ރަޙްމެއް ކުލުނެއް އޯގާތެރިކަމެއް ނެތެވެ. ނުބައި ޖައްބާރު ޔަހޫދީންގެ އަނިޔާވެރިކަން ހައްދުން ނައްޓައިފިއެވެ.
ހައްދުން ނެއްޓިޔަސް، ޙަސަދަވެރިވިޔަސް، ރުޅިގަދަ ވިޔަސް، ފަލަސްޠީނުގައި ހުރި މުސްލިމުންގެ އެއްމެ މުޤައްދަސް ތަނަކީ ޤުދުސްގައިވާ އަލްމަސްޖިދުލް އަޤްޞާއެވެ. ކީރިތި ޤުރުއާނުގެ އިސްރާ ސޫރަތުގެ ފުރަތަމަ އާޔަތުގައި މާތްﷲ ވަޙީ ކުރައްވައިފައި ވަނީ "އެއިލާހުގެ ހުސްޠާހިރުވަންތަކަމާއެވެ! އެއިލާހީ، އަލްމަސްޖިދުލްޙަރާމް އިން، އަލްމަސްޖިދުލްއަޤްޞާ އަށް އެއިލާހުގެ އަޅާ، ރޭގަނޑުން ބައެއްގައި ގެންދެވި އިލާހެވެ. އެއީ އެތާނގެ ވަށައިގެން، ތިމަންއިލާހު ބަރަކާތްލެއްވި ތަނެވެ. (އެއީ) ތިމަން އިލާހުގެ ކުޅަދުންވަންތަކަމުގެ ހެކިތަކުގެ ތެރެއިން ބައެއް، އެކަލޭގެފާނަށް ދެއްކެވުމަށް ޓަކައެވެ. ހަމަކަށަވަރުން، އެއިލާހީ މޮޅަށް އައްސަވައިވޮޑިގެންވާ، މޮޅަށް ބައްލަވައިވޮޑިގެންވާ އިލާހެވެ." މި ފަދައިންނެވެ.
މި އާޔަތުން އެނގޭ ގޮތުގައި އަލްމަސްޖިދުލްއަޤްޞާ އާއި އެ ތަނުގެ ވަށައިގެންވާ ޙަރަމްފުޅަކީ މާތްﷲ ބަރަކާތް ލައްވައިފައިވާ މުޤައްދަސް ތަނެކެވެ. އަލްމަސްޖިދުލްއަޤްޞާ އަކީ މުސްލިމުންގެ ފުރަތަމަ ޤިބްލައެވެ. އަލްމަސްޖިދުލް އަޤްޞާ އަކީ މުސްލިމުންގެ ތިންވަނަ ޙަރަމްފުޅެވެ. ކީރިތި މާތް ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަގެ އިސްރާގެ ދަތުރުފުޅު ކުރައްވައިފައިވަނީ އަލްމަސްޖިދުލް ޙަރާމް އިން އަލްމަސްޖިދުލް އަޤްޞާއަށެވެ. ކީރިތި ރަސޫލާގެ އިސްރާ އާއި މިޢުރާޖުގެ ދަތުރުފުޅުގައި އެކަލޭގެފާނު ވަނީ މަސްޖިދުލްއަޤްޞާގައި ނަބީބޭކަލުންގެ ޖަމާޢަތެއްގައި އިމާމުވެ ނަމާދުފުޅު ކުރައްވައިފައެވެ.
ތާރީޚު އޮޅުވާލުމަށްޓަކައި ޔަހޫދީން މަސައްކަތް ކުރިކަމުގައި ވިޔަސް މި ޙަޤީޤަތް ބަދަލެއް ނުކުރެވޭނެއެވެ.
