހެޔޮކަމަށް ސީރިއަސް އަސަރުތަކެއް ކޮށްފާނެ ކަމުގެ އިންޒާރު ދިރާސާވެރިން ދެއެވެ. މި ދިރާސާ ބިނާކޮށްފައިވަނީ އެމެރިކާއަށް ކަމަށްވީ ނަމަވެސް، މީގެ ނަތީޖާތަކަކީ ދިވެހިރާއްޖެ ހިމެނޭހެން މަސައްކަތްތެރި ގިނަ މުޖުތަމައުތަކަކާ ގުޅުންހުރި ކަންތައްތަކެކެވެ.
'ޕަބްލިކް ހެލްތު އިން ޕްރެކްޓިސް' މަޖައްލާގައި ޝާއިއުކޮށްފައިވާ ރިޕޯޓެއްގައި ބުނެފައިވާ ގޮތުގައި، މަސައްކަތާއި އާއިލީ ފުށުއެރުންތައް އުފެދެނީ މަސައްކަތުގެ ޒިންމާތަކުގެ ސަބަބުން އާއިލީ މަސްއޫލިއްޔަތުތަކަށް ހުރަސްއެޅޭ ހާލަތްތަކުގައެވެ. ދިރާސާވެރިން ބުނާ ގޮތުގައި، ފާއިތުވި އަހަރުތަކުގައި މަސައްކަތްކުރާ ގޮތަށް އައި ބަދަލުތަކާއި، އާއިލީ އޮނިގަނޑަށް އައި ބަދަލުތަކުގެ އިތުރުން މަސައްކަތްކުރާ މީހުންނަށް ލިބޭ ސިޔާސީ އަދި ގާނޫނީ އެހީތެރިކަން ކުޑަވުމުގެ ސަބަބުން މި މައްސަލަ ވަނީ ބޮޑުވެފައެވެ.
މި ދިރާސާއިން ދައްކާގޮތުގައި މަސައްކަތާއި އާއިލީ ފުށުއެރުންތަކުގެ ސަބަބުން ވަރުބަލިވުމާއި، މާޔޫސްވުން، ހާސްވުން، ނިދިމަދުވުން އަދި ދިރިއުޅުމާ މެދު އޮންނަ ހިތްހަމަޖެހުން ކުޑަވެއެވެ. މީގެ އިތުރުން، ހިތުގެ ބަލިތަކާއި، ދުންފަތުގެ އިސްތިއުމާލުކުރުމާއި، ނުރަނގަޅު ކާނާ ކެއުމާއި، މަސްތުވާތަކެތި ބޭނުންކުރުމާއި، ކަސްރަތު ނުކުރުން ފަދަ ސިއްހީ ގޮތުން ނުރަނގަޅު އާދަތަކާވެސް މިކަން ގުޅިފައިވެއެވެ. ދިރާސާވެރިން ސިފަކުރާ ގޮތުގައި މިއީ ސިއްހީ ފަރުވާގެ ހަރަދުތައް އިތުރުވެ، ދިގުމުއްދަތުގައި ސިއްހަތު ދެރަވުމަށް މެދުވެރިވާ މައިގަނޑު ސަބަބެކެވެ.
މި މައްސަލަ ދިމާވާ މައިގަނޑު ސަބަބުތަކުގެ ތެރޭގައި ގިނަ ވަގުތު މަސައްކަތުގައި ހޭދަކުރުމާއި، މަސައްކަތުގެ ތާވަލުތައް ހުންނަ ގޮތް ބަދަލުވުމާއި، މަސައްކަތުގެ މާހައުލުގައި އަމިއްލަ ބާރު ކުޑަވުމާއި، ސުޕަވައިޒަރުންގެ އެހީތެރިކަން ކުޑަވުން ހިމެނެއެވެ. އާމްދަނީ މަދުން ލިބޭ މީހުންނަށް މިކަމުގެ އަސަރު ބޮޑަށް ކުރަނީ، އެމީހުންނަށް މަސައްކަތުގެ މާހައުލުން ލިބޭ އިނާޔަތްތަކާއި ލުއިފަސޭހަތައް މަދުވުމުންނެވެ. އަދި ކުޑަކުދިން ނުވަތަ އުމުރުން ދުވަސްވީ މީހުން ބެލެހެއްޓުމުގެ ޒިންމާ އޮތުމަކީ މި ފިއްތުންތައް އިތުރަށް ބޮޑުވާ ކަމެކެވެ.
ދިރާސާވެރިން ލަފާދެނީ މަސައްކަތުގެ މާހައުލުގައި އާއިލާއަށް ފަހި ސިޔާސަތުތައް ގާއިމުކުރުމަށެވެ. މީގެ ތެރޭގައި މުސާރަ ލިބޭގޮތަށް ދޭ ޗުއްޓީތައް ގިނަކުރުމާއި، މަސައްކަތްކުރާ ގަޑިތަކަށް ލުއިގޮތްތައް ހަމަޖެއްސުމާއި، އެހީތެރިކަން ފޯރުކޮށްދޭ މަސައްކަތުގެ ސަގާފަތެއް ބިނާކުރުން ހިމެނެއެވެ. 'ސުޓާރ' ގެ ނަމުގައި ހިންގުނު މަސައްކަތުގެ މާހައުލުގެ ޕްރޮގްރާމަކުން މުވައްޒަފުންގެ ނިދި ރަނގަޅުވެ، ސްޓްރެސް ކުޑަވިކަން ފާހަގަކުރެވުނެވެ. މިއީ އިދާރީ ބަދަލުތަކުން ސިއްހީ ގޮތުން ބޮޑެތި ފައިދާތަކެއް ކުރާނެ ކަމުގެ ހެއްކެކެވެ.
ދިރާސާގެ މުސައްނިފު ނިންމަވާލައްވަމުން ވިދާޅުވީ، މަސައްކަތާއި އާއިލީ ފުށުއެރުންތައް ކުޑަކުރުމުގައި ސަރުކާރާއި ވަޒީފާދޭ ފަރާތްތަކުގެ ދައުރެއް އޮތް ކަމަށެވެ. އަދި ވަރުގަދަ އެހީތެރިކަމުގެ ނިޒާމުތަކެއް ނެތްނަމަ، މުވައްޒަފުންގެ ސިއްހަތާއި ދުޅަހެޔޮކަމަށް މީގެ ނޭދެވޭ އަސަރު ކުރަމުންދާނެ ކަމުގެ އިންޒާރު ދެއްވިއެވެ. މި ހޯދުންތަކުން އެނގެނީ މުވައްޒަފުންގެ މަސައްކަތާއި އާއިލީ ދިރިއުޅުން ހަމަހަމަކޮށް ކުރިއަށް ގެންދިއުމަށް އެހީތެރިވާ ސިޔާސަތުތަކުގެ މުހިންމުކަމެވެ.
