އިސްރާއީލްގެ ފަތުރުވެރިން ރާއްޖެ އައުން ހުއްޓުވައި ދިނުމަށް ރައްޔިތުންގެ މަޖިލިހުގެ މައްޗަންގޮޅި ދެކުނު ދާއިރާގެ މެމްބަރު ހައިތަމް އަޙްމަދު، ރައްޔިތުންގެ މަޖިލިހުގައި އެދިވަޑައިގެންފިއެވެ.
އިސްރާއީލުން ދެމުން އަންނަ ހަމަލާތަކުގައި އެތައް ހާސް ފަލަސްތީނުގެ ތުއްތު ކުދިންނާއި އާންމުން ވަނީ ޝަހީދުކޮށްލައިފައިވާކަމަށާއި، އިސްރާއީލްގެ މި އަމަލުތަކަކީ ލާއިންސާނީ، އިންސާނީ ހައްގާއި ކަރާމާތާ މުޅިން ދެކޮޅު ކަމެއްގެ ގޮތުގައި ހައިތަމް ވިދާޅުވިއެވެ.
ފާއިތުވީ 10 ދުވަސް ވެފައި ވަނީ އަނިޔާވެރިކަން އިންތިހާ އަށް ބޮޑު ކަން ފާހަގަކުރައްވަމުން، ފެން، ކަރަންޓު ފަދަ ޒަރޫރީ ތަކެތި ޣައްޒާ އިން ކަނޑާލާ ދެ މިލިއަނަށް ވުރެ ގިނަ މުސްލިމް ފަލަސްތީނުގެ ރައްޔިތުން ތާށިކޮށްލައި ނެތިކޮށްލަން މަސައްކަތް ކުރަމުން ދިޔަ ދުވަސްވަރެއް ކަމަށް ހައިތަމް ވިދާޅުވިއެވެ.
ފަލަސްތީނުގެ ރައްޔިތުންގެ ދިފާއުގައި އިސްރާއީލާ ދެކޮޅަށް މަސައްކަތް ކުރަމުންދާ ހަމާސް އިން އޮކްޓޯބަރު ހަތް ވަނަ ދުވަހު އިސްރާއީލަށް ދިން ވަރުގަދަ ހަމަލާއަށްފަހު ދެ ޤައުމުގެ ދެމެދުގައި ވަރުގަދަ ހަނގުރާމައެއް ދަނީ ހިނގަމުންނެވެ.
ހައިތަމް އެދިވަޑައިގެންފައިވަނީ، އިޒްރޭލު ޕާސްޕޯޓާއި ޓޫރިސްޓުން ރާއްޖެ އިން ބޮއިކޮޓް ކުރުމުގެ މައްސަލަ ރައްޔިތުންގެ މަޖިލީހުގެ ހާރިޖީ ކޮމިޓީން ބަލައިދިނުމަށެވެ،.
އަނިޔާވެރި އިޒްރޭލުން ޣައްޒާއަށް ދެމުން ގެންދާ ހަމަލާތައް ކުށްވެރިކޮށް، އެ މައްސަލާގައި ފިޔަވަޅު އެޅުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ޤަރާރަކާއި ކުއްލި މައްސަލައެއް ވެސް ހުށަހަޅައިފައިވެއެވެ. އެއް މައްސަލައެއްގައި ދެ އެއްޗެއް ހުށަހަޅައިފައިވުމުން ޤަރާރަށް ޖާގަ ދީ ކުއްލި މައްސަލަ އެޖެންޑާކޮށްފައެއް ނުވެއެވެ.
ކިޔުންތެރިންގެ ޚިޔާލުތައް:
ތިއީ މިހާތަނަށް ތި ތަނުގައި މި ނިމިދާ 5 އަހަރުގައި ދެއްކި ހަމައެކަނި ބުއްދި ހަަމަޖެހޭ ވާހަކަ. ވަރަށް ބޮޑަށް ޝުކުރިއްޔާ.