ދިވެހިންގެ އެހީގައި ފަލަސްތީނުގެ ޣައްޒާގައި އަޅާ މިސްކިތުގެ %80 މަސައްކަތް ނިމިފައިވާކަމަށް އިންޓަނޭޝަނަލް އެއިޑް ކެމްޕޭން (އައިއޭސީ) ވިދާޅުވެއްޖެއެވެ.
އެ ޖަމްޢިއްޔާއިން ވިދާޅުވީ، އޮކްޓޯބަރު 7 ގެ ހަމަނުޖެހުންތަކުގެ ކުރިން މިސްކިތުގެ %80 މަސައްކަތް ނިމިފައިވާ ކަމަށާއި، މިސްކިތުގެ ފުރަތަމަ ފިޔަވަހީގެ މަސައްކަތް އެއްކޮށް ނިމުނު އިރު، އޭގެ ތެރޭގައި ހިއްކުން، ބެކްފިލިން، ކޮންކްޓްރީޓް މަސައްކަތް އަދި ރޭނުމުގެ މަސައްކަތް ހިމެނޭ ކަމަށެވެ. އައިއޭސީން ވަނީ މިސްކިތުގެ މަސައްކަތް ކުރިއަށް ދިޔައިރުގެ ފޮޓޯތަކެއް ސޯޝަލް މީޑިޔާގައި ޙިއްސާކުރައްވާފައެވެ.
އިސްރާއީލްގެ ޔަހޫދީންގެ ހަމަލާތަކުގެ ސަބަބުން މިސްކިތް ހިމެނޭ އިރުމަތީ ޣައްޒާ ސަރަހައްދު ވަނީ ނުރައްކާތެރި ސަރަހައްދެއްގެ ގޮތުގައި ކަނޑައަޅައިފައިވާ ކަން ފާހަގަކުރައްވަމުން، އިއްޔެއާ ހަމައަށް އައިއިރު ވެސް މިސްކިތަށް އެއްވެސް ގެއްލުމެއް ލިބިފައި ނުވާ ކަމަށް އައިއޭސީން ވިދާޅުވިއެވެ.
އަނިޔާވެރި ހައްދުފަހަނައަޅާފައިވާ އިސްރާއީލުން ފަލަސްތީނަށް ދެމުން އަންނަ ހަމަލާތަކާ ގުޅިގެން ވަރަށް ގިނަ މިސްކިތްތަކެއް ސުންނާފަތިކޮށްލާފައިވާއިރު، އިސްރާއީލުން ދަނީ ހޮސްޕިޓަލްތަކާއި ސްކޫލްތައް ފަދަ އާންމުން ވަގުތީ ހިޔާ ވަހިކަމުގައި ތިބޭ ތަންތަނަށްވެސް ބޮން އަޅައި، ހަނގުރާމައިގެ އާންމު އުސޫލުތަކާ ޚިލާފު އެތައް ޖަރީމާއެއް ހިންގަމުންނެެވެ.
