އާދީއްތަ ދުވަހު ފުލަމްއާ ދެކޮޅަށް ކުޅުނު ފޯރިގަދަ މެޗު، އިތުރު ވަގުތުގެ ތެރޭގައި ބެންޖަމިން ސެސްކޯ ކާމިޔާބުކޮށްދިން ލަނޑާއެކު 3-2 އިން މެންޗެސްޓަރ ޔުނައިޓެޑް މޮޅުވިއިރު، އެ ޓީމުގެ ވަގުތީ ކޯޗު މައިކަލް ކެރިކްގެ ފެށުން ފުރިހަމަކަމާއެކު ދަމަހައްޓައިފިއެވެ.
އޯލްޑް ޓްރެފޯޑްގައި ކުޅުނު މި މެޗުގެ ފުރަތަމަ ހާފުގައި ކަސެމީރޯ ބޮލުން ޖެހި ލަނޑުން ޔުނައިޓެޑުން ލީޑު ނެގިއިރު، ދެވަނަ ހާފު ފެށިގެން މަތިއަސް ކުންހާ ޖެހި ލަނޑާއެކު އެ ޓީމުން މެޗުގެ ކޮންޓްރޯލް ހޯދިއެވެ. ނަމަވެސް މެޗުގެ ފަހުކޮޅު ފެނިގެންދިޔައީ ހައިރާންކުރުވަނިވި ކަންތައްތަކެކެވެ. މެޗު ނިމެން ފަސް މިނެޓަށް ވެފައި ވަނިކޮށް ރައުލް ހިމެނޭޒް ކާމިޔާބުކުރި ޕެނަލްޓީން ފުލަމްއަށް އުންމީދެއް ލިބުނުއިރު، އިތުރު ވަގުތުގެ ތެރޭގައި ކެވިން ޖެހި ހިތްގައިމު ލަނޑުން އެ ޓީމުން ނަތީޖާ ހަމަހަމަކުރިއެވެ.
ޔުނައިޓެޑުން ދެއްކި ހިތްވަރަށް ސާބަސް ހައްގުވާއިރު، އެ ޓީމުން ވަނީ ވަގުތުން ރައްދު ދީފައެވެ. ގިނަ ބައެއްގެ ފާޑުކިޔުން އަމާޒުވެފައިވާ ސެސްކޯ، އޭނާ އެންމެ ފަހުން ކުޅުނު ހަތަރު މެޗުގައި ޖެހި ހަތަރުވަނަ ލަނޑާއެކު ކެރިކްގެ އިރުޝާދުގެ ދަށުން ޖެހިޖެހިގެން ތިންވަނަ މޮޅު ޔުނައިޓެޑަށް ކަށަވަރުކޮށްދިނެވެ.
އާ ކޯޗު ކެރިކްގެ އިރުޝާދުގެ ދަށުން މެންޗެސްޓަރ ސިޓީ އާއި ޕްރިމިއާ ލީގުގެ އެއްވަނައިގައި އޮތް އާސެނަލް އަތުން ހައިރާންކުރުވަނިވި މޮޅެއް ހޯދާ ފެންވަރު ދައްކާލާފައެވެ.
ލީގުގައި އެންމެ ފަހުން ކުޅުނު ހަތް މެޗުން ބަލިނުވެ، ޔުނައިޓެޑް މިހާރު ވަނީ ތާވަލުގެ ހަތަރުވަނައަށް ޖެހިލާފައެވެ. މިއާއެކު އަންނަ ސީޒަނުގެ ޗެމްޕިއަންސް ލީގަށް ކޮލިފައިވުމަށް އެ ޓީމުން ކުރާ މަސައްކަތް ވަނީ އިތުރަށް ވަރުގަދަވެފައެވެ.
މިދިޔަ އަހަރު ދެވަނަ ޑިވިޝަނުގެ މިޑްލްސްބަރާގެ ކޯޗުކަމުން ވަކިކުރި ކެރިކްއަށް، ޔުނައިޓެޑް ޗެމްޕިއަންސް ލީގަށް ގެންގޮސްދެވުމަކީ އޭނާގެ ގާބިލުކަން ސާބިތުކޮށްދިނުމަށް ލިބޭނެ ބޮޑު ފުރުސަތެކެވެ.
