މި ހަފުތާގައި އިނގިރޭސިވިލާތަކީ "ކޮލޯނައިޒްވެފައިވާ (އިސްތިއުމާރުވެފައިވާ) ގައުމެއް" ކަމަށް ބުނެ، ހަރުކަށި ފިކުރުތަކަށް ބާރުލިބޭ ފަދަ ނަސްލީ ތަފާތުކުރުންތަކަށް ހިތްވަރުދިނުމާ ގުޅިގެން، މެންޗެސްޓާ ޔުނައިޓެޑްގެ ކޯ-އޯނަރު ޖިމް ރެޓްކްލިފަށް އަމާޒުވާ ފާޑުކިއުންތައް އިތުރުވާން ފަށައިފިއެވެ.
ބުދަ ދުވަހު ސްކައި ނިއުސްއަށް ދިން އިންޓަވިއުއެއްގައި، "ބޮޑު މިންވަރަކަށް ހިޖުރަކުރާ މީހުން އިތުރުވުމުގެ" ސަބަބުން އިގްތިސާދަށް ގެއްލުންވެފައިވާ ކަމަށް އޭނާ ބުނުމާ ގުޅިގެން، ސިޔާސީ ބޭފުޅުންނާއި، ކެމްޕޭން ކުރާ ފަރާތްތަކާއި، ސަޕޯޓަރުންގެ ގްރޫޕްތަކުން ވަނީ އެ ބިލިއަނަރުގެ ވާހަކަތައް ކުށްވެރިކޮށްފައެވެ.
މީގެ ކުރިންވެސް ކްލަބުގެ މިލްކުވެރިކަމާ ދެކޮޅަށް ކުރަމުންދިޔަ މުޒާހަރާތައް މިހާރު އިތުރަށް ފުޅާވެގެންދާނެ ކަމަށް ބެލެވެއެވެ.
މެންޗެސްޓާ ޔުނައިޓެޑް މުސްލިމް ސަޕޯޓާސް ކްލަބުން ވަނީ ރެޓްކްލިފް "ކޮލޯނައިޒް" މި ލަފުޒު ބޭނުންކުރުމުން ނުރުހުން ފާޅުކޮށްފައެވެ. އެ ގްރޫޕުން ބުނި ގޮތުގައި އެއީ ހިޖުރަކުރާ މީހުންނަކީ ގައުމަށް އަރައިގަންނަ ބައެއްގެ ގޮތުގައާއި އާބާދީއަށް އޮތް ނުރައްކަލެއްގެ ގޮތުގައި ސިފަކުރާ "ހަރުކަށި ކަނާތު ފިޔައިގެ ފިކުރުތަކާ" އެއްގޮތް ވާހަކައެކެވެ.
"މިފަދަ ވާހަކަތަކުގެ ސަބަބުން އަމަލީ މައިދާނުގައި ނުރައްކާތެރި ނަތީޖާތަކެއް ނުކުމެދާނެ،" ރިފޯމް ޔޫކޭ ޕާޓީއަށް އޮތް ތާއީދު އިތުރުވަމުންދާ ދަނޑިވަޅެއްގައި، ނަސްލީ ތަފާތުކުރުންތަކާއި ދެކޮޅުވެރިކަން އިތުރުވަމުންދާކަން ފާހަގަކުރަމުން އެ ގްރޫޕުން ބުންޏެވެ.
އެހެން ސަޕޯޓަރުންގެ ކްލަބުތަކުން ވެސް ވަނީ ރެޓްކްލިފްގެ ވާހަކަތައް ވަރަށް ބޮޑަށް ކުށްވެރިކޮށްފައެވެ. އެގޮތުން LGBTQ ސަޕޯޓަރުންގެ "ރެއިންބޯ ޑެވިލްސް" ކްލަބުން ބުނީ، އޭނާގެ ވާހަކަތަކުގެ ސަބަބުން "މައިނޯރިޓީ މުޖުތަމައުތަކަށާއި، އޭގެ ތެރޭގައި ހިމެނޭ މެންޗެސްޓާ ޔުނައިޓެޑްގެ ވަފާތެރި ސަޕޯޓަރުން ކަމަށްވާ ހިޖުރަވެރިންނަށް ބޮޑެތި ގެއްލުންތަކެއް" ލިބިދާނެ ކަމުގެ ބިރު އެބައޮތް ކަމަށެވެ.
މެންޗެސްޓާ ޔުނައިޓެޑް ސަޕޯޓާސް ޓްރަސްޓުން ފާހަގަކުރި ގޮތުގައި ކްލަބުގެ ލީޑަޝިޕުން މަސައްކަތް ކުރަންވާނީ "އެންމެން ބައިވެރިކުރުވުން (inclusion) ފަސޭހަކުރުމަށެވެ، އުނދަގޫކުރުމަކަށް ނޫނެވެ."
1998 ވަނަ އަހަރު ކެމިކަލް ކުންފުނި "އިނިއޯސް" އުފެއްދި ރެޓްކްލިފް، މެންޗެސްޓާ ޔުނައިޓެޑްގެ ކުޑަ ހިއްސާއެއް ގަނެފައިވަނީ 2023 ވަނަ އަހަރުގެ ފަހުކޮޅުގައެވެ. އޭގެ ފަހުން ޓިކެޓްގެ އަގުތައް އިންތިހާއަށް ބޮޑުވުމާ ގުޅިގެން ސަޕޯޓަރުންގެ މެދުގައި ވަނީ ބޮޑު ނުރުހުމެއް އުފެދިފައެވެ.