ލާއިންސާނީ ޖަރީމާތަކުގައި ޔަހޫދީން ދަނީ މުސްލިމުން ޝަހީދުކުރަމުންނެވެ. މުސްލިމުން ޝަހީދުކުރުމަށްފަހުގައިވެސް އިންސާނީ ޙައްޤުތަކާއި ކަރާމަތް ނަގާލައި ހިންގާ ޖަރީމާތައް ދަނީ އިންތިހާއަށް އިތުރުވެފައެވެ. މި މަހުގެ ހަތް ވަނަ ދުވަހުން ފެށިގެން އިޒްރޭލުން ޣައްޒާއަށް ދެމުންދާ ހަމަލާތަކުގައި ކޮންމެ ފަސް މިނެޓަކުން ފަލަސްތީނުގެ އާންމު ރައްޔިތަކު ޝަހީދުވަމުން ދާ ކަމަށް، ޣައްޒާގެ ސިއްހަތާ ބެހޭ ވުޒާރާ އިން ވަނީ ހާމަކޮށްފައެވެ.
ހައްދުފަހަނަ އަޅާފައިވާ އަނިޔާވެރި އިޒްރޭލުގެ އިސްތިއުމާރީ ސިފައިން މިހާރު ޣައްޒާގެ އާންމު ރައްޔިތުންނާ ދެކޮޅަށް ހިންގާ އުދުވާނީ އަމަލުތަކަކީ، ޣައްޒާގެ ރައްޔިތުންނާ ދެކޮޅަށް އިއްވާފައިވާ މަރުގެ ހުކުމެއް ތަންފީޒު ކުރުމަށް ކަމަށާއި، އިޒްރޭލުގެ އުދުވާނީ އަމަލުތަކުގެ ސަބަބުން ޣައްޒާގެ ސިއްހީ ޚިދުމަތުގެ ނިޒާމު ފެއިލްވެފައިވާ ކަމަށާއި، ބޭހާއި ސިއްހީ ޚިދުމަތަށް ބޭނުންވާ ޒަރޫރީ ސާމާނު ވެސް ނެތް ކަމަށް ޣައްޒާގެ ސިއްހަތާ ބެހޭ ވުޒާރާގެ ތަރުޖަމާނު ވިދާޅުވެފައިވެއެވެ.
ނިރުބަވެރި އިޒްރޭލުން ދެމުންދާ ބާރު ގަދަ ހަމަލާތަކުގެ ސަބަބުން ގިނަ އަދަދެއްގެ ބަޔަކު ޒަޚަމްވަމުންދެއެވެ. އެ އެންމެންނަށް އެކަށީގެންވާ ގޮތެއްގައި ފަރުވާ ދެވޭނެ އިންތިޒާމެއް ޣައްޒާގައި ނެތެވެ. އަދި އިޒްރޭލުން ޣައްޒާގެ އާންމުން ދިރިއުޅޭ އިމާރާތްތަކަށް ގަސްދުގައި ދޭ ހަމަލާތަކަކީ ޣައްޒާގައި ހިންގާ ގަތުލު އާންމެކެވެ.
ހައްދުފަހަނަ އަޅާފައިވާ ލާއިންސާނީ އިޒްރޭލުން ޣައްޒާއަށް ދެމުންދާ ހަމަލާތައް 10 ވަނަ ދުވަހަށް ދެމިގެން ދިޔަ އިރު، އިޒްރޭލުގެ ހަމަލާތަކުގައި ޣައްޒާ އިން ޝަހީދުވި ފަލަސްތީނު ރައްޔިތުންގެ އަދަދު މިހާރު ވަނީ 2750 އަށް ވުރެ މައްޗަށް ގޮސްފަ އެވެ. އޭގެ ތެރޭގައި 1000 އަށް ވުރެ ގިނަ ކުޑަކުދިން ހިމެނޭ ކަމަށް ރިޕޯޓްތައް ބުނެއެވެ.
ވައިގެ މަގުން ޣައްޒާއަށް ދެމުންދާ ބާރު ގަދަ ހަމަލާތަކުގައި ޒަޚަމްވި ފަލަސްތީނު ރައްޔިތުންގެ އަދަދު މިހާރު 9700 އަށް ވުރެ މަތިވެފައިވެއެވެ. އިޒްރޭލުގެ އެ ހަމަލާތަކުގައި ޣައްޒާގެ 2500 އަށް ވުރެ ގެދޮރު ބިމާ ހަމަވެފައިވާ އިރު، 1.5 މިލިއަން މީހުން މިހާރު ތިބީ ގެދޮރު ނެތި ހާލުގައި ޖެހިފައިވެއެވެ.
