ވޯލްޑް ކަޕް ފައިނަލުން ބަލިވި ނަމަވެސް، ކަރުނައާއެކު މެސީ އަލްވަދާޢުކީ ލެޖެންޑެއްގެ ގޮތުގައި!

ކާމިޔާބީ ފާހަގަކުރުމަށް ޖައްވުތެރެއަށް އުދުއްސާލާ ބަބުޅާ ކުދިކުދި ކަރުދާސްތަކާއެކު، އުފާވެރިކަމުގެ އަޑުތަކުން މުޅި މައިދާން ގުގުމާލައި، ސްޕެއިނުން ފީފާ ވޯލްޑް ތަށި އުފުލާލުމުގެ ކާމިޔާބީ އުފާފާޅުކުރަމުންދިޔައިރު، މެސީގެ ކޯތާފަތްމަތިން ކަރުނަތައް އޮހެމުންދިޔައެވެ. ކަތުރުފަނި ކައިފައިވާ މާހައުލެއްފަދައިން، ވަށައިގެން މާޔޫސްވެފައި ތިބި ކުޅުންތެރިންގެ މެދުގައި ހުރި މެސީގެ ކަރުގައި އަޅުވާފައިވަނީ ރިހި މެޑެއްޔެކެވެ. ލިއޮނެލް މެސީ ނުހަނު އެދެމުންދިޔައީ އޭނާގެ ފަހު ވޯލްޑް ކަޕް މިއަށްވުރެ އުފާވެރި ނިމުމަކުން ނިންމާލުމަށެވެ.

ފުޓްބޯޅަ ދަނޑުގައި މިހާތަނަށް ފެނުނު އެންމެ މޮޅު ކުޅުންތެރިޔާ ހުރީ ނުހަނު މާޔޫސްވެ، ހިތްހަލާކުވެފައެވެ. އޭނާގެ ސިކުނޑީގައި އެވަގުތު ހިނގަމުންދިޔައީ ކޮންކޮން ޖަޒުބާތުތަކެއްކަން ސާފުކޮށް އެނގުން އެއީ މުސްތަޙީލު ކަމެކެވެ.

މީގެ ދިހަ އަހަރު ކުރިން، ރޭ ވެސް އޭނާ ރޯން އެހުރި މެޓްލައިފް ސްޓޭޑިއަމްގެ މައިދާނުގައި، ކޯޕާ އެމެރިކާ ފައިނަލުން ނިކަމެތި ޗިލީ އަތުން އާޖެންޓީނާ ބަލިވުމަށްފަހު، ކަރުނައާއެކު މެސީ ވަނީ ޤައުމީ ޓީމަށް ކުޅުން ހުއްޓާލިކަން އިޢުލާންކޮށްފައެވެ. އެފަހަރުގެ ބަލިވުމުގެ ވޭން މެސީއަށް ކެތްކުރެވޭވަރަށްވުރެ ބޮޑުވިއެވެ. ސަބަބަކީ މަރަޑޯނާގެ ވާރުތަވެރިޔާގެ ގޮތުގައި އޭނާ ދެކެން މުޅި ޤައުމު ކުރަމުންދިޔަ ބޮޑު އުންމީދުތަކުގެ ބުރަދަން އޭނާގެ ކުޑަކުޑަ ކޮނޑުގައި އެޅިފައިވުމެވެ.

ނަމަވެސް، އެ ނިންމުން ބަދަލުކޮށް މެސީ އެނބުރި އައުމަކީ މުޅި ދުނިޔެއަށް ލިބުނު ބޮޑު އުފަލެކެވެ. އެއީ އާޖެންޓީނާއަށްވެސް ލިބުނު ރަޙްމަތެކެވެ. މެސީގެ ކެޕްޓަންކަމުގެ ދަށުން، އާޖެންޓީނާއިން ވަނީ 2021 ގެ ކޯޕާ އެމެރިކާއާއި، 2022 ގެ ފައިނަލިސިމާ އަދި ޚާއްޞަކޮށް 2022 ގެ ވޯލްޑް ކަޕް ކާމިޔާބުކޮށްދީފައެވެ. މިކާމިޔާބީތަކުގެ ސަބަބުން ސަޕޯޓަރުންގެ ހިތްތަކުގައި އޭނާގެ ނަން އަބަދަށްޓަކައި ވަނީ ބިންވަޅުނެގިފައެވެ.

