ހަށިގަނޑު ގުޅިފައިވާ އެއްމާބަނޑު ދެކުދިންގެ ހަށިގަނޑު ވަކިކުރުމަށްޓަކައި ސާޖަރީއެއް ހެދުމަށް ސައުދީޢަރަބިއްޔާއަށް ގެންގޮސްްފިއެވެ.
ޙަަސަން އާއި ޙުސައިން ނަމަކަށް ކިޔާ މި ދެކުދިންގެ ހަށިގަނޑު ވަކިކުރުމަށް ސާޖަރީ ހެދުމަށް ސައުދީއާރަބިއްޔާއަށް ގެންގޮސްފައިވަނީ އިއްޔެގެ ވަގުތެއްގައެވެ.
ޓެންޒޭނިޔާގެ މި ދެކުދިންގެ ސާޖަރީ ހެދުމަށް ހަމަޖެހިފައިވަނީ ކިންގް ޢަބްދުﷲ ސްޕެޝަލިސްޓް ޗިލްޑްރެންސް ހޮސްޕިޓަލްގައެވެ. ސީދާ ސައުދީގެ ނެޝަނަލް ގާރޑް މިނިސްޓްރީގެ ބެލުމުގެ ދަށުން ކުރުމަށް ހަމަޖެހިފައިވާ މި ސާޖަރީ ކާމިޔާބުކުރުމަށްޓަކައި، އެންމެ ފުރިހަމައަށް މަސައްކަތްކުރުމަށް ރަސްގެފާނު ސަލްމާން އާއި ވަލީއަޙްދު މުޙައްމަދު ބިން ސަލްމާން ވަނީ އަންގަވާފައެވެ.
އަދި މި ސާޖަރީ ހެދުމަށް ހަމަޖެހިފައިވަނީ ކިންގް ސަލްމާން ރިލީފް ފަންޑުގެ އެހީގައެވެ. މިކަމަށް އެދެކުދިންގެ އާއިލާއިން އެއްވެސް ޚަރަދެއް ކުރަން ނުޖެހޭނެ ކަމަށް ސައުދީ ގެޒެޓްގައި ރިޕޯޓް ކޮށްފައިވެއެވެ. އަދި އެދެކުދިންގެ ރައްކާތެރިކަމަށްޓަކައި އަޅަންޖެހޭ ހުރިހާ ފިޔަވަޅެއް އަޅާނެ ކަމަށްވެސް ރިޕޯޓް ކޮށްފައިވެއެވެ. މިކަމަށްޓަކައި ރަސްގެފާނު ސަލްމާން އާއި ވަލީއަޙްދު މުޙައްމަދު ބިން ސަލްމާންއަށާއި ސައުދީ ސަރުކާރަށް އެދެކުދިންގެ ޢާއިލާއިން ޝުކުރު އަދާކޮށްފައިވެއެވެ.
މިގޮތަށް ގުޅިފައިވާ ކުދިން ވަކިކުރުމަށް އެ ހޮސްޕިޓަލުގައި، 1990 ވަނަ އަހަރުން ފެށިގެން މިފަދަ ސާޖަރީތައް ކުރަމުން އަންނައިރު، ވޭތުވެދިޔަ 32 އަހަރުގެ ތެރޭގައި ކޮށްފައިވާ ސާޖަރީތަކަށް ބަލާއިރު، 50 ސާޖަރީ ކާމިޔާބު ކުރެވިފައިވާ ކަމަށް ސައުދީ ގެޒެޓުން ހާމަކުރެއެވެ.
