އިނގިރޭސިވިލާތުގެ ދެމަފިރިއަކަށް، އެމީހުން ދިރިއުޅެމުންދާ މުސްކުޅި ގޭގެ ތެރެއިން ފޮރުވާފައި ހުރި ގިނަ އަދަދެއްގެ ފައިސާ ފެނި، ހައިރާންކަމެއް ލިބިއްޖެއެވެ. ޓިކްޓޮކްގައި ހިއްސާކުރުމާއެކު ގިނަ ބައެއްގެ ސަމާލުކަން ލިބުނު މި ހޯދުމުގައި، ވަޅުލާފައި އޮތް ކުލަ ދަަޅެއްގެ ތެރެއިން 1،000 ޕައުންޑަށް ވުރެ ގިނަ ފައިސާ ވަނީ ފެނިފައެވެ.
1900 ގެ އަހަރުތަކުގެ ކުރިން ބިނާކޮށްފައިވާ ގެއެއްގައި ދިރިއުޅޭ ލުއީސާ އާއި އޭނާގެ ފިރިމީހާ ޑެން އަށް މި ފައިސާ ފެނުނީ، އެގޭގެ ތިރީބައި (ސެލަރ) އަށް ފޭބުމަށް ހުންނަ ސިޑިބަރީގެ ދަށުގައި ބަންދުކޮށްފައި ހުރި ސިއްރު ތަނެއް ބަލަމުން ދަނިކޮށެވެ. އެތައް އަހަރެއް ވަންދެން އެތަނުގައި ފޮރުވާފައި ހުރީ ކޮން އެއްޗެއްތޯ ބެލުމަށް އެ ދެމަފިރިން ނިންމީ އެކަމާ މެދު އުފެދުނު ޝައުގުވެރިކަމެއްގެ ބޮޑުކަމުންނެވެ.
އެތަން ހޯދަމުން ދިޔައިރު، އެމީހުންނަށް ބައެއް ބާ އެއްޗެހި ފެނުނެވެ. އޭގެ ތެރޭގައި ބޯޓުދެލި ކޮޅުތަކަކާއި ވަރަށް ބޮޑަށް ހަލާކުވެފައިވާ ކުލަ ދަަޅެއް ހިމެނެއެވެ. އެ ދަޅު އޮތީ ކުނިބުނިން ފުރި، ސޫފި އަޅައި، އަދި އަމޯނިއާ ފަދަ ގަދަ ވަހެއް ދުވާތީ އެ ހުޅުވަން އެމީހުން ފުރަތަމަ ޖެހިލުންވިއެވެ. އެހެންކަމުން، އެ ދަޅު ހުޅުވަން ނިންމުމުގެ ކުރިން އެތައް މަހެއް ވަންދެން އެމީހުން އޭގައި އަތްނުލާ ބެހެއްޓިއެވެ.
ލުއީސާ އާއި ޑެން އެ ދަޅު ހުޅުވި ވަގުތު ފޯނުން ރެކޯޑުކުރިއެވެ. އެމީހުން ހައިރާންކޮށްލީ، އޭގެ ތެރޭގައި 1970 ގެ އަހަރުތަކަށް ނިސްބަތްވާ ގިނަ އަދަދެއްގެ ފައިސާ ބޮނޑިތަކެއް ހުރުމުންނެވެ. އެމީހުން ހީކުރި ވަރަށް ވުރެ އެ ފައިސާގެ އަގު ބޮޑުއިރު، ޖުމްލަ 1،000 ޕައުންޑަށް ވުރެ ގިނަ ފައިސާ އެތަނުން ފެނުނެވެ.