ނަމަވެސް، އައު ޖާޒީގެ އަލިކަމުގެތެރެއިން ތެރޭގައި އެންމެ ފުރަތަމަވެސް ފެނިގެންދިޔައީ، ޖީލެއްގެ ފުޓްބޯޅަ ސަޕޯޓަރުންގެ ހިތްތައް ކުދިކުދިކޮށްލި މެސީގެ ކަރުނަތަކެވެ. މިއީ ބައިނަލްއަޤްވާމީ މައިދާނަށް އޭނާ ކަރުނައާއެކު ކީ އެންމެ ފަހުގެ އަލުވަދާޢު ބާވައެވެ؟

މެސީގެ ޢުމުރަކީ މިހާރު 39 އަހަރެވެ.

އަނެއްކޮޅުން، 19 އަހަރުގެ ލަމީން ޔަމާލް އާއި ޕައު ކުބާސީ ފަދަ ޒުވާން ކުޅުންތެރިން ސްޕެއިން ޓީމުގައި ތިބެގެން މޮޅުވަމުންދާއިރު، އައު ޖީލު މިއަންނަނީ މެސީ މަޤާމުން ދުރުކުރާކަށް އެކަންޏެއް ނޫނެވެ. އެ ޖީލު މިއަދު މިވަނީ އައިސް މެސީގެ މަޤާމުން ދުރުކޮށް ނިންމާފައެވެ.

ޢުމުރުގެ ސަބަބުން އަންނަ ހުރަސްތަކަށް ބަދަލުވެ، ފުޓްބޯޅަ ކުޅުމުގެ މޮޅު ޤާބިލުކަން އޭނާގެ ކިބައިގައި ހުރިނަމަވެސް، ޢުމުރުގެ ސަބަބުން އަންނަ ހުރަސްތަކުގެ ސަބަބުން އެގާބިލްކަން ދެއްކުމަކީ ދަތިކަމެކެވެ.  ހަތަރު އަހަރު ފަހުން ވޯލްޑް ކަޕެއްގައި އަދިވެސް އިތުރަށް ކުޅުމަކީ އޭނާގެ ޖާދުވީ ހުނަރުތަކަށް ކުރެވޭނެ ކަމެއް ނޫނެވެ.

މި ފަހަރުގެ ވޯލްޑް ކަޕްގައި، މެސީ ދަނޑުގައި ކުޅެން ހޭދަކުރި ވަގުތުގެ ދެބައިކުޅައެއްބައި ހޭދަކުރީ ހިނގުމުގައެވެ. މެޗެއްގައި ގާތްގަނޑަކަށް 5 ކިލޯމީޓަރު އޭނާވަނީ ހިނގާފައެވެ.

އެކަމަކުވެސް، އާޖެންޓީނާއަށް މެސީ ކޮށްދިންވަރަށް، އެހެން އެއްވެސް ކުޅުންތެރިއަކު އެމީހެއްގެ ޓީމުގެ ކާމިޔާބީއަށް އަސަރުފޯރުވާފައެއް ނުވެއެވެ. އޭނާ ޖެހި 8 ލަނޑާއި ދިން 4 އެސިސްޓާއެކު، އޭނާ ވަނީ ގްރޫޕް ސްޓޭޖާއި ނޮކްއައުޓް ބުރުތަކުން ކުރިއަށް ގެންގޮސްދީފައެވެ.