އިޒްރޭލުން މިހާރު ޣައްޒާ އަށް ދެމުންދާ ހަމަލާތަކަށް ހިތްވަރުދީ ވާގިވެރިވާ ކޮންމެ ޤައުމަކީ ވެސް، ފަލަސްތީނުގެ ކުޑަކުދިންނާއި އަންހެނުންނާއި އާންމު ރައްޔިތުން މެރުމަށް އިޒްރޭލުން ހިންގާ ޖަރީމާގެ ބައިވެރިން ކަމަށާއި، އިޒްރޭލުގެ އަމަލުތައް މިހާރު ހުރީ ޖަރުމަނުގެ ނާޒީންގެ އަމަލުތަކާ އެއް ގޮތަށް ކަމަށް ޙަމާސްއިން ބުނެއެވެ.
ޣައްޒާގެ ރައްޔިތުންނާ ދެކޮޅަށް ހިންގަނީ ހަނގުރާމައިގެ ޖަރީމާތަކެއް ކަން، ބައިނަލްއަގުވާމީ މުއައްސަސާތަކުން މިހާތަނަށް ނެރެފައިވާ ބަޔާންތަކުން އެނގޭ ކަމަށާއި އޭގެ ތެރޭގައި، މަދަނީން ދިރިއުޅޭ ތަންތަނުގައި ބޭނުންކުރުން، ބައިނަލްއަގުވާމީ ގާނޫނުތަކުން މަނާކޮށްފައިވާ ބައެއް ބާވަތުގެ ހަތިޔާރު، އިޒްރޭލުން ޣައްޒާގެ ރައްޔިތުންނާ ދެކޮޅަށް ބޭނުންކޮށްފައިވާ ކަން ފާހަގަކުރެވޭ ކަމަށްވެސް ޙަމާސްއިން ބުނެއެވެ.
އެމްނެސްޓީ އިންޓަނޭޝާނަލް އިން އިއްޔެ ވަނީ ބުނެފައިވަނީ، ފަލަސްތީނުގެ ހަމާސް ޖަމާއަތާ ދެކޮޅަށް އިޒްރޭލުން ފަށާފައިވާ ހަނގުރާމައިގައި ޣައްޒާއަށް މިހާރު ދެމުންދާ ހަމަލާތަކުގައި، ފަލަސްތީނުގެ ކުށެއް ނެތް އާންމުންނާ ދެކޮޅަށް ހުދު ފޮސްފަރަސް ބޮން ބޭނުންކޮށްފައިވާ ކަމުގެ ހެކި ލިބިފައިވާ ކަމަށެވެ. މިފަދަ ބޮން ވައިގެ ތެރެއަށް ގޮއްވުމުން އޭގެ އަސަރު ފުއްޕާމެއަށް ކުރެއެވެ. އަދި ފުއްޕާމޭގައި ވަގުތުން ޒަޚަމްތައް އުފެދި، ނޭވާލުމަށް ދަތިވެެއެވެ. ހަމައެހެންމެ ހުދު ފޮސްފަރަސްއަކީ ވައިގައި ޖެހުމާއެކު އޭގައި އަލިފާން ހިފާ ބާރު ގަދަ މާއްދާއެއް ކަމުން، ހުދު ފޮސްފަރަސް ގޮވުމުން އުފެދޭ ދުމާއި އޭގެ ކުނޑި އިންސާނުންގެ ހަންގަނޑުގައި ޖެހުމުން ހަންގަނޑު ފިހިގެންދެއެވެ. ނޭވާލާ ނިޒާމުގެ ޒަރީއާއިން ނުވަތަ ކާބޯތަކެއްޗާ އެކުވެގެން ހަށިގަނޑުގެ ތެރެއަށް އެތެރެވާ ފޮސްފަރަސް ހިނގައްޖެ ނަމަ، އެކަމަށް ފަރުވާ ކުރުމަކީ ވަރަށް އުނދަގޫ ކަމެއް ކަމަށް ރިޕޯޓްތައް ބުނެއެވެ.