ލުއީސާ ބުނި ގޮތުގައި މިއީ ދުވަހަކުވެސް ހަނދާނުން ފޮހެލަން ދަތި ތަޖުރިބާއެކެވެ. ހާއްސަކޮށް، މި ހައިރާންކުރުވަނި "ޚަޒާނާ" ފެނުނު ވަގުތު އެތަނުގައި ތިބި އެމީހުންގެ ދަރިން ތިބީ ވަރަށް ބޮޑަށް އުފާވެފައެވެ. "އަހަރެމެންގެ ތެރެއިން އެކަކުވެސް އޭގެ ތެރޭގައި ފައިސާ ހުންނާނެ ކަމަކަށް އުންމީދެއް ނުކުރަން. މިއީ ކުދިންނަށް ލިބުނު ވަރަށް ފުރިހަމަ ހަނދާނެއް؛ އެކުދިން އަބަދުވެސް މިކަން ހަނދާން ހުންނާނެ،" އޭނާ ބުންޏެވެ.
މި ނުވިސްނާ ތިއްބާ ލިބުނު ފައިސާއަކީ އެ އާއިލާއަށް ވަރަށް ބޭނުންތެރި ވަގުތެއްގައި ލިބުނު އެހީއެކެވެ. ލުއީސާ ހާމަކުރި ގޮތުގައި އެ ފައިސާ ފެނުނުއިރު އޭނާ ހުރީ ވަޒީފާއެއް ނެތިއެވެ. އެހެންކަމުން، އެ ފައިސާގެ އެހީގައި ގޭގެ ޚަރަދުތައް ބެލެހެއްޓުމަށާއި، ބިލްތައް ދެއްކުމަށާއި، ކުދިންނަށް ބޭނުންވާ ބައެއް ތަކެތި ހޯދައިދިނުމަށް ފަސޭހަވެގެން ދިޔައެވެ.
"ކުދިންނަށް ކޮންމެވެސް ވަރެއްގެ އުފަލެއް ހޯދައިދީ، ނުދެއްކި ހުރި ބިލްތައް ދައްކާލަން ލިބުނު ވަރަށް ބޮޑު ފުރުސަތެއް މިއީ. އޭގެ ސަބަބުން މަދު ހަފުތާތަކަކަށް ނަމަވެސް އަހަރެމެންގެ ބޮލުން ބޮޑު ބުރައެއް ލުއިވެގެން ދިޔަ،" އޭނާ ބުންޏެވެ.
މި ވީޑިއޯ ވައިރަލްވުމާ ގުޅިގެން، ސޯޝަލް މީޑިއާ ބޭނުންކުރާ ފަރާތްތަކުން ވަނީ އެ ބާ ފައިސާއާ މެދު އަމަލުކުރާނެ ގޮތުގެ ލަފާ ދީފައެވެ. ބައެއް މީހުން ބުނި ގޮތުގައި ރާނީ އެލިޒަބަތު ދެވަނައިގެ ފޮޓޯ ޖަހާފައިވާ އިނގިރޭސިވިލާތުގެ ބާ ފައިސާ އަދިވެސް ބޭންކުތައް މެދުވެރިކޮށް ބަދަލުކުރެވިދާނެއެވެ. އަދި އަނެއް ބަޔަކު ލަފާދިނީ އެއީ އާސާރީ ތަކެތި އެއްކުރާ މީހުންގެ މެދުގައި އަގުބޮޑު އެއްޗަކަށް ވެދާނެތީ އެކަން ޗެކްކުރުމަށެވެ. ބައެއް ތާރީޚީ ފައިސާއަކީ އޭގެ އަސްލު އަގަށް ވުރެ މާ ބޮޑު އަގުތަކެއްގައި ވިކޭ އެއްޗެއްސެވެ.
ލުއީސާ އާއި ޑެން އަދި އެމީހުންގެ ދަރިންނަށް، ގޭގެ ހަނދާން ނެތިފައިވާ ކަނަކާ މެދު އުފެދުނު ޝައުގުވެރިކަން ބަދަލުވެގެން ދިޔައީ، އާއިލީ އުފާވެރި ހަނދާނަކަށާއި، ނުވިސްނާ ހުއްޓާ ލިބުނު މާލީ އެހީތެރިކަމަކަށެވެ.