ކޮންމެ ޙާލަތެއްގައިވެސް މެޗުގެ ނަތީޖާ އޭނާ ބޭނުންވާ ގޮތަކަށް ބަދަލުކޮށްލުމުގެ އާދަޔާ ޚިލާފު ޤާބިލުކަން އޭނާގެ ކިބައިގައި ހުރުމުން، އޭނާއަކީ ހުއްޓުވޭނެ ކުޅުންތެރިއެއް ނޫންކަން އިޙްސާސްކޮށްދިނެވެ. ކިތަންމެ ވަރަކަށް ހިނގާފައި އުޅުނުކަމުގައި ވިޔަސް، އާޖެންޓީނާއިން ނުރައްކާކުރާ ކޮންމެ ވަގުތަކު، އެ ކުޑަކުޑަ ޖާދޫގަރު ހުންނަނީ ޙަރަކާތްތަކުގެ މެދުގައެވެ. ޓީމަށް އެންމެ ބޭނުންވާ ވަގުތު، އޭނާގެ ޖާދޫން ޓީމު ކުރިއަށް ގެންގޮސްދެއެވެ. ކޯޗްގެ އުއްމީދުތައް ހަގީގަތަކަށް ހަދާދެއެވެ. ސަޕޯޓަރުން އުފާ ކޮށްދެއެވެ.

މެސީ ދަނޑުގައި ހުރުން އެކަނިވެސް ވެގެންދިޔައީ، ކުޅުންތެރިންގެ އަމިއްލަ ފެންވަރަށްވުރެ މަތިން ކުޅުމަށް ލިބުނު ހިތްވަރަކަށެވެ. އޭނާގެ ހަކަތައާއި ފެންވަރުން، ވަށައިގެން ތިބި ކުޅުންތެރިންނަށް އިތުރު ހިތްވަރާއި އުންމީދު ގެނެސްދިނެވެ.

ސެމީ ފައިނަލްގައި އިންގްލެންޑާ ދެކޮޅަށް ކުޅުނު މެޗުގައި، އިތުރު ވަގުތުގެ ތެރޭގައި އޭނާ ދިން ދެ އެސިސްޓާއެކު އާޖެންޓީނާއަށް ތާރީޚީ ކާމިޔާބެއް ހޯދައިދިނެވެ. މިސްރާ ދެކޮޅަށް ކުޅުނު މެޗުގައި 2-0 އިން ބަލިވާން ގޮސް، މުބާރާތުން ކެޓުމުގެ ބިރުވެރިކަން އޮތްވައި، ފުރަތަމަ ލަނޑަށް ނަގައިދިން ހުރަހާއި، އެއްވަރުކުރި ލަނޑުގެ ހަމަލާ ފޮނުވާލީ މެސީއެވެ.

ނަމަވެސް، ފައިނަލްގައި ސްޕެއިނާ ދެކޮޅަށް، މެސީގެ އެ ހުނަރެއް ނުފެނުނެވެ. އޭނާގެ ޖާދޫއެއް ވޯކެއް ނުކުރިއެވެ.

މެސީގެ ކަރުނަތައް ފޫއްދާލީ ރިހި މެޑަލް އޭނާގެ ކަރުގައި އެޅުވި ފަހުންނެވެ. އެއީ ވަގުތު ކިތަންމެ ކުޑަތަންވެފައި އޮތްނަމަވެސް، މެޗުގެ ނަތީޖާ އޭނާގެ ފަރާތަށް އަނބުރާލެވިދާނެކަމުގެ އުންމީދު މެސީގެ ހިތުގައި އޮތްކަމުގެ އަލިގަދަ ދަލީލެކެވެ.  މީގެ ކުރިންވެސް އޭނާ ވަނީ އެކަން ސާބިތުކޮށް ދީފައެވެ.

ބަލިވުމުގެ ރަމްޒެއްކަމަށްވާ ބަރު ރިހި މެޑަލް ފޮތި މެސީގެ  ކަރުގައި،  ޑޮނަލްޑް ޓްރަމްޕް، އަޅުވައިދިނުމުން މެނުވީ، އިތުރު ސިޙުރެއް ނުހިނގާނެކަމާއި، އޭނާގެ ފައިގެ ޖާދޫން ދެން ތާރީޚު ބަދަލުނުކުރެވޭނެކަން އޭނާއަށް އިޙްސާސްއެއް ނުވިއެވެ.

ސްޕެއިނާ ދެކޮޅަށް ކުޅުނު ފައިނަލް މެޗުގައި މެސީއަށް ބޯޅަ ލިބުނީ އެންމެ 55 ފަހަރެވެ. އަދި އޭގެތެރެއިން އެއްވެސް ފަހަރަކު ސްޕެއިންގެ އޭރިއާ ތެރެއަކުން ބޯޅައެއް ނުލިބެއެވެ. ސްޕެއިނުން އޭނާ ހުއްޓުވީ ކަންބަޅިއައިނަކުން މަގު ބަންދުކޮށްލާ ބީދައިންނެވެ. އެހެންކަމުން، އާޖެންޓީނާގެ އެހެން ކުޅުންތެރިންނަށް، އެހީތެރިކަން އެންމެ ބޭނުންވި ވަގުތު އެމީހުންގެ ސުޕަރސްޓާރަށް އެހީތެރިކަމެއް ފޯރުކޮށްދެވޭ ގޮތެއް ނުވިއެވެ. ޤައުމު އެދެމުންދިޔަ ޖާދޫގެ ވަގުތު މެސީއަކަށް ގެނެސްދެވޭ ގޮތެއް ނުވިއެވެ.

ސްޕެއިނުން އެމީހުން ބޭނުންވި ވަގުތުތަކުގައި ރީތި ފުޓްބޯޅައެއް ކުޅެމުންދިޔައިރު، އާޖެންޓީނާގެ ފަރާތުން ފެނުނީ ހަމައެކަނި ނުރައްކާތެރި ފައުލްތަކާއި ރުޅިވެރި ބަސްތަކެވެ. ސާފުކޮށް ބުނާނަމަ: މި ފައިނަލްގައި އާޖެންޓީނާގެ ކުޅުން ވަރަށް ދަށެވެ.

މެޗުގެ ފުރަތަމަ 90 މިނެޓު ތެރޭގައި އާޖެންޓީނާއަށް ސްޕެއިންގެ ގޯލާ އަމާޒުކޮށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ. މިއީ ވޯލްޑް ކަޕް ފައިނަލެއްގައި ޓީމަކަށް ގޯލާ އަމާޒުކޮށް ހަމަލާއެއް ފޮނުވާނުލެވިދިޔަ ފުރަތަމަ ފަހަރެވެ. އެމީހުން ފޮނުވާލި ފުރަތަމަ ހަމަލާ ފެނުނީ އިތުރު ވަގުތުގެ 26 ވަނަ މިނެޓުގައެވެ.

އެމީހުން ކުރި 25 ފައުލްގެ ނަތީޖާއަކަށްވީ 7 ރީނދޫ ކާޑު ލިބުމެވެ. އޭގެތެރެއިން އެންޒޯ ފެނާންޑޭޒް، ޕައު ކުބާސީއަށް ކުރި ފައުލަކަށް ދެއްކި ދެވަނަ ރީނދޫ ކާޑާއެކު އޭނާ ދަނޑުން ފޮނުވާލެވުނެވެ. މިއާއެކު އޭނާ ވެގެންދިޔައީ ވޯލްޑް ކަޕް ފައިނަލެއްގައި ދަނޑުން ފޮނުވާލެވުނު 6 ވަނަ ކުޅުންތެރިޔާއަށެވެ. އާޖެންޓީނާގެ ނުރައްކާތެރި ކުޅުމަށް، އިންޒާރުދިނުމުން ވެސް ފަރުވާލެއް ނުބެހެއްޓުމުން އެންމެ ފަހުން ރެފްރީވަނީ އަދަބުދީފައެވެ.

މެޗަށްފަހު ބޭއްވި ނޫސްވެރިންގެ ބައްދަލުވުމުގައި ކޯޗު ލިއޮނެލް ސްކަލޮނީ ބުނީ އޭނާގެ ޓީމުން "ބަލިވާންވެސް އެނގޭކަން ސާބިތުކޮށްދީފި" ކަމަށެވެ. ނަމަވެސް ޙަޤީޤަތް އެއާ މުޅިން ޚިލާފެވެ. މެޗު ނިމުމަށްފަހު އާޖެންޓީނާގެ ކުޅުންތެރިން ވަނީ ވަރަށް ދަށު ދަރަޖައިގެ ޢަމަލުތަކެއް ހިންގާފައެވެ. ލެއަންޑްރޯ ޕެރެޑޭސް ދެއްކި ނުރައްކާތެރި ކުޅުމާއެކު ކުޅުން ހުއްޓި، މެޗުގެ ފަހު ކަށިކަނޑާއެކު އޭނާއަށް ވަނީ ރަތް ކާޑެއް ދައްކާފައެވެ. މިއީ އޭނާގެ ބައިނަލްއަޤްވާމީ ކެރިއަރުގެ ފަހު މެޗު ކަމުގައިވާނަމަ، މެސީއަށްފަހު އަންނަން އޮތް މުސްތަޤްބަލު ފެންނަނީ އެއްވެސް އުފާވެރިކަމެއް ނެތް ފަޅު ތަނެއްގެ ގޮތުގައެވެ.

އޭނާ އުންމީދުކުރި ފަދަ އަސަރެއް މެޗަށް ނުފޯރުވުނީ، މެސީގެ ކުށަކުންނެއް ނޫނެވެ. ސްޕެއިނުން ވަނީ ސެމީ ފައިނަލްގައި އާޖެންޓީނާއަށްވުރެ މާ މޮޅު ޓީމެއްވެސް ހުއްޓުވާފައެވެ. ރޮޑްރީ އިސްވެ ހުރެ މެދުތެރެ ކޮންޓްރޯލްކޮށް، އިދިކޮޅު ޓީމުގެ ވާގިނައްތާލާފައެވެ. މެސީއަށް އެއްވެސް ހުސްޖާގައެއް ތަނަވަސްވާގޮތެއް ނުވިއެވެ.

މެސީގެ މޮޅު ކެރިއަރުގެ ނިމުން އަންގައިދޭ ގަޑީގެ ކަށި ހިނގަމުންދާ ފަދައިން، ހިތްވަރާއެކު ބުންވަރު ނެރެގެން، ހުއްޓުމެއްނެތި ސްޕެއިން ޓީމުން ދިޔައީ އޭނާ ހުއްޓުވަމުންނެވެ.

ޖެހިޖެހިގެން ދެ ވޯލްޑް ކަޕް ކާމިޔާބުކުރި ތިންވަނަ ފިރިހެން ޓީމަށް އާޖެންޓީނާ ހެދުމަށް ބޭނުންވި ސިޙުރު ގެނެސްދެވޭ ގޮތެއް މެސީއަކަށް ނުވިއެވެ. މިއަކީ މެސީ ތަޞައްވުރު ކުރި ފަދަ ނިމުމެއް ނޫނެވެ.

ނަމަވެސް، މިއީ ކަރުނައާއެކު އޭނާ ކީ އަލުވަދާޢު ކަމުގައިވީނަމަވެސް، ފުޓްބޯޅައިގެ ތާރީޚުގައި އުފެދުނު އެންމެ މޮޅު އެއް ކުޅުންތެރިޔާގެ ކުޅުން ފެނުމުގެ ނަސީބު ލިބުނުކަމަށްޓަކައި ސަޕޯޓަރުން އަބަދުވެސް ފަޚުރުވެރިވާނެއެވެ.